Pahalgam Terror Attack વિદેશ મંત્રી જયશંકરે પહેલગામ હુમલાના નિંદકોને સંદેશ આપ્યો
Pahalgam Terror Attack જમ્મુ-કાશ્મીરના પહેલગામમાં થયેલા ભયાનક આતંકવાદી હુમલાના પગલે ભારતે આંતરરાષ્ટ્રીય સ્તરે દબાવ વધારવાની કામગીરી શરૂ કરી છે. વિદેશ મંત્રી એસ. જયશંકરે 28 અને 29 એપ્રિલ, 2025ના રોજ સંયુક્ત રાષ્ટ્ર સુરક્ષા પરિષદના (UNSC) અસ્થાયી સભ્ય દેશોના વિદેશ મંત્રીઓ અને સંયુક્ત રાષ્ટ્રના મહાસચિવ એન્ટોનિયો ગુટેરેસ સાથે વાર્તા કરી હતી.
જયશંકરે સ્લોવેનિયા, પનામા, અલ્જેરિયા, ગુયાના, સિએરા લિયોન જેવા દેશોના વિદેશ મંત્રીઓ સાથે વાતચીત કરી અને આ હુમલાની નિંદા કરવા બદલ તેમનો આભાર માન્યો. તેમણે કહ્યું કે ભારતના પીએમ નરેન્દ્ર મોદી તરફથી પાકિસ્તાનને સ્પષ્ટ સંદેશો આપવામાં આવ્યો છે અને ગુનેગારોને ન્યાયના કઠેરા સુધી લાવવામાં દેશ નિષ્ઠાવાન છે.
વિદેશ મંત્રીએ ગુટેરેસને જણાવ્યું કે આતંકવાદી હુમલાના ગુનેગારો, આયોજકો અને સમર્થકો સામે કડક કાર્યવાહી જરૂરી છે. તેમણે હુમલાની સ્પષ્ટ નિંદા કરવા બદલ ગુટેરેસની પ્રશંસા કરી અને ભારતની ‘ઝીરો ટોલરન્સ’ નીતિ પર ભાર મૂક્યો.
UNSC દ્વારા 25 એપ્રિલે અપાયેલું નિવેદન ભારતને અપૂર્ણ લાગ્યું હતું કારણ કે પાકિસ્તાન અને ચીનના દખલથી નિવેદનની અસર ઘટાડી દેવામાં આવી હતી. તેવા સંજોગોમાં, ભારતે વૈશ્વિક સહયોગ સ્થાપિત કરવાના પ્રયાસો તીવ્ર કર્યા છે.
વિદેશ મંત્રીએ કહ્યું કે ગુયાના, પનામા અને અલ્જેરિયા સહિત અનેક દેશોએ આતંકવાદ સામે એકતા દર્શાવી છે.
એક તરફ દુનિયા ભારત સાથે ઊભી છે, તો બીજી તરફ વડા પ્રધાન મોદીએ સ્પષ્ટ કહ્યું છે કે હુમલાના જવાબદારને સૌથી કડક કાર્યવાહી નો સામનો કરવો પડશે. સરકારે સુરક્ષા દળોને સંપૂર્ણ છૂટ આપી છે અને જરૂરી પગલાં લેવા માટે સજ્જ છે.
