વાહનોમાં જુની નંબર પ્લેટ બદલાવવામાં લોકો ધંધે લાગ્યા

ગુજરાતમાં તમામ વાહનોમાં ૧૫મી જાન્યુઆરી સુધીમાં હાઈ સિકયોરિટી રજિસ્ટ્રેશન પ્લેટ લગાવવાનો આદેશ અપાયો છે, અને જે વાહનચાલક હાઈ સિકયોરિટી રજિસ્ટ્રેશન પ્લેટ નહીં નખાવે તેને તે જયારે પણ પકડાશે ત્યારે ૫૦૦ રૂપિયા દંડ ભરવો પડશે. જોકે, આ ડેડલાઈનને હવે માંડ ૧૩ દિવસ રહ્યા છે, ત્યારે અમદાવાદીઓની હાલત કફોડી થઈ ગઈ છે. એક તરફ, ટ્રાન્સપોર્ટ વિભાગ તંત્ર દ્વરા જાહેરખબર અપાઈ રહી છે કે,નજીકના ડીલરને ત્યાં નંબર પ્લેટ નખાવી શકશે, પરંતુ ગ્રાઉન્ડ રિયાલિટી કંઈક અલગ જ છે. ટ્રાન્સપોર્ટ વિભાગ દ્વારા http://www.hsrpgujarat.com પર જયાં હાઈ સિકયોરિટી રજિસ્ટ્રેશન પ્લેટ નખાવી શકાય છે. તેવા ડીલર્સની યાદી આપવામાં આવી છે. આ વેબસાઈટના જણાવ્યા અનુસાર, અમદાવાદ જિલ્લામાં ૩૮ ડીલર્સને ત્યાં હાઈ સિકયોરિટી રજિસ્ટ્રેશન પ્લેટ નાખી આપવામાં આવે છે. જોકે કેટલાક ડીલર્સનો ફોન પર સંપર્ક કરવામાં આવ્યો ત્યારે તેમાંના ઘણાએ પોતાને ત્યાં આવી કોઈ સુવિધા હોવાનો સ્પષ્ટ ઈનકાર કરી દીધો હતો. એસ જી હાઈવે પર આવેલી લેન્ડ માર્ક હોન્ડામાં હાઈ સિકયોરિટી રજિસ્ટ્રેશન પ્લેટ નંબર પ્લેટનું કામ સંભાળતા હરુન મિર્ઝા જણાવે છે કે ડિપાર્ટમેન્ટ તરફથી સીધી છાપામાં જ જાહેરાત આપી દેવામાં આવી હતી. હજુ સુધી ડીલરોને આ બાબતને લગતો કોઈ સત્તાવાર પત્ર મોકલવામાં આવ્યો નથી. હાઈ સિકયોરિટી રજિસ્ટ્રેશન પ્લેટ વિભાગમાં તેમની વાત થઈ ત્યારે તેમને જાણ કરવામાં આવી હતી કે ડિપાર્ટમેન્ટમાંથી ટીમ ડીલરને નંબર પ્લેટની રીસીટ કેવી રીતે બનાવવી, રજિસ્ટ્રેશન કેવી રીતે કરવું વગેરેની ટ્રેનિંગ આપવા ત્રણથી ચાર દિવસની અંદર આવશે. આ પછી જ તેઓ જૂની નંબર પ્લેટની જગ્યાએ નવી નંબર પ્લેટ નાંખવાનું કામ હાથમાં લઈ શકશે.