ઉત્તર પ્રદેશમાં ટ્રેન દુર્ઘટનામાં 3 લોકોના મોત

ઉત્તર પ્રદેશના ચિત્રકૂટમાં આજે વહેલી સવારે ચિત્રકુટના માણેકપુર સ્ટેશન પાસે વાસ્કો દ ગામા-પટના એક્સપ્રેસના ડબ્બા પાટા પરથી ખડી પડ્યા જેમાં 3 લોકોના મૃત્યુ થયા હતા જયારે 13 લોકો ઇજાગ્રસ્ત થયા હતા. તમામને સારવાર અર્થે હોસ્પિટલ ખસેડાયા હતા.
ટ્રેન ગોવાના મડગાંવ સ્ટેશનથી પટાણા જવા રવાના થઇ હતી જ્યાં ચિત્રકૂટમાં વહેલી સવારે આ દુર્ઘટના સર્જાઈ હતી. ઘટના સમયે રેલ્વેબોર્ડના ચેરમેન ગુરુવરન લખનઉ માં જ હતા આથી તાત્કાલિક સલામતીના પગલાં લેવામાં આવ્યા હતા.
સ્થાનિક લોકોએ પ્રાથમિક માહિતી આપતા જણાવ્યું હતું કે પાટા તૂટેલા હોવાથી આ દુર્ઘટના સર્જાઈ હતી. પ્રિન્સિપલ સેક્રેટરી અરવિંદ કુમારે જણાવ્યું હતું કે ટેક્નિકલ ખામી સર્જાતા આ દુર્ઘટના થઇ હતી જો કે તાત્કાલીક ધોરણે પ્રાથમિક સારવાર શરૂ કરી દેવામાં આવી હતી. અલ્હાબાદથી મેડિકલ ટીમને ઘટના સ્થળે મોકલી દેવામાં આવી હતી.વાસ્કો દ ગામા-પટના એક્સપ્રેસના 7 કોચને પટના રવાના કરી દીધા હતા.