જ્યોર્જિયા બોર્ડર પર ભારતીય મહિલાનો દાવો: ‘ખાવું પણ મળ્યું નહીં, વોશરૂમ જવા દીધો નહીં, પશુઓ જેવો વ્યવહાર’
ભારતીય મહિલા ધ્રુવી પટેલે જ્યોર્જિયા અને આર્મેનિયાની સીમા પર આવેલા સડાખ્લો વિસ્તારમાં પોતાની સાથે થયેલી અમાનવીય ઘટનાનો દાવો કર્યો છે. ધ્રુવીના જણાવ્યા અનુસાર, જ્યોર્જિયા બોર્ડર પર હાજર અધિકારીઓએ તેમની અને તેમની સાથેના 56 ભારતીય પ્રવાસીઓ સાથે અત્યંત અપમાનજનક અને અમાનવીય વ્યવહાર કર્યો.
ધ્રુવીએ પોતાની ઇન્સ્ટાગ્રામ પોસ્ટમાં જણાવ્યું કે અધિકારીઓએ તેમના પાસપોર્ટ જપ્ત કરી લીધા અને કોઈને પણ ફોન પર વાત કરવાની પરવાનગી આપી નહીં. તેમને પશુઓની જેમ ફૂટપાથ પર બેસવા મજબૂર કરવામાં આવ્યા અને લગભગ પાંચ કલાક સુધી ભૂખ્યા-તરસ્યા રાખવામાં આવ્યા. આ ઉપરાંત, અધિકારીઓએ તેમને વોશરૂમ જવાની પણ પરવાનગી આપી નહોતી.
અધિકારીઓનું અપમાનજનક વર્તન
ધ્રુવીના કહેવા મુજબ, બોર્ડર અધિકારીઓએ તેમનો વીડિયો બનાવ્યો અને જ્યારે પ્રવાસીઓએ વીડિયો બનાવવાનો પ્રયાસ કર્યો તો તેમને રોકવામાં આવ્યા. તેમણે એવો પણ આરોપ મૂક્યો કે અધિકારીઓએ તેમના દસ્તાવેજોની બરાબર તપાસ ન કરી અને વેરિફિકેશન વગર જ વિઝાને ખોટા ગણાવ્યા. ધ્રુવીએ કહ્યું, “જ્યોર્જિયામાં ભારતીયો સાથે આવો વ્યવહાર શરમજનક અને અસ્વીકાર્ય છે.”
ઇન્સ્ટાગ્રામ પોસ્ટ પર પ્રતિક્રિયાઓ
ધ્રુવીની પોસ્ટ પર લોકોની પ્રતિક્રિયાઓ મિશ્ર રહી. કેટલાક લોકોએ જ્યોર્જિયાની ટીકા કરતાં કહ્યું કે ત્યાં ભારતીયો માટે સતત મુશ્કેલીઓ ઊભી થાય છે. એક યુઝરે તો જ્યોર્જિયાનો બહિષ્કાર કરવાની પણ વાત કરી. જ્યારે, અન્ય એક યુઝરે લખ્યું કે તેમણે 2019માં જ્યોર્જિયાની મુલાકાત લીધી હતી અને ત્યાંના લોકો તેમને ગુનેગારની જેમ જોઈ રહ્યા હતા.
View this post on Instagram
ધ્રુવીએ પોતાની પોસ્ટમાં વડાપ્રધાન નરેન્દ્ર મોદી, વિદેશ મંત્રાલય અને વિદેશ મંત્રી એસ. જયશંકરને ટૅગ કર્યા છે, જેથી આ મામલા પર ત્વરિત ધ્યાન આપવામાં આવે અને ભારતીય પ્રવાસીઓ સાથે આ પ્રકારના વ્યવહારને રોકવાના ઉપાયો કરી શકાય.
આ ઘટનાએ સ્પષ્ટ કરી દીધું છે કે વિદેશમાં ભારતીય નાગરિકો સાથે અમાનવીય અને અપમાનજનક વ્યવહારની ફરિયાદો હજુ પણ સામે આવે છે. ધ્રુવીના અનુભવે લોકોમાં ચિંતા ઊભી કરી છે અને આ બાબતે વહીવટી કાર્યવાહીની માગણી ઉઠી રહી છે.
