“અમને ફીફા વર્લ્ડ કપમાંથી કોઈ બહાર ન કરી શકે”; ટ્રમ્પના નિવેદન પર ઈરાની ફૂટબોલ ટીમનો વળતો પ્રહાર
અમેરિકી રાષ્ટ્રપતિ ડોનાલ્ડ ટ્રમ્પે આગામી ફૂટબોલ વર્લ્ડ કપમાં ઈરાનની ટીમની સહભાગિતાને લઈને કરેલી ટિપ્પણી બાદ હવે વિવાદ વકર્યો છે. ઈરાનની નેશનલ ફૂટબોલ ટીમે ટ્રમ્પના નિવેદનનો જડબાતોડ જવાબ આપતા સ્પષ્ટ કર્યું છે કે કોઈ પણ શક્તિ તેમને આ આંતરરાષ્ટ્રીય ટુર્નામેન્ટ રમતા રોકી શકશે નહીં.
શું હતો સમગ્ર વિવાદ?
આ વર્ષે 12 જૂનથી અમેરિકા, કેનેડા અને મેક્સિકોની સંયુક્ત યજમાનીમાં FIFA વર્લ્ડ કપ 2026નો પ્રારંભ થવા જઈ રહ્યો છે. મધ્ય પૂર્વમાં ચાલી રહેલા રાજકીય તણાવ વચ્ચે, ડોનાલ્ડ ટ્રમ્પે સોશિયલ મીડિયા પ્લેટફોર્મ ‘ટ્રુથ સોશિયલ’ પર એક પોસ્ટ મૂકી હતી. આ પોસ્ટમાં તેમણે ઈરાની ખેલાડીઓની સુરક્ષા અને જીવનના જોખમનો હવાલો આપીને તેમની વર્લ્ડ કપમાં હાજરી સામે આશંકા વ્યક્ત કરી હતી. ટ્રમ્પના આ નિવેદનને ઈરાન પ્રત્યેના પરોક્ષ દબાણ તરીકે જોવામાં આવ્યું હતું.
ઈરાનનો કડક જવાબ: “યજમાન સુરક્ષા ન આપી શકે તો તે તેની નિષ્ફળતા છે”
ટ્રમ્પના નિવેદન બાદ ઈરાનની ફૂટબોલ ટીમે સોશિયલ મીડિયા દ્વારા સત્તાવાર પ્રતિક્રિયા આપી છે. સમાચાર એજન્સી પીટીઆઈના અહેવાલ મુજબ, ઈરાની ટીમે જણાવ્યું હતું કે:
“વર્લ્ડ કપ એ એક ઐતિહાસિક અને આંતરરાષ્ટ્રીય ઈવેન્ટ છે, જેનું સંચાલન ફીફા (FIFA) કરે છે, કોઈ એક દેશ નહીં. ઈરાન આ ટુર્નામેન્ટ માટે ક્વોલિફાય થનારી પ્રથમ ટીમોમાંની એક છે. જો અમેરિકા યજમાન દેશ હોવા છતાં ખેલાડીઓની સુરક્ષા સુનિશ્ચિત કરી શકતું નથી, તો તેની જવાબદારી તેમની છે.”
ઈરાની ટીમે વધુમાં ઉમેર્યું કે જો સુરક્ષા આપવામાં અસમર્થતા હોય, તો યજમાન દેશને જ બહાર કરી દેવો જોઈએ, નહીં કે રમવા આવનારી ટીમોને.
ફીફા અધ્યક્ષની દરમિયાનગીરી
આ વિવાદને શાંત કરવા માટે ફીફાના અધ્યક્ષ જિયાની ઇન્ફેન્ટિનોએ પણ સક્રિય ભૂમિકા ભજવી છે. અહેવાલો મુજબ, તેમણે રાષ્ટ્રપતિ ટ્રમ્પ સાથે મુલાકાત કરી હતી અને સ્પષ્ટતા કરી હતી કે ઈરાનની ટીમ નિયમ મુજબ વર્લ્ડ કપમાં ભાગ લેશે. ફીફા રમતગમતને રાજકારણથી અલગ રાખવાના પક્ષમાં છે અને તમામ ક્વોલિફાઈડ ટીમોને રમવાની મંજૂરી આપવા કટિબદ્ધ છે.
