અમેરિકા સાથેના ભયાનક યુદ્ધ અને આકરા પ્રતિબંધો વચ્ચે ઈરાન માટે મોટા રાહતના સમાચાર: ૭.૫ ટ્રિલિયન ક્યુબિક ફીટ કુદરતી ગેસનો નવો ખજાનો મળ્યો
અમેરિકા અને ઈરાન વચ્ચે ચાલુ યુદ્ધ અને તંગદિલી વચ્ચે ઈરાનના ઉર્જા ક્ષેત્રમાંથી એક અત્યંત મહત્વપૂર્ણ સમાચાર સામે આવ્યા છે. યુએસ ટ્રેઝરી વિભાગ અને રાષ્ટ્રપતિ ડોનાલ્ડ ટ્રમ્પ દ્વારા ઈરાન પર અત્યાર સુધીના સૌથી આકરા આર્થિક પ્રતિબંધો લાદવાની ચેતવણીઓ આપવા વચ્ચે ઈરાને કુદરતી ગેસનો એક અફાટ ભંડાર શોધી કાઢ્યો છે. આ નવી શોધને ઈરાન માટે યુદ્ધના આ વિકટ સમયમાં એક મોટો જૅકપોટ માનવામાં આવી રહ્યો છે, જે લાંબા ગાળે દેશની આર્થિક અને ઊર્જા સુરક્ષાને મજબૂત બનાવવામાં નિર્ણાયક સાબિત થશે.
દક્ષિણ ફાર્સ પ્રાંતમાં મળ્યો ગેસનો વિશાળ ભંડાર
ઈરાનના તેલ મંત્રી મોહસેન પાકનેજાદે આ અંગે માહિતી આપતા જણાવ્યું હતું કે, દેશના દક્ષિણી ફાર્સ પ્રાંતમાંથી ૨૧૨ અબજ ક્યુબિક મીટર (આશરે ૭.૫ ટ્રિલિયન ક્યુબિક ફીટ) થી પણ વધુનો કુદરતી ગેસનો નવો ભંડાર મળી આવ્યો છે.
પાકનેજાદના જણાવ્યા અનુસાર, આ નવો શોધાયેલો ભંડાર વિશ્વના સૌથી મોટા ગેસ ક્ષેત્ર ‘સાઉથ ફાર્સ’ (South Pars) ના એક આખા તબક્કામાંથી થતા ૧૫ વર્ષના ઉત્પાદન બરાબર છે. ઉલ્લેખનીય છે કે સાઉથ ફાર્સ ગેસ ક્ષેત્રનો ઉપયોગ ઈરાન અને કતાર બંને દેશો સંયુક્ત રીતે કરી રહ્યા છે. આવી સ્થિતિમાં આટલી મોટી માત્રામાં નવો જથ્થો મળવો એ આંતરરાષ્ટ્રીય ઊર્જા ક્ષેત્રે એક મોટી ઘટના ગણાવવામાં આવી રહી છે.
યુદ્ધના કારણે ઈરાનના ઊર્જા ક્ષેત્રને મોટો ફટકો પડ્યો હતો
છેલ્લા કેટલાક મહિનાઓથી અમેરિકા અને ઈઝરાયેલ સાથે ચાલી રહેલા લશ્કરી સંઘર્ષને કારણે ઈરાનની આર્થિક કરોડરજ્જુ ગણાતા ઊર્જા ક્ષેત્રને મોટું નુકસાન પહોંચ્યું છે. સતત થયેલા હુમલાઓમાં ઈરાનના મુખ્ય ગેસ પ્લાન્ટ્સ, તેલ રિફાઇનરીઓ અને સંગ્રહ ડેપો ક્ષતિગ્રસ્ત થયા છે. આ યુદ્ધને કારણે ઈરાને પોતાની દૈનિક ગેસ ઉત્પાદન ક્ષમતાનો આશરે ચોથો ભાગ (૨૫ ટકાથી વધુ) ગુમાવવો પડ્યો છે.
જોકે, નિષ્ણાતોનું માનવું છે કે ગેસના આ નવા ભંડારની શોધથી યુદ્ધમાં થયેલા નુકસાનની તાત્કાલિક ભરપાઈ શક્ય બનશે નહીં. આ નવા ગેસ ક્ષેત્રનો વિકાસ કરવા, ડ્રિલિંગ ફેસિલિટી ઊભી કરવા અને વાસ્તવિક ઉત્પાદન શરૂ કરવામાં હજુ પણ કેટલાક વર્ષોનો સમય લાગશે. પરંતુ, ભવિષ્યની ઊર્જા ક્ષમતા અને આર્થિક સ્થિરતા માટે આ શોધ સંજીવની સમાન સાબિત થઈ શકે છે.
ટ્રમ્પનું દબાણ અને ચીન પર અમેરિકાની નજર
બીજી તરફ, અમેરિકી રાષ્ટ્રપતિ ડોનાલ્ડ ટ્રમ્પે ઈરાન સામેનું દબાણ અભિયાન વધુ તેજ કર્યું છે. અમેરિકાએ સ્પષ્ટ ચેતવણી આપી છે કે જે પણ દેશ ઈરાન સાથે વેપાર કરશે અથવા તેને આર્થિક લાઈફલાઈન પૂરી પાડશે, તે દેશો પર પણ અમેરિકા કડક આર્થિક પ્રતિબંધો લાગુ કરશે.
અમેરિકા ખાસ કરીને ઈરાન પાસેથી સૌથી વધુ કાચું તેલ ખરીદનાર દેશ ચીન પર ભારે રાજદ્વારી અને આર્થિક દબાણ બનાવી રહ્યું છે. અમેરિકાનો મુખ્ય હેતુ ઈરાનની નિકાસ આવક શૂન્ય કરીને તેના અર્થતંત્રને સંપૂર્ણપણે ઠપ કરવાનો છે. આવા કઠિન સમયમાં ઈરાન માટે આ કુદરતી ગેસનો નવો ખજાનો આશાનું નવું કિરણ લઈને આવ્યો છે.
