આફ્રિકા અને સીરિયામાં અસ્થિરતાનો લાભ ઉઠાવી રહ્યા ISIS આતંકીઓ, કૃત્રિમ બુદ્ધિમત્તા અને સોશિયલ મીડિયાનો ઉપયોગ
સંયુક્ત રાષ્ટ્રે તાજેતરમાં પોતાના અહેવાલમાં ઇસ્લામિક સ્ટેટ (ISIS)ની વધતી ગતિવિધિઓને લઈને ગંભીર ચિંતા વ્યક્ત કરી છે. અહેવાલ અનુસાર, આફ્રિકા, સીરિયા અને અફઘાનિસ્તાનમાં અસ્થિર પરિસ્થિતિનો લાભ ઉઠાવીને આ આતંકી સંગઠન પોતાની પકડ મજબૂત કરી રહ્યું છે. ખાસ વાત એ છે કે ISIS હવે માત્ર હથિયારોથી જ નહીં, પરંતુ આધુનિક ટેકનોલોજી જેવી કે કૃત્રિમ બુદ્ધિમત્તા (AI) અને સોશિયલ મીડિયાનો સહારો લઈને પોતાના નેટવર્કનો વિસ્તાર કરી રહ્યું છે.
ઇરાક-સીરિયાથી આફ્રિકા સુધી ફેલાયેલું નેટવર્ક
સંયુક્ત રાષ્ટ્ર સુરક્ષા પરિષદમાં જણાવવામાં આવ્યું કે 2017માં ઇરાકમાં હારનો સામનો કર્યા છતાં ISISના સ્લીપર સેલ આજે પણ સક્રિય છે. ઇરાક અને સીરિયાના રણ વિસ્તારોમાં આ સંગઠન ફરીથી પગ જમાવવાનો પ્રયાસ કરી રહ્યું છે. જ્યારે આફ્રિકાનો સાહેલ વિસ્તાર (માલી, નાઇજર, બુર્કિના ફાસો) હવે આતંકવાદનું નવું કેન્દ્ર બની ગયો છે. અહીં ISIS વિદેશી આતંકીઓને આકર્ષી રહ્યું છે અને તેને “આતંકવાદનું મોટું પ્રચારક” માનવામાં આવી રહ્યું છે.
લીબિયા અને સોમાલિયામાં સક્રિયતા
લીબિયામાં તાજેતરની ધરપકડોએ ઇસ્લામિક સ્ટેટના વધતા નેટવર્કની પુષ્ટિ કરી છે. જ્યારે સોમાલિયામાં સુરક્ષા દળોની કાર્યવાહીમાં લગભગ 200 આતંકવાદીઓ માર્યા ગયા અને 150થી વધુની ધરપકડ કરવામાં આવી. આનાથી સ્પષ્ટ છે કે સંગઠન હજુ પણ આ ક્ષેત્રમાં ઊંડા મૂળ જમાવવાનો પ્રયાસ કરી રહ્યું છે.
લેક ચાડ અને વિદેશી મદદ
યુએન આતંકવાદ વિરોધી સમિતિના પ્રમુખ નતાલિયા ગેરમન અનુસાર, આફ્રિકાના લેક ચાડ બેસિન ક્ષેત્રમાં ISISને વિદેશી ફંડિંગ, ડ્રોન અને IED જેવા ઉપકરણોની મદદ મળી રહી છે. આ જ કારણ છે કે આજે આફ્રિકા વૈશ્વિક આતંકવાદથી થતા મૃત્યુનો સૌથી મોટો શિકાર બની ચૂક્યું છે.
અફઘાનિસ્તાન અને પશ્ચિમ એશિયામાં જોખમ યથાવત
અહેવાલ અનુસાર, અફઘાનિસ્તાનમાં ISISનું સહયોગી સંગઠન ખુરાસાન જૂથ હજુ પણ સક્રિય છે અને તે પ્રાદેશિક સુરક્ષા માટે મોટો ખતરો બન્યો છે. તે સ્થાનિક વહીવટીતંત્રને નબળું પાડવા, લઘુમતીઓ પર હુમલા કરવા અને વિદેશી નાગરિકોને નિશાન બનાવવા જેવી રણનીતિ પર કામ કરી રહ્યું છે.
યુએનની ચેતવણી
યુએનના આતંકવાદ વિરોધી કાર્યાલયના પ્રમુખ વ્લાદિમીર વોરોનકોવે કહ્યું કે જો આ ગતિવિધિઓ પર જલ્દી કાબૂ ન મેળવવામાં આવ્યો, તો ISIS ફરીથી વૈશ્વિક સુરક્ષા માટે ગંભીર પડકાર બની શકે છે. તેમણે એ પણ ચેતવણી આપી કે આધુનિક ટેકનોલોજીનો ઉપયોગ આતંકવાદીઓને વધુ ખતરનાક બનાવી રહ્યો છે.
