ઇઝરાયલના વડાપ્રધાન અને મંત્રીઓની સુરક્ષા વધારાઈ, હુતી વિદ્રોહીઓએ આપી ધમકી
ઇઝરાયલ અને યમનના હુતી વિદ્રોહીઓ વચ્ચે તણાવ ફરી એકવાર વધી ગયો છે. તાજેતરમાં ઇઝરાયલે યમનની રાજધાની સનામાં હવાઈ હુમલો કર્યો, જેમાં હુતી વડાપ્રધાન અહમદ અલ-રહાબી સહિત અનેક મોટા નેતાઓના મોત થયા. આ હુમલા બાદ હુતી વિદ્રોહીઓએ ઇઝરાયલ પર મિસાઈલ અને ડ્રોન હુમલા કરવાની ધમકી આપી છે. વધતા જોખમને ધ્યાનમાં રાખીને વડાપ્રધાન બેન્જામિન નેતન્યાહૂ અને સંરક્ષણ મંત્રી ઇઝરાયલ કાત્ઝ સહિત અનેક ટોચના મંત્રીઓની સુરક્ષા વધારવામાં આવી છે.
યમનમાં મોટો હુમલો
28 ઓગસ્ટે ઇઝરાયલી સેનાએ સનામાં હવાઈ હુમલો કર્યો હતો. આ હુમલામાં હુતી વડાપ્રધાન રહાબી, બે નાયબ વડાપ્રધાન, વિદેશ મંત્રી અને લગભગ 10 અન્ય મંત્રીઓ માર્યા ગયા. ઇઝરાયલનો દાવો છે કે આ ઓપરેશન હુતી નેતાઓને ખતમ કરવા માટે કરવામાં આવ્યું હતું, કારણ કે તેઓ સતત ઇઝરાયલ પર હુમલાનું કાવતરું ઘડી રહ્યા હતા.
હુતીઓની ધમકી
હુમલા બાદ હુતી વિદ્રોહીઓના વડા અબ્દુલ મલિક અલ-હૌથીએ જાહેરાત કરી કે તેઓ ઇઝરાયલ વિરુદ્ધ બદલો લેશે. તેમણે કહ્યું કે તેમના લડાકુઓ મિસાઈલ અને ડ્રોનથી ઇઝરાયલને નિશાન બનાવશે અને કોઈપણ ભોગે પીછેહઠ કરશે નહીં. અલ-હૌથીએ સ્પષ્ટ કર્યું કે ઇઝરાયલની કાર્યવાહીથી તેમનું આંદોલન નબળું નહીં પડે.
ઇઝરાયલનો વળતો હુમલો ચાલુ
ઇઝરાયલે હુતીઓની ધમકીને ફગાવતા કહ્યું છે કે આ તો માત્ર શરૂઆત છે. નેતન્યાહૂએ દાવો કર્યો કે જ્યાં પશ્ચિમી અને આરબ ગઠબંધન નિષ્ફળ રહ્યા, ત્યાં ઇઝરાયલે મોટી સફળતા હાંસલ કરી છે. તેમણે કહ્યું કે હુતી કમાન્ડરોને ખતમ કરવા માટે ઓપરેશન ચાલુ રહેશે અને આ જોખમને સંપૂર્ણપણે નાબૂદ ન કરી દેવાય ત્યાં સુધી તે અટકશે નહીં.
ગાઝા યુદ્ધ સાથે જોડાયેલો તણાવ
વાસ્તવમાં, ઓક્ટોબર 2023માં ગાઝા યુદ્ધ શરૂ થયા બાદથી હુતી વિદ્રોહીઓ સતત ઇઝરાયલને નિશાન બનાવી રહ્યા છે. તેમણે ઘણીવાર ડ્રોન અને મિસાઈલથી હુમલા કર્યા છે. તેના જવાબમાં ઇઝરાયલ મહિનાઓથી યમનમાં હુતી ઠેકાણાઓ પર હુમલા કરી રહ્યું છે.
સુરક્ષા અને આંતરરાષ્ટ્રીય પ્રતિક્રિયા
હુતીઓની ધમકી બાદ ઇઝરાયલની કેબિનેટની બેઠક પણ યોજાઈ, જોકે તેનું સ્થળ ગુપ્ત રાખવામાં આવ્યું. આ દરમિયાન હુતીઓએ સંયુક્ત રાષ્ટ્રના પરિસરો પર દરોડા પાડીને ઓછામાં ઓછા 11 કર્મચારીઓની અટકાયત કરી છે. આ ઉપરાંત તેમણે સના અને આસપાસના વિસ્તારોમાં ઘણા લોકોને ઇઝરાયલ સાથે જાસૂસી કરવાના શકમાં ધરપકડ કરી છે.
