જિલ્લા વહીવટીતંત્રના સહયોગથી જામનગરમાં તા.૨૩ થી ૨૬ ફેબ્રુઆરી દરમિયાન એનએસજીની કાઉન્ટર ટેરરિસ્ટ એકસરસાઈઝ
જામનગર જિલ્લામાં ૨૩ થી ૨૬ ફેબ્રુઆરી દરમિયાન નેશનલ સિક્યોરીટી ગાર્ડ (NSG) દ્વારા જિલ્લા વહીવટી તંત્રના સહયોગથી પ્રથમ વખત રાષ્ટ્રીય કક્ષાની ‘કાઉન્ટર ટેરેરીસ્ટ એક્સરસાઇઝ’ યોજવામાં આવશે. આ મહત્વપૂર્ણ કાર્યક્રમની તૈયારીઓ માટે કલેક્ટર કેતન ઠક્કરની અધ્યક્ષતામાં એક ઉચ્ચસ્તરીય બેઠક યોજાઈ હતી. આ કવાયતનો મુખ્ય હેતુ આતંકવાદી હુમલા જેવી ગંભીર પરિસ્થિતિમાં સુરક્ષા એજન્સીઓ કેટલી ઝડપથી અને અસરકારક રીતે કામ કરી શકે છે તેનું પરીક્ષણ કરવાનો છે.
આકસ્મિક પરિસ્થિતિમાં ત્વરિત પ્રતિસાદ અને સંકલન પર ભાર
આ મોકડ્રીલ દરમિયાન આતંકવાદી હુમલા જેવી સ્થિતિમાં બચાવ અને રાહત કામગીરીનું પ્રાયોગિક મૂલ્યાંકન કરવામાં આવશે. NSGના અધિકારીઓએ બેઠકમાં સુરક્ષા સંબંધિત માર્ગદર્શિકા વિશે વિગતવાર માહિતી આપી હતી. આ અભ્યાસ દ્વારા પોલીસ, આરોગ્ય, ફાયર બ્રિગેડ અને હોમગાર્ડ જેવા વિવિધ વિભાગો વચ્ચે સંકલન અને સંચાર વ્યવસ્થા વધુ મજબૂત બનાવવામાં આવશે, જેથી કોઈ પણ વાસ્તવિક આપત્તિ સમયે જાન-માલનું નુકસાન અટકાવી શકાય.
રાષ્ટ્રીય સુરક્ષાની દ્રષ્ટિએ જામનગરનું મહત્વ
જામનગર જિલ્લો સેનાની ત્રણેય પાંખો (આર્મી, નેવી, એરફોર્સ), મોટી ઓઈલ રિફાઈનરીઓ અને લાંબો દરિયાકિનારો ધરાવતો હોવાથી સુરક્ષાની દ્રષ્ટિએ ખૂબ જ સંવેદનશીલ અને મહત્વપૂર્ણ છે. કલેક્ટરશ્રીએ જણાવ્યું કે અગાઉ પણ અહીં રાષ્ટ્રીય કક્ષાની મોકડ્રીલ યોજાઈ ચુકી છે, પરંતુ NSG દ્વારા આ પ્રકારનું આયોજન પ્રથમ વાર થઈ રહ્યું છે. આ કવાયતથી જિલ્લાની સુરક્ષા વ્યવસ્થા વધુ સતર્ક અને સજ્જ બનશે.
નાગરિકોને અફવાઓથી દૂર રહેવા અને સહકાર આપવા અપીલ
જિલ્લા પ્રશાસને જામનગરના નાગરિકોને વિનંતી કરી છે કે આ માત્ર એક સુરક્ષા અભ્યાસનો ભાગ છે, તેથી કોઈએ ગભરાવાની કે અફવાઓ પર વિશ્વાસ કરવાની જરૂર નથી. મોકડ્રીલ દરમિયાન શાંતિ જાળવવા અને તંત્રને સહકાર આપવા અનુરોધ કરવામાં આવ્યો છે. આ બેઠકમાં જિલ્લા પોલીસ વડા ડો. રવિ મોહન સૈની સહિત અન્ય ઉચ્ચ અધિકારીઓ ઉપસ્થિત રહ્યા હતા અને પોતપોતાના વિભાગની જવાબદારીઓ સુનિશ્ચિત કરી હતી.
