જસપ્રીત બુમરાહે મલિંગાનો રેકોર્ડ તોડ્યો: વિશ્વના દિગ્ગજ બોલરોની યાદીમાં મેળવ્યું સ્થાન
T20 વર્લ્ડ કપ 2026ની ફાઈનલમાં ભારતીય સ્ટાર ફાસ્ટ બોલર જસપ્રીત બુમરાહે પોતાની ઘાતક બોલિંગથી તરખાટ મચાવી દીધો છે. અમદાવાદના નરેન્દ્ર મોદી સ્ટેડિયમમાં રમાયેલા ખિતાબી મુકાબલામાં બુમરાહે ન્યૂઝીલેન્ડના બેટ્સમેનોને પેવેલિયન ભેગા કરી દીધા હતા. તેણે માત્ર ભારતને જીત જ નથી અપાવી, પરંતુ બોલિંગમાં અનેક નવા રેકોર્ડ્સ પણ પોતાના નામે કર્યા છે.
ફાઈનલમાં શાનદાર પ્રદર્શન અને એવોર્ડ
બુમરાહે ફાઈનલ મેચમાં તેની 4 ઓવરના સ્પેલમાં માત્ર 15 રન આપીને 4 મહત્વની વિકેટો ઝડપી હતી. તેની આ કટિબદ્ધતાને કારણે તેને ‘પ્લેયર ઓફ ધ મેચ’ જાહેર કરવામાં આવ્યો હતો. આ સાથે જ બુમરાહ હવે શાહિદ આફ્રિદી, સેમ કરન અને વિરાટ કોહલી પછી વિશ્વનો ચોથો એવો ખેલાડી બની ગયો છે, જેણે T20 વર્લ્ડ કપની ફાઈનલમાં ‘પ્લેયર ઓફ ધ મેચ’ અને આખી ટૂર્નામેન્ટમાં ‘પ્લેયર ઓફ ધ ટૂર્નામેન્ટ’ (2024માં) બંને એવોર્ડ જીત્યા હોય.
T20 વર્લ્ડ કપ ફાઈનલના ઈતિહાસમાં શ્રેષ્ઠ સ્પેલ:
- અજંતા મેન્ડિસ – 4/12 (વિરુદ્ધ વેસ્ટ ઈન્ડિઝ, 2012)
- જસપ્રીત બુમરાહ – 4/15 (વિરુદ્ધ ન્યૂઝીલેન્ડ, 2026)
- સુનીલ નરેન – 3/9 (વિરુદ્ધ શ્રીલંકા)
- સેમ કરન – 3/12 (વિરુદ્ધ પાકિસ્તાન)
લસિથ મલિંગાનો વર્ષો જૂનો રેકોર્ડ ધ્વસ્ત
બુમરાહે આ ટૂર્નામેન્ટમાં કુલ 14 વિકેટ ઝડપી હતી, જે વરુણ ચક્રવર્તી સાથે સંયુક્ત રીતે સૌથી વધુ છે. આ શાનદાર પ્રદર્શનના જોરે હવે T20 વર્લ્ડ કપના ઈતિહાસમાં તેના નામે કુલ 40 વિકેટ થઈ ગઈ છે. આ સાથે જ તેણે શ્રીલંકાના દિગ્ગજ બોલર લસિથ મલિંગાનો 38 વિકેટનો રેકોર્ડ તોડી નાખ્યો છે. હવે બુમરાહ T20 વર્લ્ડ કપમાં સૌથી વધુ વિકેટ લેનાર ફાસ્ટ બોલર બની ગયો છે.
T20 વર્લ્ડ કપમાં સૌથી વધુ વિકેટ લેનાર ફાસ્ટ બોલરો:
- જસપ્રીત બુમરાહ: 40 વિકેટ
- એનરિક નોર્કિયા: 38 વિકેટ
- લસિથ મલિંગા: 38 વિકેટ
- ટિમ સાઉથી: 36 વિકેટ
ભારતીય બોલિંગનો નવો અધ્યાય
જસપ્રીત બુમરાહની સફળતા બતાવે છે કે તે શા માટે વિશ્વનો સર્વશ્રેષ્ઠ બોલર ગણાય છે. ખાસ કરીને ડેથ ઓવર્સમાં તેની ચોકસાઈ અને યોર્કર બોલ વિરોધી ટીમો માટે માથાનો દુખાવો સાબિત થયા છે. વરુણ ચક્રવર્તી સાથે તેની જોડીએ આખા વર્લ્ડ કપમાં ભારતને મજબૂત સ્થિતિમાં રાખ્યું હતું
