સ્ટાર કાસ્ટને જોવા ઉમટેલી જનમેદનીથી મોલની વ્યવસ્થા ખોરવાઈ
ગુજરાતી ફિલ્મ ઇન્ડસ્ટ્રીમાં રેકોર્ડતોડ કમાણી કરતી ફિલ્મ ‘લાલો: કૃષ્ણ સદા સહાયતે’ના પ્રચાર માટે રાજકોટના ક્રિસ્ટલ મોલમાં વિશાળ કાર્યક્રમ યોજાયો હતો. ફિલ્મની ટીમને જોવા અચાનક મોટી સંખ્યામાં ચાહકો ઉમટી પડતાં મોલમાં ભીડનો દબદબો સર્જાયો હતો. કાર્યક્રમ શરૂ થતાની સાથે જ લોકો એસ્કેલેટર તરફ દોડી આવતા ધક્કામુક્કીની સ્થિતિ ઊભી થઈ હતી, જેને કારણે અનેક લોકો ગભરાઈ ગયા હતા અને માહોલ તંગ બન્યો હતો.
એસ્કેલેટર પર બાળકી પછડાતા હડકડાટ, લોકો દોડ્યા મદદે
ભીડ વધવાને કારણે એક નાની બાળકી એસ્કેલેટરના પગથિયાં પર સરકી પડી હતી અને ક્ષણોમાં તેની તબિયત બગડી હતી. ત્યાં હાજર બે યુવાનોએ તરત જ માનવતા દાખવી બાળકીને ઉપાડી સલામત સ્થળે પહોંચાડી હતી. આ દરમ્યાન અન્ય કેટલાક બાળકો પણ ભીડમાં દબાઈ જતા રડતા-ગભરાતા દેખાયા હતા. સોશિયલ મીડિયામાં વાયરલ થતાં વિડિયોમાં લોકો એકબીજા પર ચડી જતા અને બાળકોને બચાવતાં દૃશ્યો સ્પષ્ટ જોવા મળે છે.
સ્ટાર કાસ્ટને જોવા ઉમટેલી ભીડ નિયંત્રણ બહાર જતા પરિસ્થિતિ ગંભીર બની
ફિલ્મના મુખ્ય અભિનેતા કરણ જોશી, અભિનેત્રી રીવા રચ્છ અને ડિરેક્ટર અંકિત સખિયા સહિતની ટીમ રાજકોટમાં ચાહકો સાથે મુલાકાત કરવા માટે પહોંચી હતી. કલાકારોને જોવા, તેમની સાથે સેલ્ફી લેવા અને સંપર્કમાં આવવા લોકો મોટી સંખ્યામાં મોલમાં ભેગા થયા હતા. અચાનક આટલા લોકો ઉમટી પડતા મોલમાં અફરાતફરી મચી હતી. ઘટના બાદ પોલીસ તાત્કાલિક પહોંચીને ભીડને કાબૂમાં લીધી અને પરિસ્થિતિ સામાન્ય બનાવવામાં આવી હતી.
મોલ મેનેજમેન્ટ વિરુદ્ધ ગુનો, પૂર્વ મંજૂરી વિના કાર્યક્રમની વ્યવસ્થા
પ્રાપ્ત માહિતી મુજબ કોઈ જાનહાનિ સર્જાઈ નથી, જોકે મોલ મેનેજમેન્ટની બેદરકારી સામે હવે કાર્યવાહી હાથ ધરાઈ છે. મોલ મેનેજર સમીર વિસાણી સામે જાહેરનામાનો ભંગ અને જાહેર સુરક્ષાને જોખમમાં મૂકવાના આરોપસર પોલીસ સ્ટેશને ગુનો નોંધાયો છે. પોલીસે જણાવ્યું કે મોલ સંચાલકોએ આટલી મોટી સ્ટાર કાસ્ટના કાર્યક્રમ માટે પોલીસ કે વહીવટીતંત્રની કોઈપણ પૂર્વ મંજૂરી લીધી નહોતી. હાલ સમગ્ર ઘટનાની તપાસ યુનિવર્સિટી પોલીસ સ્ટેશન દ્વારા ચાલુ રાખવામાં આવી છે.
