કેન્દ્રીય ગૃહમંત્રી અમિત શાહ પર અભદ્ર ટિપ્પણી કરવા બદલ મહુઆ મોઇત્રા વિવાદમાં
તૃણમૂલ કોંગ્રેસ (TMC)ના સાંસદ મહુઆ મોઇત્રા ફરી એકવાર વિવાદમાં ફસાયા છે. પશ્ચિમ બંગાળમાં ગેરકાયદેસર ઘૂસણખોરીના મુદ્દે પૂછાયેલા સવાલના જવાબમાં તેમણે કેન્દ્રીય ગૃહમંત્રી અમિત શાહ પર અત્યંત અભદ્ર ટિપ્પણી કરી. તેમના આ નિવેદનને કારણે કૃષ્ણનગર કોતવાલી પોલીસ સ્ટેશનમાં તેમની વિરુદ્ધ ફરિયાદ દાખલ કરવામાં આવી છે.
‘માથું કાપીને ટેબલ પર મૂકવું જોઈએ’ – મહુઆ મોઇત્રાનું વિવાદાસ્પદ નિવેદન
મહુઆ મોઇત્રાએ કહ્યું કે જો લાખો લોકો ભારતમાં ઘૂસણખોરી કરી રહ્યા હોય અને આપણી જમીનો છીનવી રહ્યા હોય, તો આ ગૃહ મંત્રાલયની નિષ્ફળતા છે. તેમણે કહ્યું, “જો બીજા દેશોના લાખો લોકો દરરોજ ઘૂસણખોરી કરી રહ્યા છે અને આપણી માતાઓ અને બહેનો પર નજર રાખી રહ્યા છે, આપણી જમીનો છીનવી રહ્યા છે, તો પહેલા તમારે અમિત શાહનું માથું કાપીને ટેબલ પર મૂકવું જોઈએ.” તેમણે વડાપ્રધાન મોદીના સ્વતંત્રતા દિવસના ભાષણનો પણ ઉલ્લેખ કર્યો, જેમાં વસ્તી વિષયક પરિવર્તનનો મુદ્દો ઉઠાવવામાં આવ્યો હતો. મોઇત્રાએ આ માટે કેન્દ્રીય ગૃહમંત્રીને જવાબદાર ઠેરવ્યા.
ભારત-બાંગ્લાદેશ સંબંધો પર ટિપ્પણી અને રાજકીય પ્રતિક્રિયા
આ નિવેદન ઉપરાંત, મહુઆ મોઇત્રાએ ભારત અને બાંગ્લાદેશના સંબંધો પર પણ ટિપ્પણી કરી. તેમણે કહ્યું કે એક સમયે બાંગ્લાદેશ ભારતનો મિત્ર દેશ હતો, પરંતુ છેલ્લા કેટલાક વર્ષોમાં સ્થિતિ બદલાઈ ગઈ છે. આ ઘટના બાદ ભાજપના નેતા સંદીપ મજુમદારે નાદિયા જિલ્લામાં તેમની વિરુદ્ધ ફરિયાદ નોંધાવી છે. આ ફરિયાદ બાદ રાજકીય વર્તુળોમાં ગરમાવો આવ્યો છે અને ટીએમસી સાંસદની આ ટિપ્પણીની વ્યાપક ટીકા થઈ રહી છે.
વિપક્ષ અને જનતાના ભારે વિરોધ બાદ હવે ટીએમસી સાંસદના આ નિવેદનથી દેશભરમાં ચર્ચાઓ તીવ્ર થઈ છે. કેટલાક લોકોએ આ નિવેદનને “અલોકશાહી અને અશોભનિય” ગણાવ્યું છે.
આ વિવાદને લઈ રાજ્ય અને કેન્દ્ર વચ્ચેનું રાજકીય તણાવ વધુ ઘેરાયું છે અને મહુઆ મોઇત્રા સામે કાયદેસર કાર્યવાહી શરૂ થવાની શક્યતા વધી છે.
