LPG સિલિન્ડર બુક કરાવતા પહેલાં જાણી લો આ મહત્વપૂર્ણ નિયમો
દેશભરમાં તહેવારોની મોસમનો પ્રારંભ થઈ ચૂક્યો છે અને દિવાળીના આડે હવે ગણતરીના દિવસો બાકી રહ્યા છે. આ તહેવારી માહોલમાં ઘર-ઘરમાં વાનગીઓ બનાવવા માટે ગેસ સિલિન્ડરનો વપરાશ નોંધપાત્ર રીતે વધી જાય છે. જે ઘરોમાં પિપ્ડ નેચરલ ગેસ (PNG) નું કનેક્શન છે તેમને કદાચ બુકિંગ કે દરની ચિંતા હોતી નથી, પરંતુ લિક્વિફાઇડ પેટ્રોિલયમ ગેસ (LPG) સિલિન્ડર વાપરતા કરોડો ગ્રાહકોમાં વધતી માગ વચ્ચે ભાવવધારાને લઈને અનેક અફવાઓ અને મુંઝવણો જોવા મળી રહી છે.
તહેવારો પહેલાં જો તમારા ઘરમાં ગેસ સિલિન્ડર ખાલી થઈ ગયો હોય અથવા તમે નવો સિલિન્ડર બુક કરાવી રહ્યા હોવ, તો તમારે જાણવું જરૂરી છે કે હાલમાં ઈંધણ કંપનીઓ દ્વારા ઘરેલુ અને વાણિજ્યિક (કોમર્શિયલ) ગેસ સિલિન્ડરના દરો કયા સ્તરે સ્થિર રાખવામાં આવ્યા છે.
મુખ્ય શહેરોમાં ઘરેલુ ગેસ સિલિન્ડરના વર્તમાન દરો
દેશના વિવિધ મોટા શહેરોમાં ૧૪.૨ કિલોગ્રામ ધરાવતા ઘરેલુ એલપીજી સિલિન્ડરના ભાવમાં થોડો પ્રાદેશિક તફાવત જોવા મળે છે. રાષ્ટ્રીય રાજધાની દિલ્હીમાં ૧૪.૨ કિલોનો ઘરેલુ સિલિન્ડર ૯૪૨ રૂપિયામાં મળી રહ્યો છે. મુંબઈમાં આ ભાવ ૯૪૧.૫૦ રૂપિયા છે.
પૂર્વ અને દક્ષિણ ભારતના શહેરોની વાત કરીએ તો કોલકાતામાં ૯૬૮ રૂપિયા, ચેન્નાઈમાં ૯૫૭.૫૦ રૂપિયા અને હૈદરાબાદમાં ૯૯૪ રૂપિયા પ્રતિ સિલિન્ડર કિંમત છે. એનસીઆર ક્ષેત્રમાં નોઈડા ખાતે ૯૩૯.૫૦ રૂપિયા અને ગુરુગ્રામમાં ૯૫૦.૫૦ રૂપિયા ભાવ છે. ઉત્તર પ્રદેશના પાટનગર લખનૌમાં સિલિન્ડરનો દર ૯૭૯.૫૦ રૂપિયા અને રાજસ્થાનના જયપુરમાં ૯૪૫.૫૦ રૂપિયા છે. પટનામાં ઘરેલુ સિલિન્ડરનો ભાવ ૧,૦૩૧.૫૦ રૂપિયાની સપાટી પર છે.
૧૯ કિલોના કોમર્શિયલ ગેસ સિલિન્ડરના ભાવની સ્થિતિ
તહેવારો દરમિયાન હોટેલ, રેસ્ટોરન્ટ અને મિઠાઈના વેપારીઓ દ્વારા વપરાતા ૧૯ કિલોગ્રામના વાણિજ્યિક ગેસ સિલિન્ડરના ભાવ પણ બજારમાં મહત્વની ભૂમિકા ભજવે છે. દિલ્હીમાં ૧૯ કિલોનો કોમર્શિયલ સિલિન્ડર ૨,૮૧૦ રૂપિયામાં અને નોઈડામાં પણ ૨,૮૧૦ રૂપિયામાં ઉપલબ્ધ છે.
મુંબઈમાં તેનો દર ૨,૭૬૪.૫૦ રૂપિયા અને ગુરુગ્રામમાં ૨,૮૨૮ રૂપિયા છે. કોલકાતામાં કોમર્શિયલ સિલિન્ડર ૨,૯૫૪ રૂપિયા અને ચેન્નાઈમાં ૨,૯૮૩ રૂપિયામાં મળી રહ્યો છે. જ્યારે લખનૌમાં ૨,૯૩૨.૫૦ રૂપિયા, જયપુરમાં ૨,૮૩૯ રૂપિયા, હૈદરાબાદમાં ૩,૦૬૫ રૂપિયા અને પટનામાં સૌથી વધુ ૩,૧૦૦.૫૦ રૂપિયા પ્રતિ સિલિન્ડર ભાવ નોંધાયો છે.
સિલિન્ડર બુક કરતી વખતે ધ્યાનમાં રાખવાના મહત્વના નિયમો
તહેવારોના સમયે ગેસ રિફિલ બુક કરતી વખતે ગ્રાહકોએ કેટલીક બાબતોનું ખાસ ધ્યાન રાખવું જરૂરી છે. સૌપ્રથમ, બુકિંગ કરતી વખતે હંમેશા તમારા ગેસ એજન્સી સાથે નોંધાયેલા અધિકૃત મોબાઇલ નંબરનો જ ઉપયોગ કરવો. વહીવટી નિયમો અનુસાર, તમારા પાછલા સિલિન્ડર બુકિંગ અને નવા બુકિંગ વચ્ચે ઓછામાં ઓછો ૨૫ દિવસનો સમયગાળો હોવો અનિવાર્ય છે; તમે માત્ર ૧૦ થી ૧૫ દિવસના ટૂંકા ગાળામાં બીજું સિલિન્ડર બુક કરાવી શકતા નથી.
આ ઉપરાંત, સરકારી નિયમો મુજબ ગેસ સબસીડી અને સીમલેસ સપ્લાય મેળવવા માટે ઇ-કેવાયસી (e-KYC) ની પ્રક્રિયા પૂરી કરવી તેમજ બેંક ખાતા સાથે લિંકિંગ સુનિશ્ચિત કરવું જરૂરી છે. જ્યારે ડિલિવરી બોય સિલિન્ડર લઈને ઘરે આવે ત્યારે તેને સાચો ડિલિવરી ઓથેન્ટિકેશન કોડ (DAC Code) આપવો જરૂરી છે.
એજન્સીઓના સર્વર પર સવારે ૧૦ થી સાંજના ૬ વાગ્યા સુધી ઓનલાઈન ટ્રાફિક વધુ રહેતો હોવાથી બુકિંગમાં વિલંબ ટાળવા માટે ગ્રાહકોને સાંજના સમયે કે રાત્રિના સમયે ઓનલાઈન બુકિંગ કરવાની સલાહ આપવામાં આવે છે.
