મરલિન મુનરોની ક્લાસિક મર્સિડીઝની થશે હરાજી: ₹2 કરોડથી વધુ બોલી લાગવાની શક્યતા, ડેશબોર્ડ પર છે ખાસ નિશાની
હોલિવૂડની એવરગ્રીન અભિનેત્રી અને સુંદરતાનો પર્યાય ગણાતી મરલિન મુનરો ભલે આજે આપણી વચ્ચે નથી, પણ તેમની સાથે જોડાયેલી વસ્તુઓ આજે પણ લાખો-કરોડોમાં વેચાય છે. તાજેતરમાં સમાચાર આવ્યા છે કે, 1950ના દાયકામાં મરલિન મુનરો જે મર્સિડીઝ કારમાં યુરોપના રસ્તાઓ પર ફરતી હતી, તે કાર હવે હરાજી માટે તૈયાર છે. આ વિન્ટેજ કારની કિંમત અંદાજે ₹1.80 કરોડથી ₹2 કરોડ સુધી પહોંચી શકે છે.
ડેશબોર્ડ પર કોતરાયેલું છે ‘MM’ મોનોગ્રામ
આ કારની સૌથી મોટી ખાસિયત તેનું ડેશબોર્ડ છે. કારના વર્તમાન માલિક જ્યારે આ કારનું રિપેરિંગ કરાવી રહ્યા હતા, ત્યારે તેમને અખરોટના લાકડામાંથી બનેલા ડેશબોર્ડ પર એક ખાસ સોનેરી પ્લેટ મળી આવી હતી. આ પ્લેટ પર ‘MM’ અક્ષરો કોતરાયેલા છે, જે મરલિન મુનરો (Marilyn Monroe) ના નામના આદ્યક્ષરો છે. આ નિશાની જ સાબિતી આપે છે કે આ કાર કોઈ સામાન્ય વ્યક્તિની નહીં પણ ખુદ મરલિન મુનરોની હતી.
ઐતિહાસિક દસ્તાવેજો અને મરલિનના હસ્તાક્ષર
સંશોધન દરમિયાન જાણવા મળ્યું છે કે, વર્ષ 1956માં જ્યારે મરલિન મુનરો ગ્રીસના પ્રવાસે હતી, ત્યારે તેઓ પોતાની અંગત મુસાફરી માટે આ મર્સિડીઝ-બેન્ઝ 170 S (W136) નો ઉપયોગ કરતી હતી. આશ્ચર્યની વાત એ છે કે, આ કારની સાથે તે સમયના વીમા (Insurance) પેપર્સ પણ ઉપલબ્ધ છે, જેના પર મરલિન મુનરોએ પોતે સહી કરેલી છે. આ દસ્તાવેજો 1956ના સમયગાળાના છે, જે મરલિનની યુરોપ યાત્રા સાથે સંપૂર્ણપણે મેચ થાય છે.
કારની ખાસિયતો અને કાયાપલટ
- એન્જિન: આ ક્લાસિક કારમાં 1.7 લિટરનું એન્જિન છે, જે 52 bhp પાવર જનરેટ કરે છે.
- રીસ્ટોરેશન: હરાજી પહેલા ‘Brookfield Classic Cars’ દ્વારા આ કારની કાયાપલટ કરવામાં આવી છે. તેના દરેક સ્પેરપાર્ટસ ઓરિજિનલ સપ્લાયર્સ પાસેથી મેળવીને તેને ફરીથી નવી જેવી બનાવવામાં આવી છે.
- VIP સ્ટેટસ: જૂના રેકોર્ડ્સ મુજબ, આ કારને તે સમયે ‘સ્પેશિયલ કેટેગરી’માં રાખવામાં આવી હતી, જે દરજ્જો માત્ર VIP વ્યક્તિઓને જ આપવામાં આવતો હતો.
મરલિનની છેલ્લી સફર અને રહસ્યમય મોત
યુરોપની સફર બાદ મરલિન અમેરિકા પરત ફરી હતી અને નાટ્યકાર આર્થર મિલર સાથે લગ્ન કર્યા હતા. કમનસીબે, માત્ર 36 વર્ષની વયે 1962માં લોસ એન્જલસ સ્થિત તેમના ઘરેથી તેમનો મૃતદેહ મળી આવ્યો હતો. આજે પણ તેમની મોત પાછળ અનેક રહસ્યમય વાતો વહેતી થાય છે.
ક્યારે અને ક્યાં થશે હરાજી?
આ ઐતિહાસિક મર્સિડીઝની હરાજી 16 મે ના રોજ ‘Iconic Auctioneers’ દ્વારા કરવામાં આવશે. આ ઇવેન્ટ નોર્થમ્પ્ટનશાયરના Sywell Aerodrome પર યોજાનારા ‘Supercar Fest’ દરમિયાન યોજાશે. વિન્ટેજ કારના શોખીનો અને મરલિનના ચાહકો માટે આ કાર ખરીદવી એ કોઈ સપનાથી ઓછું નથી.
