મારુતિ Fronx નવા અવતારમાં આવશે: 35 કિમીની માઇલેજ અને ADAS ફીચર્સ સાથે ટાટા પંચને આપશે ટક્કર
મારુતિ સુઝુકી ફ્રોન્ક્સ તેના એસયુવી જેવા લુક, શાનદાર ફીચર્સ અને પરવડે તેવી કિંમતને કારણે ગ્રાહકોની પહેલી પસંદ બની ગઈ છે. જોકે, અત્યાર સુધી તેમાં માત્ર નાના ફેરફારો જ કરવામાં આવ્યા હતા, પરંતુ વર્ષ 2026 અને 2027 વચ્ચે આ કારમાં ત્રણ મોટા ટેકનિકલ અપડેટ્સ જોવા મળશે. કંપની આ મોડલને ફ્લેક્સ-ફ્યુઅલ, સ્ટ્રોન્ગ હાઇબ્રિડ અને એડવાન્સ સેફ્ટી ફીચર્સ સાથે લોન્ચ કરવાની યોજના બનાવી રહી છે.
Fronx હાઇબ્રિડ: દેશની સૌથી વધુ માઇલેજ આપતી SUV?
ફ્રોન્ક્સ મારુતિ સુઝુકીની એવી પહેલી કાર હશે જેમાં કંપનીની પોતાની ‘સ્ટ્રોન્ગ હાઇબ્રિડ’ સિસ્ટમ જોવા મળશે. આ સિસ્ટમમાં 1.2 લિટરનું Z-સીરીઝ પેટ્રોલ એન્જિન હશે, જે જનરેટર તરીકે કામ કરશે અને ઇલેક્ટ્રિક મોટર ગાડીને પાવર આપશે. રિપોર્ટ્સ મુજબ, આ ટેકનોલોજીની મદદથી કાર 35 કિમી/લિટરની જબરદસ્ત માઇલેજ આપી શકે છે. જો આવું થશે, તો તે ભારતીય બજારની સૌથી વધુ માઇલેજ આપતી એસયુવી બની જશે.
ADAS ફીચર્સ સાથે સૌથી સુરક્ષિત મારુતિ કાર
નવી ફ્રોન્ક્સને ટેસ્ટિંગ દરમિયાન અનેકવાર LiDAR સેન્સર સાથે જોવામાં આવી છે, જે સૂચવે છે કે તેમાં ADAS (Advanced Driver Assistance Systems) ફીચર્સ મળશે. આ મારુતિની સૌથી સસ્તી કાર હોઈ શકે છે જે એડેપ્ટિવ ક્રૂઝ કંટ્રોલ, લેન કીપ આસિસ્ટ, બ્લાઈન્ડ સ્પોટ મોનિટરિંગ અને ઓટોમેટિક ઈમરજન્સી બ્રેકિંગ જેવા હાઈ-ટેક સેફ્ટી ફીચર્સથી સજ્જ હશે.
ફ્લેક્સ-ફ્યુઅલ વેરિઅન્ટ અને અન્ય ફેરફારો
પર્યાવરણને અનુકૂળ વિકલ્પ તરીકે મારુતિ 2026માં ફ્રોન્ક્સનું ફ્લેક્સ-ફ્યુઅલ વર્ઝન પણ લોન્ચ કરી શકે છે. આ મોડલમાં ન્યૂનતમ કોસ્મેટિક ફેરફારો જેમ કે નવા બોડી ગ્રાફિક્સ જોવા મળી શકે છે. જોકે, તેના એન્જિન સ્પેસિફિકેશન વિશે હજુ સત્તાવાર જાહેરાત બાકી છે. આ ઉપરાંત, કારના ઇન્ટિરિયરમાં પણ નવી ડિઝાઇન અને વધુ પ્રીમિયમ મટિરિયલનો ઉપયોગ કરવામાં આવે તેવી શક્યતા છે.
મારુતિના આ ત્રણેય અપડેટ્સ તેને માર્કેટમાં વધુ મજબૂત બનાવશે, ખાસ કરીને વધતી જતી ઈંધણની કિંમતો વચ્ચે 35 કિમીની માઇલેજ ગ્રાહકો માટે મોટું આકર્ષણ બની રહેશે.
