એક તરફ વિઝા કૌભાંડની સખત તપાસ, તો બીજી તરફ વ્હાઇટ હાઉસમાં ભારતીય ગૌરવ: જાણો સમગ્ર મામલો
અમેરિકાના રાજકારણ અને ટેકનોલોજી જગતમાંથી એક ખૂબ જ રસપ્રદ અને વિરોધાભાસી સમાચાર સામે આવ્યા છે. યુએસ વહીવટીતંત્ર દ્વારા ઇમિગ્રેશન મામલે કડક વલણ અપનાવવામાં આવ્યું છે, જેની સીધી અસર માઇક્રોસોફ્ટ જેવી દિગ્ગજ ટેક કંપની પર પડી છે. પર્મેનન્ટ લેબર સર્ટિફિકેશન પ્રોગ્રામમાંથી સસ્પેન્ડ થવા છતાં, માઇક્રોસોફ્ટે આ મામલે પોતાનો પક્ષ સ્પષ્ટ કર્યો છે. બીજી બાજુ, અમેરિકી રાષ્ટ્રપતિ ડાનાલ્ડ ટ્રમ્પે વ્હાઇટ હાઉસ ખાતે માઇક્રોસોફ્ટના ભારતીય મૂળના સીઈઓ સત્યા નડેલાને ‘નેશનલ મેડલ ઓફ ટેકનોલોજી એન્ડ ઇનોવેશન’થી સન્માનિત કર્યા છે.
માઇક્રોસોફ્ટનો પક્ષ: અમેરિકી કર્મચારીઓની તાકાતમાં વિશ્વાસ
કંપની પર સવાલો ઉઠ્યા બાદ માઇક્રોસોફ્ટે સત્તાવાર નિવેદન જારી કરીને જણાવ્યું છે કે તેઓ અમેરિકી કર્મચારીઓની ક્ષમતા અને પ્રતિભામાં પૂરો વિશ્વાસ ધરાવે છે. કંપનીએ સ્પષ્ટતા કરી છે કે યુએસમાં તેના મોટાભાગના કર્મચારીઓ અમેરિકી જ છે.
માઇક્રોસોફ્ટે જણાવ્યું હતું કે, “અમે વહીવટીતંત્રને વધારાની માહિતી પૂરી પાડવા માટે તૈયાર છીએ. ઉદાહરણ તરીકે, છેલ્લા નાણાકીય વર્ષમાં અમે લગભગ 6,000 H-1B વિઝા અરજીઓ સબમિટ કરી હતી, જેમાંથી 80 ટકા અરજીઓ હાલના માઇક્રોસોફ્ટ કર્મચારીઓના સ્ટેટસને લંબાવવા કે બદલવા માટે હતી, કોઈ નવા લોકોની ભરતી કરવા માટે નહીં.” કંપનીએ ઉમેર્યું કે બાકીની H-1B અરજીઓ એવા કર્મચારીઓ માટે હતી જેઓ પહેલેથી જ કાયદેસર રીતે અમેરિકામાં હાજર હતા અને કંપનીમાં જોડાયા હતા. આ કર્મચારીઓ યુએસ કર્મચારીઓના માત્ર એક ટાકા જેટલા જ છે.
વિઝાના કડક નિયમો અને પગાર અંગે સ્પષ્ટતા
માઇક્રોસોફ્ટે એવા આક્ષેપોને નકારી કાઢ્યા છે કે તેના વિદેશી કામદારોને અન્ય કર્મચારીઓ કરતા ઓછા પૈસા ચૂકવવામાં આવે છે. કંપનીએ દાવો કર્યો છે કે તેઓ ટેક સેક્ટરમાં સૌથી વધુ વેતન આપે છે અને H-1B કર્મચારીઓને પણ અન્ય કર્મચારીઓની જેમ સમાન કામ માટે સરખો પગાર આપવામાં આવે છે. માઇક્રોસોફ્ટ વિશ્વની શ્રેષ્ઠ ટેકનોલોજી વર્કફોર્સ તૈયાર કરીને વૈશ્વિક સ્તરે સફળતા હાંસલ કરી રહી છે અને દેશની ટેલેન્ટ પાઇપલાઇનને મજબૂત બનાવી રહી છે.
ટ્રમ્પ દ્વારા સત્યા નડેલાનું ભવ્ય સન્માન
એક તરફ સરકાર ઇમિગ્રેશન અને વિઝા નિયમોને લઈને કડક કાર્યવાહી કરી રહી છે, તો બીજી તરફ વ્હાઇટ હાઉસમાં યોજાયેલી ‘સાયન્સ: અ ન્યૂ ગોલ્ડન એજ સમિટ’ દરમિયાન રાષ્ટ્રપતિ ડોનાલ્ડ ટ્રમ્પે માઇક્રોસોફ્ટના સીઈઓ સત્યા નડેલાના કામની ભરપૂર પ્રશંસા કરી હતી. ટ્રમ્પે માઇક્રોસોફ્ટ અને તેના ક્લાઉડ કમ્પ્યુટિંગ બિઝનેસને બદલવામાં નડેલાની ભૂમિકાને બિરદાવી હતી.
ટ્રમ્પે જણાવ્યું કે, “છેલ્લા ત્રણ દાયકાથી વધુ સમયથી સત્યા નડેલા માઇક્રોસોફ્ટના પરિવર્તનમાં મુખ્ય વ્યક્તિ રહ્યા છે. તેમણે કંપનીમાં ક્રાંતિ લાવી છે અને વિશ્વભરના વ્યવસાયો, વિદ્યાર્થીઓ અને ગ્રાહકોને સશક્ત બનાવ્યા છે.” વ્હાઇટ હાઉસ ઓફિસ ઓફ સાઇન્સ એન્ડ ટેકનોલોજી પોલિસી (OSTP) ના ડિરેક્ટર માઈકલ ક્રાટસિયોએ એવોર્ડની જાહેરાત કરતા નડેલાને ક્લાઉડ કમ્પ્યુટિંગ અને અમેરિકી સુપરઈન્ટેલિજન્સના પ્રશિક્ષણ અને વૈશ્વિક જમાવટ માટે સન્માનિત કર્યા હતા.
એચ-1બી (H-1B) વિઝા અને શ્રમ પ્રમાણપત્ર પર સરકારી કાર્યવાહી
માઇક્રોસોફ્ટનું આ નિવેદન ટ્રમ્પ વહીવટીતંત્ર દ્વારા H-1B વિઝા પ્રોગ્રામ અને પર્મેનન્ટ લેબર સર્ટિફિકેશન સામે લેવાયેલા કડક પગલાંની પૃષ્ઠભૂમિમાં આવ્યું છે. યુએસ લેબર સેક્રેટરી કીથ સોન્ડરલિંગે સક્રિય ફેડરલ તપાસોને ટાંકીને માઇક્રોસોફ્ટ, એડોબ (Adobe) તેમજ કૉગ્નિજન્ટ, ઇન્ફોસિસ, ટાટા, વિપ્રો, એચસીએલ અને કેપજેમિની જેવી મોટી આઈટી આઉટસોર્સિંગ કંપનીઓને પર્મેનન્ટ લેબર સર્ટિફિકેશન પ્રોગ્રામમાંથી સસ્પેન્ડ કરવાની જાહેરાત કરી છે.
વિઝા ફ્રોડ વિરુદ્ધની પ્રેસ કોન્ફરન્સમાં બોલતા યુએસ વાઇસ પ્રેસિડેન્ટ જેડી વાન્સે (JD Vance) આરોપ લગાવ્યો હતો કે માઇક્રોસોફ્ટે હજારો H-1B વિઝા અને ગ્રીન કાર્ડનો લાભ મેળવતી વખતે અમેરિકી કર્મચારીઓને નોકરીમાંથી કાઢી મૂક્યા છે. વાન્સે દાવો કર્યો કે ગયા વર્ષે માઇક્રોસોફ્ટે 6,000 અમેરિકી કર્મચારીઓને છૂટા કર્યા હતા, જ્યારે સામે પક્ષે 6,300 H-1B વિઝા અને લગભગ 3,000 ગ્રીન કાર્ડનો ફાયદો મેળવ્યો હતો.
વ્યાપક ઇમિગ્રેશન ક્રેકડાઉન અને યુનિવર્સિટીઓની તપાસ
આ વ્યાપક ઇમિગ્રેશન ક્રેકડાઉનના ભાગરૂપે, યુએસ ડિપાર્ટમેન્ટ ઓફ લેબરે હાર્વર્ડ, યેલ, સ્ટેનફોર્ડ અને એમઆઈટી (MIT) સહિતની નવ મોટી અમેરિકી યુનિવર્સિટીઓમાં કથિત J-1 વિઝા ફ્રોડની તપાસ શરૂ કરવાની જાહેરાત પણ કરી છે. પ્રશાસનનો દાવો છે કે J-1 વિઝાનો ઉપયોગ અમેરિકી સ્નાતક વિદ્યાર્થીઓ અને સંશોધકોના પગારને નીચા લાવવા માટે થઈ રહ્યો છે.
વધુમાં, ડિપાર્ટમેન્ટ ઓફ હોમલેન્ડ સિક્યુરિટી (DHS) દ્વારા F-1 નોન-ઇમિગ્રન્ટ વિદ્યાર્થીઓ માટે વૈકલ્પિક વ્યવહારુ તાલીમ (OPT) અરજીઓ પર 70,000 ડોલરની ફી લાદવાનો પ્રસ્તાવ પણ મૂકવામાં આવ્યો છે. આ તમામ પગલાંનો હેતુ છેતરપિંડી અટકાવવાનો, યુએસમાં સસ્તી મજૂરીનો પ્રવાહ ઘટાડવાનો અને સ્થાનિક અમેરિકી કામદારોનું રક્ષણ કરવાનો છે.
