Milk price protest in Gujarat : દૂધના ભાવ મુદ્દે ત્રીજા દિવસે પણ આંદોલન યથાવત
Milk price protest in Gujarat : અરવલ્લી જિલ્લામાં છેલ્લા ત્રણ દિવસથી પશુપાલકો દૂધના ન્યૂનતમ ભાવે વાજબી વધારો કરવા માટે ઉગ્ર આંદોલન કરી રહ્યા છે. માંગણીઓ ન સંતોષાતા રોષે ભરાયેલા પશુપાલકોએ દૂધ ઢોળીને અને વહીવટી તંત્રની નનામી કાઢીને વિરોધ દર્શાવ્યો હતો.
દૂધ ન ભરાવવાનો નિર્ણય અને વિતરણ પર અસર
આંદોલનના પગલે અરવલ્લી જિલ્લાના તમામ દૂધ મંડળીઓએ દૂધ ભરવાનું બંધ કરી દીધું છે. પરિણામે ડેરીમાં દૂધનો સંગ્રહ અને શહેરી વિસ્તારોમાં વિતરણ અટકી પડ્યું છે.
શહેરી વિસ્તારોમાં પેશ્યુરાઈઝ દૂધની થેલીઓ ઉપલબ્ધ ન હોવાથી, ચા જેવી રોજિંદી જરૂરિયાતો પણ અસરગ્રસ્ત બનવાની શક્યતા છે.
નફાકારક ભાવની જાગૃત માંગ
પશુપાલકોનું કહેવું છે કે તેઓ માત્ર એ જ માંગણી કરી રહ્યા છે કે દૂધના ભાવે 20 થી 25 ટકા નફો મળવો જોઈએ. મહિલાઓ દૂધ ઢોળવાની અનોખી રીતથી વહીવટીતંત્ર સામે તીવ્ર રોષ વ્યક્ત કરી રહી છે.
વહીવટી તંત્રના વિરોધમાં નનામીની સ્મશાનયાત્રા
આંદોલન દરમિયાન ઇસરોલ અને ઉમેદપુર ગામમાં સ્થાનિક મહિલાઓએ સાબરડેરી વહીવટી તંત્રની “નનામી” બનાવી, અંતે તેનું દહન કરી વિરોધ નોંધાવ્યો.
મધ્યમ વર્ગના પશુપાલકો મુશ્કેલીમાં
આંદોલનથી દૂધ વેચાણ બંધ થતા મધ્યમ વર્ગના પશુપાલકોને ગંભીર આર્થિક તકલીફોનો સામનો કરવો પડી રહ્યો છે. દસ-દસ દિવસના પેમેન્ટથી ઘર ચલાવતા અનેક પરિવાર હાલ ચિંતામાં મુકાયા છે.
પોલીસ કાર્યવાહીના વિરોધમાં આંદોલન વધુ ઉગ્ર
હિંમતનગર ડેરી ખાતે થયેલા વિવાદમાં કેટલીક જગ્યાએ પોલીસ ફરિયાદો અને ઘર્ષણ પણ નોંધાયું છે. પશુપાલકોને લાગ્યું છે કે તેઓ સાથે ન્યાય થયો નથી અને એ જ કારણે આંદોલન વધુ ઉગ્ર સ્વરૂપ ધારણ કરે છે.
દૂધના પ્રશ્ને રાજ્યવ્યાપી લડતના સંકેતો
અરવલ્લી અને સાબરકાંઠા નજીકના જિલ્લાઓના હજારો પશુપાલકો આંદોલનમાં જોડાયા છે. જો વહીવટી તંત્ર અને સાબરડેરી દ્વારા માંગણીઓ સ્વીકારવામાં નહીં આવે તો આ આંદોલન આગળ વધીને સમગ્ર ઉત્તર ગુજરાતમાં ફેલાઈ શકે છે.
