દિલ્હી-એનસીઆરમાં ૧૫ વર્ષનો રેકોર્ડ તોડ્યા બાદ ફરી વરસાદની આગાહી: હવામાન વિભાગ દ્વારા યલો એલર્ટ
દેશભરમાં ચોમાસાની સિઝન પૂર્ણપણે સક્રિય થઈ ગઈ છે અને ઉત્તર ભારતથી લઈને દક્ષિણ ભારત સુધી અનેક રાજ્યોમાં વરસાદી માહોલ જામ્યો છે. ભારતીય હવામાન વિભાગ (IMD) દ્વારા આજે, ૧૧ ઓગસ્ટના રોજ દેશના ૧૭થી વધુ રાજ્યો અને કેન્દ્રશાસિત પ્રદેશો માટે વરસાદની ગંભીર ચેતવણી જારી કરવામાં આવી છે. દેશની રાજધાની દિલ્હી-એનસીઆર, ઉત્તર પ્રદેશ, રાજસ્થાન અને હરિયાણા સહિતના પટ્ટામાં સતત વાદળછાયા વાતાવરણ વચ્ચે તૂટક તૂટક વરસાદની શક્યતા વ્યક્ત કરવામાં આવી છે.
હવામાન વૈજ્ઞાનિકોના જણાવ્યા મુજબ, હવામાનમાં આવેલા આ ઝડપી પલટાને કારણે તાપમાનમાં ઘટાડો નોંધાયો છે, જોકે વાતાવરણમાં ભેજનું પ્રમાણ વધુ રહેવાથી બફારાનો અનુભવ પણ થઈ રહ્યો છે.
દિલ્હી-એનસીઆરમાં વરસાદનો સિલસિલો ચાલુ
રાજધાની દિલ્હી અને તેની આસપાસના એનસીઆર વિસ્તારોમાં વરસાદી મોસમ યથાવત છે. ગયા શુક્રવારે દિલ્હીમાં પડેલા ધોધમાર વરસાદે વિતેલા ૧૫ વર્ષનો રેકોર્ડ તોડી નાખ્યો હતો. આ સપ્તાહના અંતે પણ ઝાપટાં ચાલુ રહ્યા હતા. આજે સવારથી જ આકાશ ઘનઘોર વાદળોથી ઘેરાયેલું રહ્યું છે. હવામાન વિભાગના પૂર્વાનુમાન મુજબ, આજથી વરસાદની તીવ્રતામાં વધારો થઈ શકે છે, જેના કારણે દિલ્હી માટે યલો એલર્ટ જારી કરવામાં આવ્યું છે.
આજે દિલ્હીમાં મહત્તમ તાપમાન ૩૩ ડિગ્રી સેલ્સિયસ અને લઘુત્તમ તાપમાન ૨૪ ડિગ્રી સેલ્સિયસની આસપાસ રહેવાની શક્યતા છે, જ્યારે હવામાં ભેજનું પ્રમાણ ૮૫ થી ૯૦ ટકા વચ્ચે રહેશે. દિવસ દરમિયાન સવારથી લઈને બપોર સુધી હળવાથી મધ્યમ વરસાદી ઝાપટાં પડી શકે છે, જ્યારે સાંજ સુધીમાં વરસાદની તીવ્રતા થોડી ઓછી થઈને ઝરમર વરસાદમાં ફેરવાઈ જશે. ૧૨ થી ૧૫ ઓગસ્ટ દરમિયાન પણ વાદળછાયું વાતાવરણ રહેવાની સાથે હળવા વરસાદની સંભાવના સેવાઈ રહી છે
મધ્યપ્રદેશ અને ગુજરાતમાં ઓરેન્જ એલર્ટ
બીજી તરફ, મધ્યપ્રદેશ અને ગુજરાતના સરહદી વિસ્તારો માટે હવામાન વિભાગે ઓરેન્જ એલર્ટ જારી કર્યું છે. મધ્યપ્રદેશના ભોપાલ, ઇન્દોર, ઉજ્જૈન, રતલામ, રાજગઢ, રાયસેન, દેવાસ, અગર-માલવા અને સીહોર જેવા જિલ્લાઓમાં ભારે પવન, વાવાઝોડું અને વીજળીના કડાકા-ભડાકા સાથે વરસાદ પડવાની સંભાવના છે.
આ જ વરસાદી સિસ્ટમની અસર હેઠળ ગુજરાતના દાહોદ, છોટાઉદેપુર, પંચમહાલ અને નર્મદા જેવા પૂર્વ-મધ્ય અને આદિવાસી વિસ્તારના જિલ્લાઓમાં પણ ભારે પવન સાથે ગાજવીજ વાળો વરસાદ પડી શકે છે.
ઉત્તર પ્રદેશ, બિહાર અને પહાડી રાજ્યોની સ્થિતિ
ચોમાસુ સિસ્ટમ સક્રિય હોવાને કારણે ઉત્તર પ્રદેશના પૂર્વ અને પશ્ચિમ બંને ભાગોમાં મેઘમહેર ચાલુ છે. પૂર્વી ઉત્તર પ્રદેશના કેટલાક જિલ્લાઓમાં આજે મધ્યમથી ભારે વરસાદની શક્યતા દર્શાવાઈ છે. બિહારમાં પણ આજે સાર્વત્રિક વરસાદની આગાહી કરવામાં આવી છે, અને ૧૩ થી ૧૫ ઓગસ્ટ દરમિયાન રાજ્યમાં ચોમાસું વધુ મજબૂત બનીને વ્યાપક વરસાદ લાવશે તેવી ગણતરી છે.
આ ઉપરાંત, પહાડી રાજ્યો જેવા કે ઉત્તરાખંડ અને હિમાચલ પ્રદેશમાં અતિભારે વરસાદની ચેતવણી આપવામાં આવી છે. પહાડી વિસ્તારોમાં ભૂસ્ખલનની શક્યતાને ધ્યાનમાં રાખીને સ્થાનિક તંત્રને એલર્ટ રહેવા જણાવાયું છે. દક્ષિણ ભારતમાં કેરળ, કર્ણાટક અને લક્ષદ્વીપમાં પણ ભારેથી અતિભારે વરસાદી સ્પેલ આવવાની શક્યતા છે. પૂર્વોત્તર ભારતના અરૂણાચલ પ્રદેશ, આસામ, મેઘાલય, નાગાલેન્ડ, મણિપુર, મિઝોરમ અને ત્રિપુરામાં પણ આગામી કેટલાક દિવસો સુધી વરસાદી માહોલ જળવાઈ રહેશે.
