મુંબઈ ઈન્ડિયન્સે ખતમ કર્યો 4742 દિવસનો લાંબો વનવાસ: IPL ઈતિહાસમાં આવું કરનારી બની પહેલી ટીમ
આઈપીએલ 2026 (IPL 2026) ની શરૂઆત મુંબઈ ઈન્ડિયન્સ માટે કોઈ સપનાથી ઓછી રહી નથી. કોલકાતા નાઈટ રાઈડર્સ (KKR) સામે રમાયેલી મેચમાં મુંબઈએ 6 વિકેટે શાનદાર જીત મેળવીને માત્ર સિઝનનો વિજયી પ્રારંભ જ નથી કર્યો, પરંતુ છેલ્લા 14 વર્ષથી ચાલી આવતી એક ‘પનોતી’ પણ દૂર કરી છે. મુંબઈ ઈન્ડિયન્સ આઈપીએલના ઈતિહાસમાં સતત 14 વર્ષ પછી પોતાની સિઝનની પહેલી મેચ જીતવામાં સફળ રહી છે. આ જીત સાથે જ વાનખેડે સ્ટેડિયમમાં મુંબઈના ચાહકોમાં ભારે ઉત્સાહ જોવા મળ્યો હતો.
રોહિત શર્મા અને રિકલ્ટનનું તોફાન: 221 રનનો ટાર્ગેટ પણ પડ્યો નાનો
કેકેઆર સામેની આ મેચમાં મુંબઈ ઈન્ડિયન્સને જીતવા માટે 20 ઓવરમાં 221 રનનો વિશાળ ટાર્ગેટ મળ્યો હતો. મુંબઈના બેટ્સમેનોએ શરૂઆતથી જ આક્રમક વલણ અપનાવ્યું અને માત્ર 19.1 ઓવરમાં 4 વિકેટ ગુમાવીને આ લક્ષ્યાંક હાસલ કરી લીધો હતો. આ જીતના મુખ્ય હીરો રોહિત શર્મા અને રેયાન રિકલ્ટન રહ્યા હતા.
- રોહિત શર્મા: હિટમેને માત્ર 78 રનની આક્રમક ઈનિંગ રમીને પાયો નાખ્યો.
- રેયાન રિકલ્ટન: તેણે શાનદાર 81 રન ફટકારીને ટીમને જીતની નજીક પહોંચાડી હતી.
મુંબઈ ઈન્ડિયન્સ માટે આ આઈપીએલ ઈતિહાસનો અત્યાર સુધીનો સૌથી મોટો ‘સફળ રન ચેઝ’ છે. અગાઉ 2021માં તેમણે ચેન્નાઈ સુપર કિંગ્સ સામે 219 રનનો ટાર્ગેટ ચેઝ કર્યો હતો.
કેકેઆર સામે 25મી જીત: આઈપીએલનો અનોખો રેકોર્ડ
આ મેચ જીતવાની સાથે જ મુંબઈ ઈન્ડિયન્સ આઈપીએલની એવી પહેલી ટીમ બની ગઈ છે જેણે કોઈ એક જ ટીમ સામે 25 મેચ જીતી હોય. કેકેઆર સામે મુંબઈનો રેકોર્ડ હંમેશા દબદબાભર્યો રહ્યો છે, જે આ મેચમાં પણ જોવા મળ્યો. આ સિવાય વાનખેડે સ્ટેડિયમમાં પણ કેકેઆર સામે મુંબઈનો રેકોર્ડ બેજોડ છે, જ્યાં તેમણે 13 મેચમાંથી 11મી વાર જીત મેળવી છે. મુંબઈ હવે આઈપીએલમાં સૌથી વધુ વખત 200 કે તેથી વધુ રનનો ટાર્ગેટ ચેઝ કરનારી બીજી ટીમ બની ગઈ છે (6 વખત), જેમાં તે પંજાબ કિંગ્સ (8 વખત) થી જ પાછળ છે.
વાનખેડે સ્ટેડિયમમાં નવો ઈતિહાસ
વાનખેડે સ્ટેડિયમમાં પણ આ આઈપીએલના ઈતિહાસનો સૌથી મોટો સફળ રન ચેઝ બની ગયો છે. અગાઉ વર્ષ 2013માં મુંબઈ ઈન્ડિયન્સે રાજસ્થાન રોયલ્સ સામે 213 રનનો ટાર્ગેટ હાસલ કર્યો હતો, જેને આજે તેમણે પાછળ છોડી દીધો છે. આ જીતથી મુંબઈ ઈન્ડિયન્સના ખેલાડીઓનો આત્મવિશ્વાસ સાતમા આસમાને છે, કારણ કે વર્ષો પછી તેઓએ સિઝનની પ્રથમ મેચમાં વિજયનો સ્વાદ ચાખ્યો છે.
