નદીકાંઠા વિસ્તારના ગ્રામજનોને સૂચનાઓ અપાઈ
સરદાર સરોવર નર્મદા ડેમમાં ઉપરવાસથી ભારે પાણીને કારણે ડેમની સપાટી 133 મીટરને વટાવી ગઈ છે. જેના પગલે તંત્રએ ડેમના કુલ 23 દરવાજા ખોલવાનો નિર્ણય લીધો છે અને અંદાજે 4.36 લાખ ક્યુસેક પાણી નર્મદા નદીમાં છોડવામાં આવશે. આ પગલાને લઈને ભરૂચ જિલ્લામાં તંત્ર દ્વારા ચેતવણી જાહેર કરવામાં આવી છે.
ગોલ્ડન બ્રિજ નજીક નદી બે કાંઠે વહેવાની શકયતા, વહીવટ તંત્ર ચિંતામાં
ભરૂચ જિલ્લાના ગોલ્ડન બ્રિજ નજીક નર્મદા નદીનું સ્તર ઝડપથી વધી રહ્યું છે. તંત્રએ આગાહી કરી છે કે પાણીનું સ્તર 22 ફૂટના ચેતવણી સ્તરને વટાવી શકે છે. જેને ધ્યાનમાં લઈ વહીવટી તંત્ર સંપૂર્ણ એલર્ટ સ્થિતિમાં છે અને તાત્કાલિક પગલાં માટે તૈયાર છે.
કાંઠાના ગામોમાં એલર્ટ, માછીમારોને નદીમાંથી દૂર રહેવા સૂચના
ભરૂચ જિલ્લાના તટવિસ્તારના ગામોમાં લોકો માટે એલર્ટ જાહેર કરવામાં આવ્યું છે. નદીકાંઠા વિસ્તારમાં રહેતા લોકોને નદીથી દૂર રહેવા અને જરૂર પડે તો સલામત સ્થળે સ્થળાંતર કરવા સૂચના આપવામાં આવી છે. સાથે જ માછીમારોને નદીમાં પ્રવેશ પર પ્રતિબંધ ફરમાવ્યો છે.
કલેકટરે આપ્યો તાકીદનો નિર્દેશ, સ્થાનિક વસ્તીને ચેતવણી આપવાનો આગ્રહ
ભરૂચના જિલ્લા કલેકટરે અધિકારીઓને પત્ર લખીને તાકીદ કરી છે કે, પાણીના સ્તરમાં ઝડપથી વધારો થવાની શક્યતા છે અને તેથી નદીકાંઠા વિસ્તારમાં રહેતા લોકો સુધી ચેતવણી અને જરૂરી સહાય પહોંચી જવી જોઈએ. તેમજ સ્થળાંતરની શક્યતા માટે વહેલા આયોજન કરવા પણ સૂચના અપાઈ છે.
હાલતને લઈને તંત્ર સતત નજરમાં, પરિસ્થિતિ બદલાય તેવી સંભાવના
હવે સુધીની માહિતી અનુસાર નર્મદા ડેમમાંથી કુલ 4,36,000 ક્યુસેક પાણી છોડવામાં આવશે. જેનાથી નદીકાંઠે વસવાટ કરતા લોકોને તાત્કાલિક અસર થવાની શક્યતા છે. તેથી તંત્ર અને બચાવ પક્ષ સતત સ્થિતિ પર નજર રાખી રહી છે.
