‘Operation Sindoor’ પછી કરતારપુર કોરિડોર બંધ, શ્રદ્ધાળુઓનાં પાકિસ્તાન જવા પર પ્રતિબંધ
Operation Sindoor પંજાબના ગુરદાસપુર જિલ્લામાં ડેરા બાબા નાનક ખાતે કરતારપુર કોરિડોર બુધવારે આખા દિવસ માટે બંધ રહ્યો હતો. એક વરિષ્ઠ અધિકારીએ જણાવ્યું હતું કે પાકિસ્તાન અને પાકિસ્તાન અધિકૃત કાશ્મીર (POK) માં નવ આતંકવાદી ઠેકાણાઓ પર ભારત દ્વારા મિસાઇલ હુમલા બાદ આ નિર્ણય લેવામાં આવ્યો છે. મળતી માહિતી મુજબ, બુધવારે કરતારપુર કોરિડોર દ્વારા પાકિસ્તાનમાં દરબાર સાહિબ ગુરુદ્વારાની મુસાફરી પર પ્રતિબંધ રહેશે.
ગુરુ નાનક દેવજીના પવિત્ર સ્થળ પર દર્શન કરવા માટે બુધવારે સવારે મોટી સંખ્યામાં ભક્તો ડેરા બાબા નાનક પહોંચ્યા હતા. પરંતુ સુરક્ષાના કારણોસર, ભક્તોને દરબાર સાહિબ જવાની મંજૂરી આપવામાં આવી ન હતી.
કરતારપુર કોરિડોર ભારતના પંજાબમાં ડેરા બાબા નાનક ધર્મસ્થળને પાકિસ્તાનમાં દરબાર સાહિબ ધર્મસ્થળ સાથે જોડે છે. આ એ જ સ્થાન છે જ્યાં શીખ ધર્મના સ્થાપક ગુરુ નાનક દેવજીએ તેમના જીવનના છેલ્લા વર્ષો વિતાવ્યા હતા. ગુરુ નાનક દેવજીની ૫૫૦મી જન્મજયંતિ નિમિત્તે ૯ નવેમ્બર ૨૦૧૯ના રોજ આ કોરિડોરનું ઉદ્ઘાટન કરવામાં આવ્યું હતું.
આ કોરિડોર સમગ્ર વર્ષ દરમિયાન તમામ ધર્મોના ભારતીય યાત્રાળુઓને વિઝા-મુક્ત મુસાફરીની મંજૂરી આપે છે. ભારત અને પાકિસ્તાન વચ્ચે થયેલા કરાર મુજબ, દરરોજ 5,000 શ્રદ્ધાળુઓ કરતારપુર સાહિબના દર્શન કરી શકે છે.
ઉલ્લેખનીય છે કે ભારતીય સશસ્ત્ર દળોએ ‘ઓપરેશન સિંદૂર’ હેઠળ આતંકવાદી ઠેકાણાઓ પર હુમલો કર્યો હતો. આમાં બહાવલપુરમાં જૈશ-એ-મોહમ્મદનો ગઢ અને મુરીદકેમાં લશ્કર-એ-તૈયબાનું મુખ્ય મથક શામેલ છે. આ કાર્યવાહી 22 એપ્રિલે કાશ્મીરના પહેલગામમાં થયેલા આતંકવાદી હુમલાના જવાબમાં કરવામાં આવી હતી, જેમાં 26 લોકોએ જીવ ગુમાવ્યા હતા. ‘ઓપરેશન સિંદૂર’ હેઠળ લશ્કરી કાર્યવાહી બાદ સરહદી વિસ્તારોમાં તકેદારી વધારી દેવામાં આવી છે.
