UP Madrasa Act : યુપી મદરસા એક્ટને સુપ્રીમ કોર્ટે આપી માન્યતા, HCનો ફેંસલો ફેરવ્યો, યોગી સરકારને ઝટકો
UP Madrasa Act સુપ્રીમ કોર્ટે અલ્હાબાદ હાઈકોર્ટના એ ફેંસલાને રદ્દ કરી દીધો છે, જેમાં મદરેસા એક્ટને ગેરબંધારણીય જાહેર કરવામાં આવ્યો હતો. આ ફેંસલો ઉત્તર પ્રદેશની મદરેસાઓમાં ભણતા લાખો વિદ્યાર્થીઓ અને શિક્ષકોને રાહત તરીકે આવ્યો છે, કારણ કે તેનાથી મદરેસાઓની માન્યતા અને સંચાલન પર પ્રશ્નો ઉભા થયા હતા. અલ્હાબાદ હાઈકોર્ટે મદરેસા એક્ટને બંધારણની કલમ 14 (સમાનતાનો અધિકાર)નું ઉલ્લંઘન માનીને તેને ગેરબંધારણીય જાહેર કરી દીધો હતો, પરંતુ સુપ્રીમ કોર્ટના આ નિર્ણય બાદ હવે મદરેસાનું સંચાલન પહેલાની જેમ જ ચાલુ રહી શકશે.
યુપી મદરેસા એક્ટને માન્યતા મળી
UP Madrasa Act સુપ્રીમ કોર્ટના ચીફ જસ્ટિસ ડીવાય ચંદ્રચુડ, જસ્ટિસ જેબી પારડીવાલા અને જસ્ટિસ મનોજ મિશ્રાની બેંચે અલ્હાબાદ હાઈકોર્ટના નિર્ણયને રદ્દ કરીને મદરેસા એક્ટને બંધારણીય જાહેર કર્યો છે. બેન્ચે કહ્યું કે હાઈકોર્ટનો ફેંસલો યોગ્ય નથી અને મદરેસા એક્ટ ભારતીય બંધારણ અનુસાર છે. આ ચૂકાદા હેઠળ ઉત્તર પ્રદેશની મદરેસાઓમાં શિક્ષણ આપવાની પ્રક્રિયા ચાલુ રહેશે અને તેમની માન્યતા પણ સુરક્ષિત રહેશે.
હાઈકોર્ટનો ચૂકાદો પલટાયો
સુપ્રીમ કોર્ટે સ્પષ્ટ કર્યું કે મદરેસા એક્ટ બંધારણની કલમ 14 હેઠળ સમાનતાના અધિકારનું ઉલ્લંઘન કરતું નથી. આ નિર્ણયથી મદરેસાઓમાં ભણતા વિદ્યાર્થીઓ અને શિક્ષકોને મોટી રાહત મળી છે અને આ ચૂકાદો મદરેસા શિક્ષણની બંધારણીય સુરક્ષાને પણ મજબૂત બનાવે છે.
17 લાખ વિદ્યાર્થીઓને રાહત
સુપ્રીમ કોર્ટના આ ચૂકાદાથી ઉત્તર પ્રદેશની લગભગ 16,513 માન્યતા પ્રાપ્ત મદરેસાઓને મોટી રાહત મળી છે. હવે આ મદરેસાઓ એ જ રીતે ચાલતી રહેશે અને તેમની માન્યતા પર કોઈ ખતરો રહેશે નહીં. ઉત્તર પ્રદેશમાં કુલ 23,500 મદરેસા છે, જેમાંથી 16,513 મદરેસાઓ નોંધાયેલા અને માન્ય છે. તેમાંથી 560 મદરેસા એવા છે કે જેઓ સરકાર તરફથી નાણાકીય સહાયતા મેળવે છે. આ સિવાય લગભગ 8,000 મદરેસાઓ એવા છે કે જેમને માન્યતા નથી અને તેઓ કોઈપણ સરકારી માન્યતા વગર ચાલે છે.
