નેપાળમાં પૂજાતી ઘણી છોકરીઓમાં કુમારી સૌથી ખાસ હોય છે અને તેમની ઘણા લોકો પૂજા કરે છે. જાણો કેવું હોય છે તેમનું જીવન
ભારતના પડોશી દેશ નેપાળમાં મંગળવાર, 30 સપ્ટેમ્બરના રોજ નવી કુમારી દેવીને સંપૂર્ણ વિધિ-વિધાન સાથે પસંદ કરીને તેમને સિંહાસન પર બેસાડવામાં આવ્યા. એક સમારોહમાં પ્રાચીન અનુષ્ઠાન અનુસાર, માત્ર અઢી વર્ષની નાની બાળકી ‘આર્યતારા શાક્ય’નો નેપાળની આ જીવિત દેવી તરીકે અભિષેક કરવામાં આવ્યો. ખરેખર, નેપાળમાં કુમારી પ્રથા ઘણી સદીઓ જૂની છે. કુમારી દેવીને લોકો કાઠમંડુની સંસ્કૃતિનો મહત્વપૂર્ણ ભાગ માને છે. એક નાની, સુંદર અને શાલીન, એવું માનવામાં આવે છે કે જો આવી કુમારીના માત્ર દર્શન પણ કોઈને થઈ જાય તો તે પણ સૌભાગ્ય લઈને આવી શકે છે.
આ પહેલા તૃષ્ણા શાક્ય શાહી કુમારી દેવી હતા. 27 સપ્ટેમ્બર 2017ના રોજ જ્યારે તેમને આ માટે પસંદ કરવામાં આવ્યા હતા ત્યારે તેમની ઉંમર 3 વર્ષ છે.
નેપાળમાં પૂજાતી ઘણી છોકરીઓમાં કુમારી સૌથી ખાસ હોય છે અને તેમની ઘણા લોકો પૂજા કરે છે. જોકે, તે ઘરની અંદર એકાંત અને ગુપ્ત જીવન જીવે છે અને બહુ ઓછી નજર આવે છે. એક જીવિત દેવી તરીકે શાક્ય ખાસ પ્રસંગોએ જ પોતાના ઘરેથી વર્ષમાં 13 વખત બહાર નીકળી શકે છે.
નવી કુમારી દેવીની પસંદગી કેવી રીતે થઈ?
નવી કુમારી દેવીએ પસંદગી પ્રક્રિયા પાસ કરી છે, જેમાં બહાદુરીની પરંપરાગત કસોટી સામેલ હતી. મંગળવાર, 30 સપ્ટેમ્બરના રોજ તેમના પિતા તેમને ઊંચકીને તાલેજુ ભવાની મંદિર લઈ આવ્યા, જ્યાં હજારો લોકો તેમની એક ઝલક મેળવવા માટે કતારમાં ઊભા હતા. પાંચ વરિષ્ઠ બૌદ્ધ વજ્રાચાર્ય, મુખ્ય શાહી પૂજારી, તાલેજુ અને એક શાહી જ્યોતિષી કુમારીની પસંદગીના અનુષ્ઠાનની દેખરેખ કરે છે.
કુમારી દેવી પસંદ કરનારી સમિતિના સભ્ય સંગરત્ના શાક્યએ ન્યૂઝ એજન્સીને જણાવ્યું, “કુલ બાર માપદંડો છે, જેને ઔપચારિક રીતે કુમારીનો અભિષેક કરવા માટે પૂરા કરવાના હોય છે. તે બાર માપદંડો પછી અમે શાક્ય વંશમાં બાળકોના નામ માંગ્યા, જેમાંથી કુમારી બનાવવામાં આવે છે. અમે 12 બહલ (ક્ષેત્રો)ને નોટિસ મોકલી. આવું કુમારી બનવા માટે યોગ્ય બાળકીઓના નામ જમા કરાવવા માટે કરવામાં આવ્યું. જમા કરાયેલા નામોમાંથી, અમે તેમને અલગ તારવ્યા જે માપદંડોને પૂરા કરે છે. કુમારી માટે એક નામની ભલામણ કરવી અમારી ફરજ છે. આ વખતે અમે ત્રણ નામોને અલગ તારવ્યા હતા અને મુખ્ય પસંદગી સમિતિને મોકલ્યા હતા. ભલામણ કરાયેલી બાળકીઓમાં નવી કુમારી- આર્યતારા શાક્ય પણ સામેલ છે. તમામ માપદંડો પૂરા કરવા અને આવશ્યક યોગ્યતાઓ પૂર્ણ કર્યા પછી તેમનો અભિષેક કરવામાં આવી રહ્યો છે.”
કુમારી દેવીની કસોટી
નવી કુમારી દેવીમાં શોધવામાં આવતા કેટલાક ગુણ છે- સારું સ્વાસ્થ્ય, શરીર પર ડાઘ-ધબ્બાનો કોઈ પુરાવો ન હોવો, શરીર ક્યાંય કપાયેલું-ફાટેલું ન હોવું, બેદાગ ત્વચા હોવી, માસિક ધર્મ ન આવ્યો હોય અને દાંત ન ખર્યા હોય.
આ ઉપરાંત બાળકીએ સાહસની કસોટીમાંથી પણ પસાર થવું પડે છે, જ્યાં તેને બલિ ચડાવવામાં આવેલા ભેંસો અને લોહીમાં નાચતા નકાબપોશ લોકોને બતાવવામાં આવે છે. જો તે ડરનું કોઈ લક્ષણ બતાવે છે, તો તેને દેવી તાલેજુનો અવતાર બનવા માટે યોગ્ય ગણવામાં આવતી નથી.
