માતા અને કિશોરીઓને જાગૃત કરી સુપોષિત સમાજ તરફ પગલું
સુરત જિલ્લા પંચાયત ભવન ખાતે જિલ્લા કલેક્ટર ડૉ. સૌરભ પારધીના અધ્યક્ષસ્થાને ‘પોષણ સંગમ તાલીમ કાર્યક્રમ’નું આયોજન કરવામાં આવ્યું હતું. સુરત મહિલા અને બાળ અધિકારીની કચેરી, જિલ્લા ICDS શાખા અને આરોગ્ય વિભાગના સંયુક્ત ઉપક્રમે ‘બેટી બચાઓ, બેટી પઢાઓ’ યોજના અંતર્ગત આ કાર્યક્રમ યોજાયો હતો. જેમાં જિલ્લાના આરોગ્ય અને પોષણ ક્ષેત્રે કાર્યરત અધિકારીઓ અને સંયોજકોને કુપોષણ નાબૂદી માટેના વિશેષ વ્યવસ્થાપન અંગે તાલીમ આપવામાં આવી હતી.
કુપોષણ સામે સામુદાયિક લડત
કલેક્ટરશ્રીએ તીવ્ર કુપોષણ (SAM – Severe Acute Malnutrition) ને કારણે બાળકોના શારીરિક અને માનસિક વિકાસમાં આવતા અવરોધો અંગે ચિંતા વ્યક્ત કરી હતી. તેમણે જણાવ્યું કે, કુપોષણ નાબૂદી માટે માત્ર ખોરાક જ નહીં, પરંતુ માતાઓ અને કિશોરીઓને પોષક આહાર અને આદર્શ જીવનશૈલી વિશે શિક્ષિત કરવી અનિવાર્ય છે. રાજ્ય સરકારના ‘પોષણ સંગમ’ કાર્યક્રમ હેઠળ તાલુકા સ્તરે થતી કામગીરીની સમીક્ષા કરી તેમણે વધુ સક્રિય પ્રયાસો કરવા પ્રોત્સાહન આપ્યું હતું.
૧૦ મુખ્ય મુદ્દાઓ અને ફોલોઅપ પર ભાર
કાર્યક્રમમાં મહિલા અને બાળ અધિકારી રાધિકા ગામીતે તાલીમાર્થીઓને રાજ્ય સરકારની માર્ગદર્શિકા મુજબના ૧૦ મુખ્ય મુદ્દાઓ પર ધ્યાન કેન્દ્રિત કરવા સૂચના આપી હતી. તેમણે ખાસ ભાર મૂક્યો હતો કે કુપોષિત બાળકોની ઓળખ અને સારવાર બાદ પણ નિયત સમય સુધી તેમનું ફોલોઅપ લેવું અત્યંત જરૂરી છે. જો સતત નિરીક્ષણ રાખવામાં આવે તો જ બાળકને ફરીથી કુપોષણની ગર્તામાં ધકેલાતું અટકાવી શકાય છે.
આંગણવાડી અને ગૃહમુલાકાતનું મહત્વ
લાંબા ગાળાના સાર્થક પરિણામો મેળવવા માટે કલેક્ટરશ્રીએ આંગણવાડી વર્કરોને વધુ તાલીમબદ્ધ કરવા અને નાના સમૂહોમાં નિદર્શન તેમજ કાઉન્સેલિંગ કરવા પર ભાર મૂક્યો હતો. સમાજના અંતિમ છેવાડાના માણસ સુધી યોજનાનો લાભ પહોંચે અને સુપોષિત સમાજનું નિર્માણ થાય તેવો દ્રઢ નિર્ધાર આ પ્રસંગે વ્યક્ત કરવામાં આવ્યો હતો. આ કાર્યક્રમમાં જિલ્લા વિકાસ અધિકારી, આરોગ્ય અધિકારીઓ અને ICDS વિભાગના કર્મચારીઓ મોટી સંખ્યામાં ઉપસ્થિત રહ્યા હતા.
