274 તાલિબાની લડવૈયાઓ ઠાર, 22 સૈન્ય મથકો તબાહ; અફઘાન સંઘર્ષ પર પાકિસ્તાનનો મોટો દાવો
સીમા વિવાદ અને આતંકવાદના મુદ્દે પાકિસ્તાન અને અફઘાનિસ્તાન વચ્ચેનો સંઘર્ષ હવે ચરમસીમાએ પહોંચ્યો છે. બંને દેશો વચ્ચેની સરહદી અથડામણ હવે પૂર્ણ કક્ષાના સૈન્ય હુમલામાં ફેરવાઈ ગઈ છે. પાકિસ્તાને અફઘાનિસ્તાનના અનેક ઠેકાણાઓ પર ભીષણ એરસ્ટ્રાઈક કરી છે, જેના જવાબમાં તાલિબાની દળોએ પણ પાકિસ્તાની સૈન્ય ચોકીઓને નિશાન બનાવતા સ્થિતિ અત્યંત ગંભીર બની છે.
પાકિસ્તાને કર્યું ‘યુદ્ધ’નું એલાન!
શુક્રવારે પાકિસ્તાનના સંરક્ષણ મંત્રી ખ્વાજા આસિફે સ્પષ્ટ શબ્દોમાં જાહેરાત કરી હતી કે બંને દેશો હવે ‘ખુલ્લા યુદ્ધ’ની સ્થિતિમાં છે. આ નિવેદન ગુરુવારે રાત્રે અફઘાન તાલિબાન દળો દ્વારા પાકિસ્તાની સૈન્ય ચોકીઓ પર કરવામાં આવેલા હુમલા બાદ આવ્યું છે. વળતો પ્રહાર કરતા પાકિસ્તાને અફઘાનિસ્તાનની રાજધાની કાબુલ સહિત અન્ય મોટા શહેરો પર હવાઈ હુમલા કર્યા છે. આ સંઘર્ષમાં બંને પક્ષોએ ભારે જાનહાનિનો દાવો કર્યો છે.
પાકિસ્તાની સેનાનો દાવો: 274 લડવૈયાઓ માર્યા ગયા
પાકિસ્તાની સેનાના પ્રવક્તાએ માહિતી આપી હતી કે ગુરુવાર રાતથી શુક્રવાર વહેલી સવાર સુધી ચાલેલા ઓપરેશનમાં અફઘાનિસ્તાનના 22 સૈન્ય મથકોને નષ્ટ કરવામાં આવ્યા છે. આ હુમલાઓમાં અંદાજે 274 તાલિબાની લડવૈયાઓ માર્યા ગયા હોવાનો દાવો કરવામાં આવ્યો છે. જોકે, પાકિસ્તાને એ વાત પણ સ્વીકારી છે કે આ અથડામણમાં તેના પોતાના 12 સૈનિકોએ પણ જીવ ગુમાવ્યો છે.
બીજી તરફ, તાલિબાને પાકિસ્તાનના દાવાઓને નકારી કાઢતા વળતો દાવો કર્યો છે કે તેમના વળતા પ્રહારમાં 55 પાકિસ્તાની સૈનિકો માર્યા ગયા છે અને અનેક સૈન્ય ચોકીઓ હવે તાલિબાનના કબજામાં છે. પાકિસ્તાની સંરક્ષણ મંત્રીએ કહ્યું કે અફઘાન સરકારની ‘ધીરજની કસોટી’ હવે પૂરી થઈ ગઈ છે અને પાકિસ્તાન હવે કોઈપણ આક્રમણનો જડબાતોડ જવાબ આપશે.
લડાઈનું મૂળ કારણ શું છે?
પાકિસ્તાન લાંબા સમયથી અફઘાનિસ્તાન પર આરોપ લગાવતું આવ્યું છે કે તે ‘તેહરીક-એ-તાલિબાન પાકિસ્તાન’ (TTP) જેવા આતંકવાદી સંગઠનોને આશ્રય આપી રહ્યું છે. તાજેતરમાં 21 ફેબ્રુઆરીએ પાકિસ્તાને અફઘાનિસ્તાનના નંગરહાર અને ખોસ્ત પ્રાંતોમાં TTP ના કેમ્પ પર એરસ્ટ્રાઈક કરી હતી, જેને અફઘાનિસ્તાને તેના સાર્વભૌમત્વ પર હુમલો ગણાવ્યો હતો. આ ઘટનાના વિરોધમાં 26 ફેબ્રુઆરીએ અફઘાન દળોએ સરહદ પર મોટા પાયે હુમલા શરૂ કર્યા, જેના જવાબમાં પાકિસ્તાને ‘ઓપરેશન રાઈટિયસ ફ્યુરી’ (Operation Righteous Fury) શરૂ કર્યું છે.
