પાકિસ્તાનમાં પૂર: કરતારપુર સાહિબ ગુરુદ્વારા ડૂબ્યું, 100થી વધુ લોકો ફસાયા
પાકિસ્તાનના પંજાબ પ્રાંતમાં રાવી નદીમાં આવેલા ભયાનક પૂરને કારણે સ્થિતિ ગંભીર બની ગઈ છે. કરતારપુર કોરિડોર અને ગુરુદ્વારા દરબાર સાહિબ સંપૂર્ણપણે જળમગ્ન થઈ ગયા છે. આ દુર્ઘટનામાં 100થી વધુ લોકો ફસાયા હોવાનું જણાઈ રહ્યું છે, જેમાં મોટાભાગના કર્મચારીઓ છે. અધિકારીઓએ 27 ઓગસ્ટે આ ઘટનાની પુષ્ટિ કરી.
બચાવ અભિયાન ચાલુ
કરતારપુર કોરિડોર પ્રોજેક્ટ મેનેજમેન્ટ યુનિટના વડા સૈફુલ્લાહ ખોખરે જણાવ્યું કે સમગ્ર પરિસર પાણીમાં ડૂબી ગયું છે. ફસાયેલા લોકોને સુરક્ષિત બહાર કાઢવા માટે બોટ અને હેલિકોપ્ટરની મદદ લેવામાં આવી રહી છે. સોશિયલ મીડિયા પર વાયરલ થયેલા વીડિયો અને તસવીરોમાં પવિત્ર ગુરુદ્વારા સંપૂર્ણપણે પાણીથી ઘેરાયેલું જોવા મળે છે.
ભારતની ચેતવણી અને સિંધુ જળ સંધિ
નારોવાલના ડેપ્યુટી કમિશનર હસન રઝાએ જણાવ્યું કે ભારત દ્વારા રાવી નદીમાં પાણી છોડવામાં આવ્યા બાદ ઘણા ગામો પૂરની ઝપેટમાં આવી ગયા છે. શકરગઢ તહેસીલના કોટ નૈનમાં નદીનું જળસ્તર 1,55,000 ક્યુસેક સુધી પહોંચી ગયું, જ્યારે તેની ક્ષમતા 1,50,000 ક્યુસેક છે.
આ પહેલા ભારતે ‘માનવતાના ધોરણે’ પાકિસ્તાનને પૂરની ચેતવણી આપી હતી. મે મહિનામાં બંને દેશો વચ્ચે તણાવ બાદ આ પહેલી સત્તાવાર વાતચીત હતી. ઉલ્લેખનીય છે કે, પહેલગામ આતંકી હુમલા બાદ ભારતે 1960ની સિંધુ જળ સંધિને સસ્પેન્ડ કરી દીધી હતી.
ખેતીવાડીને ભારે નુકસાન, સેના રાહત કાર્યમાં
પૂરને કારણે હજારો એકર કૃષિ જમીન પાણીમાં ડૂબી ગઈ છે. ડાંગરના પાક અને પશુ આહારને ભારે નુકસાન પહોંચ્યું છે. સતત પડી રહેલા વરસાદે સ્થિતિને વધુ ગંભીર બનાવી છે. લાહોરમાં પણ પૂરનો ખતરો વધ્યો છે. શાહદરા વિસ્તારમાં રાવી નદીનું જળસ્તર 72,900 ક્યુસેક નોંધાયું છે.
🚨 करतारपुर कॉरिडोर भी #Flood में डूबा.#FloodAlert भारत ने पहले हीं #Pakistan को कर दिया था…#flooding pic.twitter.com/Zucxmng05h
— Madhurendra kumar मधुरेन्द्र कुमार (@Madhurendra13) August 27, 2025
પંજાબ સરકારે રાહત અને બચાવ અભિયાન માટે સેનાને તૈનાત કરી છે. અત્યાર સુધીમાં લગભગ 2.5 લાખ લોકોને સુરક્ષિત સ્થાનો પર પહોંચાડવામાં આવ્યા છે. પાકિસ્તાનના વડાપ્રધાન શાહબાઝ શરીફે ઇમર્જન્સી બેઠક બોલાવીને અધિકારીઓને રાહત કાર્ય ઝડપી બનાવવા અને ચેતવણી પ્રણાલીઓને મજબૂત બનાવવાના નિર્દેશો આપ્યા છે.
