સંસદના ચોમાસુ સત્રમાં હોબાળો, રાજ્યસભામાં CISFની તૈનાતીને લઈ વિપક્ષનો વિરોધ, જે.પી. નડ્ડાનો આકરો પ્રહાર
સંસદનું ચોમાસુ સત્ર આ વખતે પણ વિવાદો અને હોબાળાથી ભરેલું જોવા મળી રહ્યું છે. મંગળવારે રાજ્યસભામાં CISF (કેન્દ્રીય ઔદ્યોગિક સુરક્ષા દળ)ની તૈનાતીને લઈ ભારે ચર્ચા અને હોબાળો થયો. આ મુદ્દે સરકાર અને વિપક્ષ વચ્ચે ટકરાવ જોવા મળ્યો.
રાજ્યસભામાં CISFની તૈનાતીને લઈ વિપક્ષી સાંસદોએ સવાલ ઉઠાવ્યા અને તેને લોકતાંત્રિક પ્રક્રિયામાં અવરોધ ઊભો કરનારું પગલું ગણાવ્યું. આ દરમિયાન વિપક્ષના નેતા અને ઉપસભાપતિ વચ્ચે ઉગ્ર બોલાચાલી પણ થઈ. વિપક્ષનો આરોપ છે કે આ પગલું સંસદની સ્વાયત્તતા અને નિષ્પક્ષતા પર સવાલ ઊભા કરે છે.
આ મુદ્દે ભાજપના વરિષ્ઠ નેતા અને કેન્દ્રીય મંત્રી જે.પી. નડ્ડાએ વિપક્ષ પર આકરા પ્રહાર કરતા કહ્યું કે, વિપક્ષ જાણી જોઈને ગૃહને અવરોધી રહ્યો છે. તેમણે કહ્યું કે, “વિપક્ષનો ઉદ્દેશ્ય માત્ર હોબાળો કરવાનો છે. તેઓ સંસદ ચાલવા દેતા નથી. જ્યારે પણ કોઈ ગંભીર ચર્ચા કરવાની હોય છે, ત્યારે તેઓ કોઈ ને કોઈ મુદ્દો ઉઠાવીને કાર્યવાહી રોકવાનો પ્રયાસ કરે છે.”
બીજી તરફ, કોંગ્રેસના નેતા પ્રિયંકા ગાંધીએ સરકાર પર વળતો પ્રહાર કરતા કહ્યું કે, સરકાર પોતે ચર્ચાથી ભાગી રહી છે. તેમણે કહ્યું, “અમે જે મુદ્દાઓ પર ચર્ચા કરવા માંગીએ છીએ, તેના પર સરકાર જવાબ આપવા તૈયાર નથી. સરકારની અંદર આટલો ડર કેમ છે? લોકશાહીમાં સવાલ પૂછવા એ વિપક્ષનો અધિકાર અને કર્તવ્ય છે.”
પ્રિયંકા ગાંધીએ પોતાના નિવેદનમાં એ પણ કહ્યું કે, રાહુલ ગાંધી હંમેશા સેનાનું સન્માન કરે છે. તેમણે આરોપ લગાવ્યો કે, સરકાર વિપક્ષના અવાજને દબાવવાનો પ્રયાસ કરી રહી છે અને સંસદીય પરંપરાઓનું પાલન કરતી નથી.
ભારે હોબાળાને કારણે લોકસભાની કાર્યવાહી બપોરે 2 વાગ્યા સુધી સ્થગિત કરવામાં આવી હતી. બંને ગૃહોમાં ગતિરોધ યથાવત છે, અને જો આવું જ ચાલતું રહ્યું તો ચોમાસુ સત્રમાંથી કોઈ નક્કર પરિણામ નીકળવું મુશ્કેલ છે.
