ચૈતરભાઈ વસાવા દ્વારા ડાયવર્ઝન સ્થળે વિરોધ અને રજૂઆત
છોટાઉદેપુર જિલ્લાના પાવીજેતપુર નજીક ભારજ નદી પર આવેલો મુખ્ય બ્રિજ છેલ્લા બે વર્ષથી પણ વધુ સમયથી નુકસાનગ્રસ્ત સ્થિતિમાં છે. બ્રિજ તૂટી જવાથી હજારો રહેવાસીઓ અને મુસાફરોને રોજબરોજ ભારે મુશ્કેલીઓનો સામનો કરવો પડે છે. સરકાર દ્વારા બે વખત ડાયવર્ઝન બનાવી આપવા પ્રયાસ કરાયો હતો, પરંતુ બંને વખત નદીના ભારે પ્રવાહને કારણે તે ધોવાઈ જતાં લોકો ફરી મુશ્કેલીમાં મૂકાયા છે. સ્થાનિક નાગરિકોનું કહેવું છે કે સમસ્યાનો કોઈ સ્થાયી ઉકેલ ન મળતા લોકોને પોતે મળીને ડાયવર્ઝન બનાવવું પડ્યું, જે પોતે જ વેદનકારી પરિસ્થિતિ દર્શાવે છે.
તંત્રની અવગણના વચ્ચે લોકોની મુશ્કેલીઓ વધતી
મળતી માહિતી મુજબ, છોટાઉદેપુર, બોડેલી તથા મધ્યપ્રદેશ તરફ જવા માટે આ માર્ગ અત્યંત મહત્વનો છે, પરંતુ બ્રિજ તૂટી જવાથી લોકોને 2 કિમીનું અંતર કાપવા 35 કિમી સુધી વળાંક લેવો પડે છે. સ્થાનિકોનો આક્ષેપ છે કે પહેલાં બે કરોડથી પણ વધુ રકમમાં બ્રિજ બનાવાયો હતો, પરંતુ કામની ગુણવત્તા નબળી હોવાને કારણે તે નદીના પ્રવાહ સામે ટકી શક્યો નહિ. ત્યારબાદ ફરી ચાર કરોડનું કામ કરાયું હતું, છતાં પરિણામ એ જ મળ્યું. આ બેદરકારીને કારણે વિસ્તારના રહેવાસીઓમાં ભારે અસંતોષ છે.
સ્થિતિ ગંભીર બનતા રહેવાસીઓએ પોતે જ મળીને જનતા ડાયવર્ઝન બનાવી દીધું, જેથી આવનજાવનની મુશ્કેલીઓ થોડીક હળવી બને. આ જ જનતા બનાવેલા રસ્તા પરથી આજે નેતાઓ અને તંત્રના અધિકારીઓ પસાર થવા લાગ્યા છે, જેને લોકો શરમજનક ગણાવી રહ્યા છે. આ મુદ્દે ડેડીયાપાડાના ધારાસભ્ય ચૈતરભાઈ વસાવા સ્થળ પર પહોંચી પરિસ્થિતિનું નિરીક્ષણ કર્યું હતું અને તંત્ર સામે વિરોધ વ્યક્ત કર્યો હતો. તેમણે નેશનલ હાઈવે નંબર 56ના અધિકારીઓને મળીને રજૂઆત કરી હતી અને સમયસર ઉકેલ ન આવે તો ધરણાંની ચીમકી પણ ઉચ્ચારી હતી.
