‘જ્યારે દરેકના હાથમાં લાઇટ છે તો ફાનસ જોઈએ છે કે શું’, સમસ્તીપુરથી PM મોદીનો RJD પર નિશાનો, ભાષણની 10 મોટી વાતો
પીએમ મોદીએ ચૂંટણી રેલી પહેલા કર્પૂરી ઠાકુરના પરિવાર સાથે મુલાકાત કરી અને તેમની પ્રતિમા પર પુષ્પાંજલિ અર્પણ કરી. પીએમ મોદીનો આ પ્રવાસ NDAની રણનીતિનો ભાગ છે, જે પછાત જાતિઓ અને સામાજિક સમીકરણો પર ભાર આપી રહ્યું છે.
બિહાર વિધાનસભા ચૂંટણી માટે NDAના પ્રચાર અભિયાનની શરૂઆત પ્રધાનમંત્રી નરેન્દ્ર મોદીએ સમસ્તીપુર જિલ્લાથી કરી દીધી છે. સમસ્તીપુરમાં પીએમ મોદીએ વિશાળ ચૂંટણી રેલીને સંબોધિત કરી. પીએમ મોદીની આ રેલી કર્પૂરી ઠાકુરના જન્મસ્થળ કર્પૂરીગ્રામની નજીક આયોજિત કરવામાં આવી, જે બિહારની રાજનીતિમાં સામાજિક ન્યાયના પ્રતીક છે. પીએમ મોદીએ સમસ્તીપુર રેલીમાંથી પૂર્વમાં લાલુ રાજના જંગલ રાજની વાત ફરી દોહરાવી છે. આવો જાણીએ સમસ્તીપુરમાં પીએમ મોદીની રેલીની 10 મોટી વાતો:
સમસ્તીપુર રેલીમાં PM મોદીના ભાષણની 10 મોટી વાતો
1.RJD પર ફાનસ દ્વારા નિશાન:
બિહારની મુખ્ય વિપક્ષી પાર્ટી રાષ્ટ્રીય જનતા દળ (RJD) પર પીએમ મોદીએ જોરદાર નિશાન સાધ્યું. તેમણે મંચ પરથી કહ્યું, ‘જ્યારે દરેકના હાથમાં લાઇટ છે તો ફાનસ (RJDનું ચૂંટણી ચિહ્ન) જોઈએ છે કે શું?’ આ કહેતા પહેલા તેમણે લોકોને મોબાઈલ ફોન બહાર કાઢીને ટૉર્ચ લાઇટ ચાલુ કરવા કહ્યું હતું.
2.જંગલ રાજમાંથી મુક્તિ:
પીએમ મોદીએ કહ્યું કે ઓક્ટોબર 2005માં બિહાર જંગલ રાજમાંથી મુક્ત થયું હતું અને નીતિશ કુમારના નેતૃત્વમાં રાજ્યમાં એનડીએની સરકાર બની હતી.
3.કોંગ્રેસ-RJD ગઠબંધન પર આરોપ:
તેમણે કહ્યું કે જ્યારે કેન્દ્રમાં કોંગ્રેસ-RJD ગઠબંધન સત્તામાં હતું, ત્યારે તેમણે નીતિશ કુમારના રસ્તામાં રોડા નાખ્યા અને બિહારની જનતાને પરેશાન કરવામાં કોઈ કસર છોડી નહોતી.
4.કાયદો અને વ્યવસ્થા પર પ્રહાર:
લાલુ રાજ પર હુમલો કરતા પીએમ મોદીએ કહ્યું કે, જ્યાં RJD જેવી પાર્ટી સત્તામાં હોય છે, ત્યાં કાયદો અને વ્યવસ્થા જાળવી શકાતી નથી. RJDના શાસનમાં જબરદસ્તી વસૂલી, હત્યા, ખંડણી અને અપહરણ ફૂલીફાલી રહ્યા હતા.
5.જંગલ રાજનો ભોગ:
તેમણે કહ્યું કે RJDના જંગલ રાજે બિહારની પેઢીઓને બરબાદ કરી દીધી. RJDના કુશાસનનો સૌથી મોટો ભોગ માતાઓ-બહેનો, યુવાનો, દલિતો, પછાત વર્ગો અને અતિ પછાત વર્ગો બન્યા.
6.નક્સલવાદ પર નિયંત્રણ:
પીએમ મોદીએ કહ્યું કે જંગલ રાજ દરમિયાન દલિતો અને અતિ પછાત વર્ગો માટે પોલીસ સ્ટેશનોના દરવાજા બંધ હતા અને નક્સલવાદ તથા માઓવાદી આતંકવાદ પણ ફૂલીફાલી રહ્યો હતો. તેમણે માઓવાદી આતંકવાદની કમર તોડવાની ગેરંટી આપી.
7.’લઠબંધન’ પર નિશાન:
પ્રધાનમંત્રીએ મહાગઠબંધન (જેને તેમણે ‘લઠબંધન’ કહ્યું) પર નિશાન સાધતા કહ્યું કે તેમના ઉમેદવારો જૂના દિવસો પાછા લાવવાની તેમની ઇચ્છા દર્શાવે છે અને તેમના પ્રચારને સાંભળીને જંગલ રાજ યાદ આવે છે. તેમણે જંગલ રાજને હરાવવું અત્યંત જરૂરી ગણાવ્યું.
8.જીતના રેકોર્ડ તોડવાનો વિશ્વાસ:
પ્રધાનમંત્રીએ વિશ્વાસ વ્યક્ત કર્યો કે આ વખતે બિહારના મુખ્યમંત્રી નીતિશ કુમારના નેતૃત્વમાં NDA જીતના પોતાના તમામ જૂના રેકોર્ડ તોડી દેશે અને બિહાર NDAને અત્યાર સુધીનો સૌથી મોટો જનાદેશ આપશે.
9.નવો નારો:
વિધાનસભા ચૂંટણીને લઈને પીએમ મોદીએ RJD પર નિશાન સાધતા નવો નારો આપ્યો:
- “ફિર એક બાર એનડીએ સરકાર,
- ફિર એક બાર સુશાસન સરકાર,
- જંગલરાજ વાલોં કો દૂર રખેગા બિહાર.”
10.વિકાસ અને આરક્ષણ પર ભાર:
પીએમ મોદીએ કહ્યું કે ભાજપ-NDAની સરકારે ગરીબો, દલિતો, પછાત અને અતિપછાત વર્ગોના હિતોને પ્રાથમિકતા આપી છે. સામાન્ય વર્ગના ગરીબોને 10% આરક્ષણ અને SC/STના આરક્ષણને 10 વર્ષ માટે આગળ વધારવાનો નિર્ણય લીધો. તેમણે કહ્યું કે કોંગ્રેસના સમય કરતાં ત્રણ ગણા વધુ પૈસા બિહારના વિકાસ માટે આપ્યા છે, જેનાથી વિકાસ પણ ત્રણ ગણો વધુ થશે.
