મહારાષ્ટ્રના પૂર્વ મુખ્યમંત્રી અને વિપક્ષના નેતા દેવેન્દ્ર ફડણવીસે સોમવારે જણાવ્યું હતું કે, રાજ્યમાં આગામી ભાજપ સરકારનો શપથ ગ્રહણ સમારોહ સવારને બદલે યોગ્ય સમયે યોજાશે. જણાવી દઈએ કે એક વર્ષ પહેલા જ રાજ્યના પૂર્વ મુખ્યમંત્રી દેવેન્દ્ર ફડણવીસે એનસીપીના નેતા અજિત પવાર સાથે સરકાર બનાવી હતી. આ સરકાર માત્ર 80 કલાક જ રહી હતી, બાદમાં બંને નેતાઓએ પોતાના પદ પરથી રાજીનામું આપવું પડ્યું હતું.
સોમવારે એક મીડિયા પ્રશ્ન પર પ્રતિક્રિયા આપતા પૂર્વ મુખ્યમંત્રી દેવેન્દ્ર ફડણવીસે જણાવ્યું હતું કે, જો ઉદ્ધવ ઠાકરેના નેતૃત્વવાળી મહાવિકાસ અઘાડીની સરકાર પડી જશે તો નવી સરકારના શપથ ગ્રહણ સમારોહ એક વર્ષ અગાઉ યોજાશે નહીં. અગાઉ ભાજપના અન્ય એક નેતા અને કેન્દ્રીય મંત્રી રાવસાહેબ દાનવેએ કહ્યું હતું કે પાર્ટી આગામી બેથી ત્રણ મહિનામાં મહારાષ્ટ્રમાં સરકાર બનાવશે. તેમણે કહ્યું હતું કે, ભાજપે આ માટે તૈયારીઓ કરી લીધી છે.
પૂર્વ મુખ્યમંત્રી ફડણવીસે એમ પણ કહ્યું હતું કે, ગયા વર્ષની ઘટનાઓને યાદ રાખવાની જરૂર નથી. ફડણવીસે કહ્યું કે કોંગ્રેસ, એનસીપી અને શિવસેના વિધાનસભાની ચૂંટણીને લઈને સાથે મળીને લડી રહ્યા છે, પરંતુ ભાજપનું પ્રદર્શન સારું રહેશે. ફડણવીસના નિવેદન પર શિવસેનાના નેતા સંજય રાઉતે તેમના પર હુમલો કર્યો હતો અને કહ્યું હતું કે, આવી સવાર ક્યારેય મહારાષ્ટ્રમાં નહીં આવે. આગામી વિધાનસભાની ચૂંટણી પછી પણ મહા વિકાસ અઘાડી સરકાર સત્તામાં આવશે, આગામી વિધાનસભાની ચૂંટણીમાં પણ આપણે જીતીશું.
રવિવારે શિવસેનાના નેતા નીતિન નંદગાંવકર દ્વારા કરાચી મીઠાઈ બ્રાન્ડનું નામ બદલવાની માગણી પર પ્રતિક્રિયા આપતા પૂર્વ સીએમ દેવેન્દ્ર ફડણવીસે નાગપુરમાં પત્રકારો સાથે વાત કરતા કહ્યું હતું કે, “અમે અખંડ ભારતમાં માનીએ છીએ અને એક દિવસ કરાંચી ભારતનો હિસ્સો બનશે. શિવસેનાના નેતા નીતિન નંદગાંવકરે ગયા અઠવાડિયે કરાચીના માલિકને પોતાની દુકાનના નામે કરાચી શબ્દ હટાવવાની માગણી કરી હતી. ત્યારબાદ રાજ ઠાકરેની પાર્ટી એમએનએસના કાર્યકર્તાઓએ પણ તેનો વિરોધ કર્યો હતો અને દુકાન તોડી નાખી હતી. નીતિન નંદગાંવકરે દુકાનના માલિકને ધમકી આપી હતી અને તેને વહેલામાં વહેલી તકે બદલવા કહ્યું હતું.
