વિધાનસભા ચુંટણી દરમિયાન ઉત્તર પ્રદેશ, ઉત્તરાખંડ, પંજાબ, મણિપુર અને ગોવામાં ૧,૦૦૦ કરોડ રૂપિયાથી વધુની રકમ જપ્ત કરવામાં આવી છે. અમલીકરણ એજન્સીઓની સક્રિય સંડોવણીને કારણે, ઉત્તર પ્રદેશ, ઉત્તરાખંડ, પંજાબ, મણિપુર અને ગોવા રાજયોમાં ચાલી રહેલી વિધાનસભા ચૂંટણી ૨૦૨૨માં જપ્તીનો આંકડો રૂ. ૧૦૦૦ કરોડને પાર કરી ગયો છે.
ચૂંટણી પંચે મોનિટરિંગ દ્વારા ચૂંટણીમાં મની પાવરને રોકવા માટેના કમિશનના પ્રયાસો પર વધુ ધ્યાન કેન્દ્રિત કર્યું છે. ચૂંટણી પંચના જણાવ્યા અનુસાર, પંજાબમાં સૌથી વધુ રૂ. ૫૧૦.૯૧ કરોડની જપ્તી કરવામાં આવી છે, જે પાંચ ચૂંટણીવાળા રાજયોમાં ટોચ પર છે. તે પછી ઉત્તર પ્રદેશ (રૂ. ૩૦૭.૯૨ કરોડ) અને મણિપુર (રૂ. ૧૬૭.૮૩ કરોડ) આવે છે. ઉત્તરાખંડમાં ચૂંટણી દરમિયાન ૧૮.૮૧ કરોડ રૂપિયા અને ગોવામાં ૧૨.૭૩ કરોડ રૂપિયા જપ્ત કરવામાં આવ્યા હતા.
કુલ રૂ. ૧૦૧૮.૨૦ કરોડની જપ્તીમાં રૂ. ૧૪૦.૨૯ કરોડની રોકડ, રૂ. ૯૯.૮૪ કરોડ (૮૨,૦૭,૨૨૧ લીટરની કિંમતનો દારૂ), રૂ. ૫૬૯.૫૨ કરોડની દવાઓ, રૂ. ૧૧૫.૦૫ કરોડની કિંમતી ધાતુઓ અને રૂ. ૯૩.૫ કરોડની અન્ય વસ્તુઓનો સમાવેશ થાય છે. પંજાબમાંથી જ ૩૭૬.૧૯ કરોડ રૂપિયાનો નશો મળી આવ્યો હતો. ચૂંટણી પંચે સીબીડીટી, સીબીઆઈસી, એનસીબી, આબકારી અને સીમાવર્તી રાજયોના વરિષ્ઠ અધિકારીઓ જેવી અમલીકરણ એજન્સીઓના વડાઓ સાથે ચૂંટણી રાજયોમાં ઘણી બેઠકો યોજી હતી.
EDએ કહ્યું કે આ રાજયોમાં ૬૩ વિધાનસભા મતવિસ્તારોને વધુ ધ્યાન કેન્દ્રિત કરવા માટે સંવેદનશીલ મતવિસ્તાર તરીકે ચિહ્નિત કરવામાં આવ્યા છે. પંજાબ, ગોવા અને ઉત્તરાખંડમાં વિધાનસભાની ચૂંટણીઓ પૂર્ણ થઈ ચૂકી છે. દરમિયાન, ઉત્તર પ્રદેશમાં સાત તબક્કાની વિધાનસભા ચૂંટણીના ચાર તબક્કા પૂર્ણ થઈ ગયા છે. ઉત્તર પ્રદેશમાં બાકીના ત્રણ તબક્કાનું મતદાન ૨૭ ફેબ્રુઆરી, ૩ માર્ચ અને ૭ માર્ચે થશે. મણિપુરમાં વિધાનસભાની ચૂંટણી બે તબક્કામાં ૨૮ ફેબ્રુઆરી અને ૫ માર્ચે યોજાશે. તમામ રાજયોમાં મતગણતરી ૧૦ માર્ચે થશે.
