નવી દિલ્હી : કોરોના સંકટ અને લોકડાઉનને કારણે રાજ્યોની આર્થિક વ્યવસ્થા સંપૂર્ણપણે કથળી ગઈ છે. આલ્કોહોલ, તમાકુ પેદાશો અને પેટ્રોલિયમ પેદાશોના વેચાણ પરનો કર રાજ્ય સરકારની કમાણીમાં ફાળો આપે છે. લોકડાઉનને કારણે તેમની ખરીદી અને વેચાણ સંપૂર્ણપણે બંધ છે. આ ઉપરાંત વ્યવસાય અને ઔદ્યોગિક એકમો પણ સંપૂર્ણ રીતે બંધ છે, જેના કારણે રાજ્યની તિજોરીઓ ખાલી થઈ રહી છે. રાજ્ય સરકારો કેન્દ્ર સરકાર પાસેથી આર્થિક મદદ અને પેકેજ માટે સતત વિનંતી કરે છે, પરંતુ હજી સુધી દેશભરમાં કોઈ નક્કર વ્યૂહરચના જાહેર થઈ નથી. આવી સ્થિતિમાં રાજ્ય સરકારોએ કોરોના પછી આર્થિક સંકટમાંથી બહાર નીકળવાની કવાયત શરૂ કરી દીધી છે.
લોકડાઉનમાંથી બહાર નીકળ્યા પછી, પંજાબની કેપ્ટન સરકારે રાજ્યની આર્થિક સ્થિતિને પાટા પર લાવવા માટે પ્રયાસો શરૂ કર્યા છે. કોરોના પછી પંજાબને આર્થિક સંકટમાંથી બહાર લાવવા મુખ્યમંત્રી અમરિન્દરસિંહે આયોજન પંચના પૂર્વ ઉપાધ્યક્ષ મોન્ટેક સિંઘ આહલુવાલિયાની આગેવાની હેઠળ 20 આર્થિક નિષ્ણાતોની એક ટીમ બનાવી છે, જે દેશના પૂર્વ વડાપ્રધાન મનમોહનસિંહના માર્ગદર્શન હેઠળ કાર્ય કરશે.
