મસ્જિદોમાંથી લાઉડ સ્પીકરનો ઉપયોગ માત્ર ઇબાદત કરવાનો સમય થઈ ગયાનો સંકેત આપવા માટે થાય છે: ગ્યાસુદ્દીન શેખ

અમદાવાદ કોંગ્રેસના ધારાસભ્ય ગ્યાસુદ્દીન શેખે મુખ્યમંત્રીને પત્ર લખી ને જણાવ્યુ કે, ગુજરાત સરકારના નોટિફિકેશનમાં એવું ક્યાંય પણ લખવામાં આવ્યું નથી કે ગુજરાતમાં અઝાન પર પ્રતિબંધ છે છતાં પણ રાજ્યમાં ઘણી જગ્યાએ પોલીસ દ્વારા બંધ કરાવવામાં આવે છે. નોટિફિકેશનનો હેતુ સ્પષ્ટ છે કે, જાહેર ધાર્મિક પ્રવૃત્તિ પૂજા, બંદગી, કે જેમાં લોકો એકત્ર થાય તે માટે લાઉડ સ્પીકરનો ઉપયોગ કરી શકાશે નહીં. રાજ્યમાં લોકડાઉન પછી રાજ્યની બધી મસ્જીદો, દરગાહો, કબ્રસ્તાનો, મદરેસાઓમાં મુસ્લિમ સમાજ દ્વારા ચુસ્તપણે લોકડાઉનનું પાલન કરવામાં આવી રહ્યું છે અને મસ્જિદોમાં નમાજ માટે સમાજ એકત્ર થતા નથી, લોકો અઝાન સાંભળી પોતાના ઘરમાં જ નમાઝ અદા કરે છે. હાલ લાઉડ સ્પીકર પર અને મસ્જિદોમાં અઝાન લોકોને એકત્ર કરવા માટે આપવામાં આવતી નથી પરંતુ લોકોને યાદ અપાવવા કે તેઓ ઘરમાં નમાઝ પડી શકે, તે હેતુથી નમાઝના સમયની માહિતી આપવા માટે કરવામાં આવે છે. ગુજરાત સરકારના નોટિફિકેશનમાં અઝાન માટે નો ઉપયોગ કરવા પર પ્રતિબંધ નથી જેથી પોલીસને સૂચના આપો કે એ મસ્જિદમાં અઝાન આપવા માટે લાઉડ સ્પીકરનો ઉપયોગ કરવા પર પ્રતિબંધ ન ફરમાવે.