અમદાવાદમાં ‘પ્રોજેક્ટ પરમ’નો પ્રારંભ
અમદાવાદ શહેરમાં વિદ્યાર્થીઓના વધતા મોબાઈલ વપરાશ સામે શિક્ષણ વિભાગે મોટું પગલું ભર્યું છે. શહેર જિલ્લા શિક્ષણ અધિકારીએ ‘પ્રોજેક્ટ પરમ’ નામનું વિશેષ અભિયાન શરૂ કર્યું છે, જેના માધ્યમથી વિદ્યાર્થીઓ અને વાલીઓને મોબાઈલનો યોગ્ય ઉપયોગ શિખવવામાં આવશે.
વિદ્યાર્થીઓ માટે શિક્ષણ મંત્રીએ ઊંચા સ્વરે ચેતવણી આપી
નિકોલ ખાતે આવેલી સંકલ્પ ઇન્ટરનેશનલ શાળામાં યોજાયેલા લોકાર્પણ કાર્યક્રમમાં શિક્ષણ મંત્રી કુબેર ડિંડોરે ઓનલાઈન જોડાઈને જણાવ્યું કે, “આજના બાળકો રોજના 6 કલાક સોશિયલ મીડિયામાં વિતાવે છે, જેનો સીધો પ્રભાવ તેમની એકાગ્રતા, વર્તન અને ભવિષ્ય પર પડે છે. આવા સમયનો ઉપયોગ બધી રીતે નિર્માણાત્મક કાર્યો માટે થવો જોઈએ.”
બાળકોના સ્ક્રીન સમય અંગે વાલીઓને સમજણ આપશે શિક્ષકો
આ અભિયાન અંતર્ગત શિક્ષકો શાળામાં વિદ્યાર્થી અને તેમના માતાપિતાને મોબાઈલના સારા કે ખરાબ ઉપયોગ વિશે માર્ગદર્શન આપશે. બાળકો કેમ ઝડપથી ઉદાસ, ગુસ્સાવાળાં કે અસંવેદનશીલ બની રહ્યા છે તેનું મુખ્ય કારણ છે વધુ પડતો સ્ક્રીનનો સંપર્ક.
સ્ક્રીન ટાઈમ મર્યાદિત કરવા ઘરેથી શરૂઆત કરવાની જરૂર
ચિલ્ડ્રન યુનિવર્સિટીના કુલપતિ ટી.એસ. જોષીએ કાર્યક્રમમાં જણાવ્યું કે, નાના બાળકો માટે સ્ક્રીન ટાઈમ ટાળવો જોઈએ. જો બાળકો મોબાઈલ વાપરે તો એ પણ વડીલોની હાજરીમાં અને ચોક્કસ સમય માટે જ થવો જોઈએ. ભવિષ્યમાં આવી સ્થિતિ સામે લડવા માટે વિધિવત નીતિ બનાવવી જરૂરી છે. જો નીતિ તૈયાર ન થાય તો પેરેન્ટ્સ અને શિક્ષકોને જ આગેવાન બની સંવેદનશીલ બનવું પડશે.
‘પ્રોજેક્ટ પરમ’ માત્ર અભિયાન નથી, પણ એક ચેતવણી છે – કે વિદ્યાર્થીઓના શિક્ષણને ખતમ કરતા મોબાઈલના આ આધુનિક નશાથી બચવું જરૂરી છે. વિદ્યાર્થીઓને ભવિષ્ય માટે ઘડીને દેશના દિગ્દર્શક બનાવવા હોય, તો ‘પ્રોજેક્ટ પરમ’ જેવા પ્રયાસો અનિવાર્ય બની રહ્યા છે.
