‘જાહેરાતો મોટી, પ્રચાર તેનાથી પણ મોટો અને જવાબદારી શૂન્ય’, રાહુલ ગાંધીએ સ્માર્ટ સિટી મુદ્દે સરકારને ઘેરી
કોંગ્રેસના નેતા રાહુલ ગાંધીએ સંસદની કાર્યવાહી દરમિયાન સ્માર્ટ સિટી યોજનાને લઈને કેન્દ્રની મોદી સરકાર પર આકરા પ્રહારો કર્યા છે. તેમણે આરોપ લગાવ્યો કે દેશને એક અધૂરી અને નિષ્ફળ યોજનાને ‘સંપૂર્ણ પરિવર્તનની વાર્તા’ બનાવીને વેચવામાં આવી છે, જ્યારે જમીની હકીકત કંઈક અલગ જ વાર્તા કહી રહી છે. રાહુલ ગાંધીના મતે, જો કોઈ શહેર તેના નાગરિકોને પાયાની સુવિધાઓ, સ્વચ્છ પાણી, શુદ્ધ હવા અને સુરક્ષા આપી શકતું નથી, તો તેને ‘સ્માર્ટ’ કહી શકાય નહીં.
સ્માર્ટ સિટી મિશન પર સવાલ
રાહુલ ગાંધીએ સંસદમાં સરકાર પાસે સ્માર્ટ સિટી મિશનના વાસ્તવિક પરિણામોનો હિસાબ માંગ્યો હતો. તેમણે કહ્યું કે, “વડાપ્રધાન આ યોજનાના વખાણ કરતા થાકતા નહોતા, પરંતુ હવે જ્યારે આ યોજના તેના અંતિમ તબક્કામાં છે, ત્યારે જે સત્ય સામે આવ્યું છે તે છેતરપિંડી સિવાય બીજું કંઈ નથી.” રાહુલનો દાવો છે કે આ યોજનાનો ઉદ્દેશ્ય ક્યારેય આખા શહેરનો વિકાસ કરવાનો હતો જ નહીં. તેમણે સરકારને પૂછ્યું કે સફળતાના માપદંડ શું હતા અને સામાન્ય માણસના જીવનમાં શું નક્કર બદલાવ આવ્યો?
જમીની હકીકત અને ભ્રષ્ટાચારના આરોપ
સરકાર દ્વારા આપવામાં આવેલા જવાબ પર કટાક્ષ કરતા રાહુલે કહ્યું કે, સરકારે અંદાજે ₹48,000 કરોડ ખર્ચ્યા હોવાનો દાવો કર્યો છે અને 97% પ્રોજેક્ટ્સ પૂરા થયા હોવાનું જણાવ્યું છે. પરંતુ રાહુલે સવાલ કર્યો કે જો બધું જ પૂરું થઈ ગયું છે, તો શહેરોમાં શું બદલાયું? તેમણે ઉમેર્યું કે, “દૂષિત પાણી અને ખુલ્લી ગટરોને કારણે આજે પણ લોકોના મોત થઈ રહ્યા છે. તૂટતા પુલ અને ધસી ગયેલા રસ્તાઓ આ મિશનની નિષ્ફળતાના જીવતા જાગતા પુરાવા છે. મોદી સરકારની કાર્યશૈલીમાં જાહેરાતો અને પ્રચાર મોટા હોય છે, પણ જવાબદારી શૂન્ય હોય છે.”
કેરળ ચૂંટણીમાં ભાજપ-LDF પર નિશાન
બીજી તરફ, કેરળમાં ચૂંટણી પ્રચાર દરમિયાન રાહુલ ગાંધીએ વડાપ્રધાન મોદી અને રાજ્યની સત્તાધારી ડાબેરી લોકશાહી મોરચા (LDF) પર નિશાન સાધ્યું હતું. તેમણે આરોપ લગાવ્યો કે વડાપ્રધાન મોદી ઈચ્છે છે કે કેરળમાં LDF ની સરકાર ફરીથી સત્તામાં આવે. રાહુલે દાવો કર્યો કે કોંગ્રેસના નેતૃત્વ હેઠળનો UDF મોરચો અત્યારે LDF અને ભાજપની ‘મિલીભગત’ સામે લડી રહ્યો છે. આ પ્રસંગે માકપાના બે પૂર્વ નેતાઓ પણ મંચ પર હાજર હતા, જેઓ અત્યારે UDF ના સમર્થનથી અપક્ષ તરીકે ચૂંટણી લડી રહ્યા છે.
રાહુલ ગાંધીના આ પ્રહારોએ સ્માર્ટ સિટીના દાવાઓ અને કેરળના રાજકીય સમીકરણો પર નવેસરથી ચર્ચા જગાવી છે.
