‘કોઈ કાયમી મિત્ર કે દુશ્મન નથી, માત્ર રાષ્ટ્રીય હિત સર્વોપરી’, ટ્રમ્પના ટેરિફ પર રાજનાથ સિંહનું નિવેદન
અમેરિકી રાષ્ટ્રપતિ ડોનાલ્ડ ટ્રમ્પ દ્વારા ભારત પર લાદવામાં આવેલા 50 ટકા ટેરિફને લઈને દુનિયાભરમાં ચર્ચા ચાલી રહી છે. આ વચ્ચે સંરક્ષણ મંત્રી રાજનાથ સિંહે એક મોટું નિવેદન આપતા કહ્યું કે વૈશ્વિક રાજકારણમાં ન તો કોઈ કાયમી મિત્ર હોય છે અને ન તો દુશ્મન, પરંતુ દરેક દેશે પોતાના રાષ્ટ્રીય હિતોને સર્વોપરી રાખવા જોઈએ.
રાજનાથ સિંહે આ નિવેદન NDTV ડિફેન્સ સમિટ 2025માં આપ્યું. તેમણે કહ્યું કે આજની દુનિયા પહેલા કરતા વધુ અસ્થિર અને પડકારજનક બની ગઈ છે. મહામારી, આતંકવાદ અને પ્રાદેશિક સંઘર્ષોએ એ સાબિત કરી દીધું છે કે 21મી સદી અત્યાર સુધીની સૌથી મુશ્કેલ સદી છે.
આત્મનિર્ભરતા હવે અનિવાર્ય
સંરક્ષણ મંત્રીએ કહ્યું કે ભારતે બદલાતા સંજોગો મુજબ પોતાને ઢાળવું પડશે. તેમણે ભારપૂર્વક કહ્યું, “પહેલા આત્મનિર્ભરતાને વિશેષાધિકાર માનવામાં આવતો હતો, પરંતુ આજે તે આપણા અસ્તિત્વ અને પ્રગતિ માટે અનિવાર્ય બની ગઈ છે. ભારત કોઈને દુશ્મન માનતું નથી, પરંતુ ખેડૂતો અને ઉદ્યોગસાહસિકોના હિત સર્વોપરી છે.”
તેમણે જણાવ્યું કે 2014માં ભારતની સંરક્ષણ નિકાસ માત્ર ₹700 કરોડ હતી, જ્યારે હવે તે વધીને લગભગ ₹24,000 કરોડ સુધી પહોંચી ગઈ છે. આ વાતનો પુરાવો છે કે ભારત હવે ફક્ત સંરક્ષણ ઉપકરણોનો આયાતકાર નથી, પરંતુ ઉત્પાદક અને નિકાસકાર પણ બની ચૂક્યો છે.
સ્વદેશી ઉપકરણોથી વધી સેનાની તાકાત
રાજનાથ સિંહે ભારતની સૈન્ય શક્તિનું ઉદાહરણ આપતા કહ્યું કે આજે આપણી સેનાઓ સ્વદેશી ઉપકરણોની મદદથી સચોટ ઓપરેશન કરવા માટે સક્ષમ છે. તેમણે કહ્યું કે કોઈપણ સૈન્ય અભિયાનની સફળતા માત્ર હથિયારોથી નહીં, પરંતુ લાંબી વ્યૂહાત્મક તૈયારી, તાલમેલ અને દીર્ઘદૃષ્ટિ પર આધાર રાખે છે.
તેમણે ઓપરેશન સિંદૂરનો ઉલ્લેખ કરતા કહ્યું કે આ માત્ર થોડા દિવસોની લડાઈ નહોતી, પરંતુ તેની પાછળ વર્ષોની વ્યૂહાત્મક યોજના અને સખત મહેનત હતી. તેમણે ઉદાહરણ આપતા કહ્યું, “જેમ કોઈ ખેલાડી દોડમાં થોડી સેકન્ડમાં જીતે છે, પરંતુ તેની પાછળ વર્ષોનો અભ્યાસ છુપાયેલો હોય છે, તેમ જ આપણી સેનાઓએ વર્ષોની તૈયારી અને સ્વદેશી ઉપકરણોના માધ્યમથી પસંદગીના લક્ષ્યો પર પ્રભાવી કાર્યવાહી કરી.”
સંરક્ષણ મંત્રીનું આ નિવેદન સ્પષ્ટ કરે છે કે ભારતની વ્યૂહરચના હવે માત્ર મિત્રતા કે દુશ્મની પર આધારિત નથી, પરંતુ રાષ્ટ્રહિત અને આત્મનિર્ભરતા તેની સૌથી મોટી પ્રાથમિકતા છે. બદલાતી ભૂ-રાજનીતિ અને વૈશ્વિક પડકારો વચ્ચે ભારતે એ સાબિત કરી દીધું છે કે તે હવે આત્મનિર્ભર બનીને સંરક્ષણ ક્ષેત્રમાં એક મજબૂત નિકાસકાર બનવા તરફ ઝડપથી આગળ વધી રહ્યું છે.
