રાશિદ ખાનની ઘાતક બોલિંગ સામે આયર્લેન્ડ ધારાશાયી: ૬ વિકેટ ઝડપીને ચામિંડા વાસ અને ટ્રેન્ટ બોલ્ટનો રેકોર્ડ તોડ્યો
ઉત્તરી આયર્લેન્ડના સુંદર બ્રેડી ક્રિકેટ ક્લબ ગ્રાઉન્ડ પર રમાયેલી બીજી વનડે મેચમાં અફઘાનિસ્તાનના વિશ્વ વિખ્યાત લેગ-સ્પિનર રાશિદ ખાને પોતાની ફિરકીના જાદુથી આઇરિશ બેટિંગ લાઇનઅપના ધિજ્જા ઉડાવી દીધા હતા. રાશિદ ખાનના શ્રેષ્ઠ બોલિંગ સ્પેલની મદદથી અફઘાનિસ્તાને આયર્લેન્ડને ૯૨ રનથી હરાવીને શ્રેણીમાં ૧-૦ની મહત્વપૂર્ણ લીડ મેળવી લીધી છે. આ સાથે જ રાશિદ ખાને વનડે ક્રિકેટમાં એક એવો ઐતિહાસિક સિમાચિહ્ન સર કર્યો છે, જેણે તેને વિશ્વના દિગ્ગજ ફાસ્ટ અને સ્પિન બોલરોની વિશિષ્ટ કલબમાં સામેલ કરી દીધો છે.
વરસાદથી પ્રભાવિત મેચમાં અફઘાનિસ્તાનનો મજબૂત સ્કોર
મેચની શરૂઆતમાં જ ખરાબ હવામાન અને વરસાદના કારણે રમત થોડી વાર અટકી પડી હતી, જેના પરિણામે મેચને પ્રતિ ટીમ ૪૭ ઓવર સુધી ઘટાડવામાં આવી હતી. આયર્લેન્ડે ટોસ જીતીને પ્રથમ બોલિંગ કરવાનો નિર્ણય લીધો હતો, પરંતુ અફઘાનિસ્તાનના બેટ્સમેનોએ આ નિર્ણયને ખોટો સાબિત કર્યો.
ટોપ ઓર્ડરના શાનદાર પ્રદર્શનના જોરે અફઘાનિસ્તાને ૪૭ ઓવરમાં ૮ વિકેટના નુકસાને ૨૯૯ રનનો વિશાળ સ્કોર ખડકો. ટીમ તરફથી સ્ટાર ઓપનર ઇબ્રાહિમ ઝદરાને સૌથી વધુ ૮૪ રનની ધૈર્યપૂર્ણ અને આક્રમક ઇનિંગ રમી હતી. તેને બીજા છેડેથી યુવા બેટ્સમેન સેદીકુલ્લાહ અટલનો સારો સાથ મળ્યો, જેણે ૪૫ રનનું મહત્વપૂર્ણ યોગદાન આપ્યું. આ સિવાય વિકેટકીપર રહેમાનુલ્લાહ ગુરબાઝ (૩૨) અને રહેમત શાહ (૩૦)એ ટીમને સારો પાયો આપ્યો હતો, જ્યારે કેપ્ટન હશમતુલ્લાહ શાહિદી (૩૬) અને અઝમતુલ્લાહ ઓમરઝાઈના ઝડપી રનોએ ટીમનો સ્કોર ૩૦૦ની નજીક પહોંચાડવામાં મદદ કરી હતી.
આયર્લેન્ડ તરફથી બોલિંગમાં માર્ક અદાયર અને જય મુન્દ્રાએ ૨-૨ વિકેટ ઝડપી હતી, જ્યારે ગેવિન હોયે, હેરી ટેક્ટર અને કર્ટિસ કેમ્પરે ૧-૧ વિકેટ મેળવી હતી.
રાશિદ ખાનનું ઘાતક આક્રમણ અને રેકોર્ડબ્રેક પ્રદર્શન
૩૦૦ રનના વિશાળ લક્ષ્યનો પીછો કરવા ઉતરેલી આયર્લેન્ડની ટીમ શરૂઆતથી જ દબાણમાં જોવા મળી હતી. જોકે, ખરી તબાહી ત્યારે મચી જ્યારે રાશિદ ખાન બોલિંગ કરવા આવ્યો. તાજેતરમાં જ ઈંગ્લેન્ડમાં ‘ધ હંડ્રેડ’ ટૂર્નામેન્ટમાં શાનદાર ફોર્મ બતાવીને આવેલા રાશિદ ખાને આ મેચમાં પોતાની સ્પિન અને ગુગલીના એવા તીર છોડ્યા કે આઇરિશ બેટ્સમેનો પાસે તેનો કોઈ જવાબ નહોતો.
રાશિદ ખાને માત્ર ૭.૪ ઓવરમાં ૩૪ રન આપીને ૬ વિકેટ ઝડપી લીધી હતી. વનડે ક્રિકેટ ઈતિહાસમાં રાશિદ ખાનનો આ ત્રીજો ૬ વિકેટનો સ્પેલ (Six-wicket haul) હતો. આ સાથે જ તેણે વનડે ક્રિકેટમાં સૌથી વધુ વાર ૬ વિકેટ લેવાના મામલે શ્રીલંકાના દિગ્ગજ ફાસ્ટ બોલર ચામિંડા વાસ, ન્યૂઝીલેન્ડના ટ્રેન્ટ બોલ્ટ અને દક્ષિણ આફ્રિકાના ઇમરાન તાહિર જેવા મહાન બોલરોને પાછળ છોડી દીધા છે. આ તમામ બોલરોએ પોતાના કરિયરમાં ૨-૨ વાર આ સિદ્ધિ મેળવી હતી, જ્યારે રાશિદે હવે ૩ વાર આ પરાક્રમ કર્યું છે. હવે આ યાદીમાં માત્ર પાકિસ્તાનનો પૂર્વ ફાસ્ટ બોલર વકાર યુનિસ જ તેનાથી આગળ છે, જેણે વનડેમાં ૫ વખત ૬ વિકેટ લેવાનો રેકોર્ડ બનાવ્યો છે.
લક્ષ્યથી ઘણે દૂર અટકી ગયું આયર્લેન્ડ
વિશાળ ટાર્ગેટ અને રાશિદ ખાનની આક્રમક બોલિંગ સામે આયર્લેન્ડનો મધ્યક્રમ સંપૂર્ણપણે ભાંગી પડ્યો હતો. આયર્લેન્ડ તરફથી કેડ કાર્માઇકલે એકલા હાથે લડત આપવાનો પ્રયાસ કર્યો હતો. તેણે ૬૬ બોલમાં ૬૨ રનની આકર્ષક અર્ધશતકીય ઇનિંગ રમી હતી, પરંતુ તેને અન્ય કોઈ બેટ્સમેનનો લાંબા સમય સુધી સહયોગ મળ્યો નહીં.
ઓપનર એન્ડી બાલ્બિર્નીએ ૩૬ રન અને બેન ક્લેટ્ઝે ૨૭ રન બનાવીને થોડો પ્રતિકાર કર્યો હતો. આ સિવાય લોર્કન ટકર અને કર્ટિસ કેમ્પરે ૨૩-૨૩ રનનું યોગદાન આપ્યું હતું, પરંતુ આ રન ટીમ માટે પૂરતા સાબિત થયા નહોતા. આખી ટીમ ૪૧.૪ ઓવરમાં ૨૦૭ રનના સ્કોર પર ઓલઆઉટ થઈ ગઈ હતી અને અફઘાનિસ્તાને ૯૨ રનથી ભવ્ય વિજય નોંધાવ્યો હતો.
