નેશનલ સ્પોર્ટ્સ ડે: ગુજરાતમાં ખેલ મહાકુંભ 2025 માટે રજીસ્ટ્રેશન શરૂ
હોકીના જાદુગર મેજર ધ્યાનચંદની જન્મજયંતિ એટલે કે નેશનલ સ્પોર્ટ્સ ડે નિમિત્તે, ગુજરાતના મુખ્યમંત્રી ભૂપેન્દ્ર પટેલે ગુજરાતના સૌથી મોટા રમતોત્સવ, ખેલમહાકુંભ-2025 માટે રજિસ્ટ્રેશનનો પ્રારંભ કરાવ્યો. આ પ્રસંગે, સ્પોર્ટ્સ જર્નાલિસ્ટ એસોસિએશન ઓફ ગુજરાત (SJAG) દ્વારા અમદાવાદમાં એક એવોર્ડ સમારોહનું આયોજન કરવામાં આવ્યું હતું, જેમાં રમતગમત ક્ષેત્રે વિશિષ્ટ સિદ્ધિઓ હાંસલ કરનારા 20 ખેલ મહાનુભાવોને સન્માનિત કરવામાં આવ્યા.
ગુજરાતમાં સ્પોર્ટ્સ કલ્ચરનો વિકાસ
મુખ્યમંત્રી ભૂપેન્દ્ર પટેલે જણાવ્યું કે કોઈપણ રમતમાં ખેલદિલી અનિવાર્ય છે અને આ પ્રકારના સન્માન કાર્યક્રમો આપણા માટે ગર્વની વાત છે. તેમણે વડાપ્રધાન નરેન્દ્રભાઈ મોદીના નેતૃત્વ હેઠળ ગુજરાતમાં વિકસેલા સ્પોર્ટ્સ કલ્ચરની પ્રશંસા કરી. તેમણે કહ્યું કે ‘ખેલે તે ખીલે’ના મંત્ર સાથે 2010માં શરૂ થયેલા ખેલમહાકુંભમાં આ વર્ષે રેકોર્ડબ્રેક 71 લાખથી વધુ ખેલાડીઓએ ભાગ લીધો હતો. વધુમાં, તેમણે અમદાવાદને 2030ના કોમનવેલ્થ ગેમ્સ માટે આદર્શ યજમાન શહેર ગણાવ્યું, જે વિશ્વ કક્ષાના સ્ટેડિયમ અને અત્યાધુનિક સુવિધાઓ ધરાવે છે.
રમતવીરો અને કોચનું સન્માન
આ સમારોહમાં, પદ્મશ્રી અને ઓલિમ્પિક ગોલ્ડ મેડલ વિજેતા મીરાબાઈ ચાનુ ખાસ ઉપસ્થિત રહ્યા હતા. તેમણે ગુજરાતને ‘રમતગમત પ્રિય રાજ્ય’ ગણાવ્યું અને રમતવીરોને સખત તાલીમ અને સમર્પણ પર ધ્યાન કેન્દ્રિત કરવાની સલાહ આપી. સમારોહમાં, જુદા જુદા ક્ષેત્રના ઉભરતા અને ઉત્કૃષ્ટ ખેલાડીઓ અને કોચને એવોર્ડ આપી સન્માનિત કરવામાં આવ્યા. આ એવોર્ડ મેળવનારાઓમાં અમાયરા વરુણ પટેલ (કરાટે), અરહાન હર્ષ (સ્વિમર), રુચિત મોરી (એથ્લેટિક્સ), ઉર્વિલ પટેલ (ક્રિકેટર), ધ્વજ હારિયા (બિલિયર્ડ્સ), અને લાઇફ ટાઇમ એચીવમેન્ટ એવોર્ડ મેળવનાર અમ્પાયર મહેન્દ્ર પંડ્યા અને કોચ એમ.એસ. કુરૈશીનો સમાવેશ થાય છે. આ કાર્યક્રમ ગુજરાતમાં રમતગમતને પ્રોત્સાહન આપવાના સરકારના પ્રયાસો અને ખેલાડીઓના યોગદાનને બિરદાવે છે.
