બિહારમાં RJDની કારમી હાર બાદ યાદવ પરિવારમાં ભંગાણ! રોહિણી આચાર્યએ રાજકારણ અને ‘પરિવારથી નાતો તોડવાની’ કરી જાહેરાત; સંજય યાદવ પર ગંભીર આરોપો
બિહારમાં રાષ્ટ્રીય જનતા દળ (RJD)ની વિધાનસભા ચૂંટણીમાં કારમી હાર બાદ યાદવ પરિવારમાં જ આંતરિક વિખવાદ અને ફૂટ પડવાની ઘટના સામે આવી છે. RJD સુપ્રીમો લાલુ યાદવની દીકરી અને સિંગાપુર સ્થિત ડૉ. રોહિણી આચાર્યએ સોશિયલ મીડિયા પ્લેટફોર્મ ‘X’ (અગાઉ ટ્વિટર) પર એક સનસનાટીપૂર્ણ જાહેરાત કરી છે. તેમણે રાજકારણ અને પોતાના પરિવાર સાથે નાતો તોડવાની વાત કહી છે.
આચાર્યએ કરેલી પોસ્ટમાં RJDના મહત્ત્વપૂર્ણ નેતા અને રાજ્યસભા સાંસદ સંજય યાદવ તથા રમીઝ નામના વ્યક્તિનો ઉલ્લેખ કરીને ગંભીર આરોપો મૂક્યા છે.
રોહિણી આચાર્યની વિવાદાસ્પદ પોસ્ટ:
રોહિણી આચાર્યએ પોતાની પોસ્ટમાં લખ્યું, “હું રાજકારણ છોડી રહી છું અને મારા પરિવારથી નાતો તોડી રહી છું. સંજય યાદવ અને રમીઝે મને આવું જ કરવા કહ્યું હતું અને હું આ સમગ્ર દોષ મારા માથે લઈ રહી છું.”
આ પોસ્ટમાં એક રસપ્રદ અને વિવાદાસ્પદ બાબત એ છે કે રોહિણી આચાર્યએ આ પોસ્ટ બે તબક્કામાં કરી હતી. શરૂઆતમાં, તેમણે માત્ર રાજકારણ છોડવા અને પરિવારથી નાતો તોડવાની વાત લખી હતી. જોકે, બાદમાં તેમણે આ પોસ્ટને એડિટ કરીને તેમાં સંજય યાદવ અને રમીઝના નામનો ઉમેરો કર્યો હતો. (નોંધ: પોસ્ટના બંને વર્ઝન સોશિયલ મીડિયા પર ઉપલબ્ધ છે.) આ સંશોધિત પોસ્ટ પરથી સ્પષ્ટ સંકેત મળે છે કે RJDની આંતરિક ગતિવિધિઓ અને હારનું ઠીકરું તેમના માથે ફોડવામાં આવ્યું છે.
કોણ છે સંજય યાદવ અને રમીઝ?
આ મામલામાં જે બે નામ ચર્ચામાં આવ્યા છે, તેમાંથી સંજય યાદવને RJDના નેતા તેજસ્વી યાદવના મુખ્ય સલાહકાર માનવામાં આવે છે. તેઓ રાજ્યસભા સાંસદ પણ છે અને RJDની નીતિઓ અને રણનીતિઓમાં તેમનો મોટો પ્રભાવ રહેલો છે. બીજી તરફ, રમીઝ એવું નામ છે જે તેજસ્વી યાદવના પડછાયાની જેમ તેમની સાથે રહે છે. જોકે, ઉપલબ્ધ માહિતી અનુસાર રમીઝ હાલમાં RJDમાં કોઈ સત્તાવાર પદ પર નથી.
આચાર્યના આ નિવેદનથી બિહારના રાજકીય વર્તુળોમાં ગરમાવો આવી ગયો છે. RJDની કારમી હાર બાદ પરિવારમાં જ આ પ્રકારે જાહેરમાં ફૂટ પડવી એ પાર્ટીના ભવિષ્ય અને તેજસ્વી યાદવના નેતૃત્વ માટે એક મોટો પડકાર ગણાય છે.
