ભારતને લઈને ટ્રમ્પનો દાવો ખોટો! રશિયાએ આપ્યો સ્પષ્ટ સંદેશ, અમેરિકાને ફટકો
અમેરિકી પ્રમુખ ટ્રમ્પે દાવો કર્યો હતો કે ભારત હવે રશિયા પાસેથી તેલ નહીં ખરીદે. આ મામલે હવે રશિયાએ આકરી પ્રતિક્રિયા આપી છે.
અમેરિકી પ્રમુખ ડોનાલ્ડ ટ્રમ્પે બુધવારે (૧૫ ઓક્ટોબર)ના રોજ દાવો કર્યો હતો કે ભારત હવે રશિયા પાસેથી તેલ નહીં ખરીદે. આ મામલે મોસ્કો તરફથી પ્રતિક્રિયા આવી ગઈ છે. ભારતમાં રશિયાના રાજદૂત ડેનિસ અલીપોવએ જણાવ્યું કે, ભારતના અર્થતંત્ર માટે રશિયન તેલની જરૂરિયાત છે. તેમણે ભારતને રશિયાનો વિશ્વાસપાત્ર ભાગીદાર પણ ગણાવ્યો. અગાઉ, ટ્રમ્પે ભારતથી નારાજ થઈને તેના પર ૫૦ ટકા ટેરિફ લગાવ્યો હતો અને તેઓ ઇચ્છતા ન હતા કે ભારત રશિયા પાસેથી તેલ ખરીદે.
રશિયન રાજદૂત અલીપોવનું નિવેદન
રશિયાના રાજદૂત અલીપોવે કહ્યું, “ભારતના કુલ ક્રૂડ ઓઇલ આયાતનો એક-તૃતીયાંશ ભાગ રશિયામાંથી આવે છે. અમે ભારત માટે એક કિફાયતી વિકલ્પ રહ્યા છીએ. રશિયા અને ભારતની વ્યૂહાત્મક ભાગીદારીને દુનિયામાં સ્થિરતા લાવનારી શક્તિ તરીકે જોવામાં આવે છે. આ સંબંધ વિશ્વાસના પાયા પર ટકેલો છે. અમે ભારતના મુખ્ય વેપારી ભાગીદાર છીએ અને ઊર્જા ક્ષેત્રે ભારતના સૌથી ભરોસાપાત્ર ભાગીદાર છીએ.”
રશિયાએ ટ્રમ્પને શું સંદેશ આપ્યો?
રશિયાએ અમેરિકી પ્રમુખ ડોનાલ્ડ ટ્રમ્પને આકરો સંદેશ આપ્યો. રશિયન રાજદૂતે કહ્યું, “ગ્લોબલ નોર્થ (વિકસિત દેશોનો સમૂહ) અત્યાર સુધી ટેરિફ અને અનેક પ્રકારના પ્રતિબંધો લગાવતું રહ્યું છે. આ દર્શાવે છે કે તેઓ મલ્ટીપોલર (બહુ-ધ્રુવીય) દુનિયાને સ્વીકારવાથી દૂર ભાગી રહ્યા છે. આનાથી વૈશ્વિક શાસન પ્રણાલીમાં સુધારામાં વિલંબ થશે, જે અત્યંત જરૂરી છે.”
ટ્રમ્પના દાવાઓ પર ભારતનું શું કહેવું છે?
ટ્રમ્પના દાવાઓ બાદ ભારતના વિદેશ મંત્રાલયના પ્રવક્તા રણધીર જયસ્વાલે કહ્યું, “ભારત તેલ અને ગેસનો એક મહત્વપૂર્ણ આયાતકાર છે. અસ્થિર ઊર્જા પરિદૃશ્યમાં ભારતીય ગ્રાહકોના હિતોનું રક્ષણ કરવું અમારી નિરંતર પ્રાથમિકતા રહી છે.” તેમણે કહ્યું કે ભારત તેના લોકોના હિતને ધ્યાનમાં રાખીને જ નિર્ણય લે છે.
ઉલ્લેખનીય છે કે, ટ્રમ્પ ભારત અને ચીનથી ઘણા નારાજ છે. ચીન અને અમેરિકા વચ્ચે ટેરિફ વૉર ચાલી રહ્યું છે. ટ્રમ્પે ચીન પર ટેરિફ લગાવ્યું હતું, ત્યારબાદ ચીને પણ વળતી કાર્યવાહી કરી હતી. વળી, તેમણે ભારત પર ૫૦ ટકા ટેરિફ લગાવ્યું હતું.
