SBIનો મોટો નિર્ણય: OnlineSBI અને Yono Lite પર mCASH સુવિધા બંધ, UPI, IMPSનો ઉપયોગ કરવાની સલાહ
ભારતીય સ્ટેટ બેંક 30 નવેમ્બર, 2025 થી OnlineSBI અને Yono Lite પર તેની mCASH સર્વિસ બંધ કરી દેશે. ગ્રાહકો હવે mCASH દ્વારા પૈસા મોકલી કે ક્લેમ કરી શકશે નહીં. SBIએ યુઝર્સને ભવિષ્યમાં તમામ મની ટ્રાન્સફર માટે UPI, IMPS, NEFT અને RTGSનો ઉપયોગ કરવાની સલાહ આપી છે.
ભારતીય સ્ટેટ બેંક (SBI) એ જાહેરાત કરી છે કે તે 30 નવેમ્બર, 2025 પછી OnlineSBI અને Yono Lite પર એમકૅશ મોકલવાની અને ક્લેમ કરવાની સુવિધા બંધ કરી દેશે. આનો અર્થ એ છે કે ગ્રાહકો હવે લાભાર્થી (Beneficiary) રજીસ્ટ્રેશન વિના પૈસા મોકલવા અથવા એમકૅશ લિંક કે એપ્લિકેશન દ્વારા ફંડ ક્લેમ કરવા માટે એમકૅશનો ઉપયોગ કરી શકશે નહીં.
પોતાની સત્તાવાર વેબસાઇટ પર પોસ્ટ કરેલા સંદેશમાં, SBIએ ગ્રાહકોને થર્ડ પાર્ટી લાભાર્થીઓને ફંડ ટ્રાન્સફર કરવા માટે UPI, IMPS, NEFT અને RTGS જેવા અન્ય સુરક્ષિત અને નિયમિત રીતે ઉપયોગમાં લેવાતા ડિજિટલ પેમેન્ટ વિકલ્પોનો ઉપયોગ કરવા વિનંતી કરી છે.
SBIની વેબસાઇટ પરના એક સંદેશ મુજબ, “30 નવેમ્બર પછી OnlineSBI અને Yono Lite માં એમકૅશ (મોકલવાની અને દાવો કરવાની) સુવિધા ઉપલબ્ધ રહેશે નહીં. કૃપા કરીને થર્ડ પાર્ટી લાભાર્થીઓને ફંડ ટ્રાન્સફર કરવા માટે UPI, IMPS, NEFT, RTGS વગેરે જેવા વૈકલ્પિક વ્યવહાર માધ્યમોનો ઉપયોગ કરો.”
mCash કેવી રીતે ઉપયોગ થતું હતું?
Google Play Store પરથી SBI mCash એપ્લિકેશન ડાઉનલોડ કર્યા પછી, લોગ ઇન કરવા માટે MPIN રજીસ્ટર કરવો પડતો હતો. રજીસ્ટર્ડ MPINનો ઉપયોગ કરીને, ગ્રાહકો SBI mCash એપમાં લોગ ઇન કરી શકતા હતા.
mCash માં કઈ સુવિધાઓ હતી?
પાસકોડનો ઉપયોગ કરીને સ્ટેટ બેંકના ગ્રાહક દ્વારા મોકલેલી રકમનો દાવો કરવો.
દાવો કરેલી રકમને કોઈપણ બેંકમાં પોતાના ખાતામાં ટ્રાન્સફર કરવી.
ગ્રાહકો ભવિષ્યના દાવાઓ માટે એકાઉન્ટ નંબર અને IFSC કોડને ‘પસંદગીના’ (Preferred) તરીકે સેટ કરી શકતા હતા.
mCash કેવી રીતે કામ કરતું હતું?
સ્ટેટ બેંક ઓફ ઇન્ડિયા mCASH, પ્રાપ્તકર્તાઓને SBI ગ્રાહકો દ્વારા OnlineSBI અથવા State Bank Anywhere દ્વારા મોકલેલા ફંડનો દાવો કરવાની મંજૂરી આપતું હતું. આ સર્વિસ દ્વારા, ઇન્ટરનેટ બેંકિંગ ધરાવતો કોઈપણ SBI ગ્રાહક લાભાર્થી તરીકે રજીસ્ટર કર્યા વિના, માત્ર પ્રાપ્તકર્તાના મોબાઇલ નંબર અથવા ઇમેઇલ IDનો ઉપયોગ કરીને, રકમ ટ્રાન્સફર કરી શકતો હતો.
પ્રાપ્તકર્તાની બાજુએ, કોઈપણ બેંકમાં ખાતું ધરાવતો કોઈપણ વ્યક્તિ, સ્ટેટ બેંક mCASH મોબાઇલ એપ દ્વારા અથવા OnlineSBI પર આપેલ mCASH લિંક દ્વારા ફંડનો ક્લેમ કરી શકતો હતો. લાભાર્થીને એક સુરક્ષિત લિંક સાથે 8 અંકનો પાસકોડ ધરાવતો SMS અથવા ઇમેઇલ મળતો હતો, જે મોકલનાર દ્વારા પસંદ કરાયેલ પદ્ધતિ પર આધારિત હતો.
UPIનો ઉપયોગ કરીને પૈસા કેવી રીતે મોકલવા?
mCash ગ્રાહકો પૈસા મોકલવા અને પ્રાપ્ત કરવા માટે SBI UPI નો ઉપયોગ કરી શકે છે. BHIM SBI Pay (SBI ની UPI એપ) એક પેમેન્ટ સોલ્યુશન છે જે UPI માં ભાગ લેનાર તમામ બેંકોના ખાતાધારકોને તેમના સ્માર્ટફોનનો ઉપયોગ કરીને પૈસા મોકલવા, પ્રાપ્ત કરવા અને ઓનલાઈન બિલ પેમેન્ટ, રિચાર્જ, ખરીદી વગેરે કરવાની સુવિધા આપે છે.
પૈસા કેવી રીતે ટ્રાન્સફર કરવા (UPI દ્વારા)
સૌ પ્રથમ BHIM SBI Pay એપમાં લોગ ઇન કરો.
ત્યાર બાદ ‘પે’ (Pay) વિકલ્પ પસંદ કરો.
બાદમાં VPA અથવા ખાતું અને IFSC અથવા QR કોડ જેવા કોઈપણ પેમેન્ટ વિકલ્પની પસંદગી કરો.
જરૂરી વિગતો દાખલ કરો.
લિંક કરેલા ખાતામાંથી ડેબિટ એકાઉન્ટ પસંદ કરો અને ‘ટિક’ ચિહ્ન પર ક્લિક કરો.
ત્યાર બાદ વ્યવહારને અધિકૃત કરવા માટે UPI પિન દાખલ કરો.
પેમેન્ટ પૂરું કરવા માટે ફરીથી ‘ટિક’ સાઇન પર ક્લિક કરો.
