ચાંદીના ભાવમાં ચમકારો: MCX પર રૂ. ૨.૩૧ લાખ પાર, જાણો તમારા શહેરના તાજા દર
દેશભરના બુલિયન બજારોમાં સોનાની સાથે સાથે ચાંદીની કિંમતોમાં પણ જોરદાર તેજી જોવા મળી રહી છે. મલ્ટી કોમોડિટી એક્સચેન્જ (MCX) પર ચાંદીના વાયદા ભાવમાં સવારે ૦.૧૫ ટકા એટલે કે રૂ. ૩૩૮ નો વધારો નોંધાતા ભાવ પ્રતિ કિલો રૂ. ૨,૩૧,૮૦૪ ની સપાટીએ પહોંચી ગયા છે. અગાઉના ટ્રેડિંગ સત્રમાં ચાંદી રૂ. ૨,૩૧,૪૬૬ પર બંધ થઈ હતી. સ્થાનિક દિલ્હી બુલિયન બજારમાં તમામ કર સહિત ચાંદીનો ભાવ રૂ. ૨,૩૪,૮૦૦ પ્રતિ કિલો આસપાસ સ્થિર રહ્યો છે. શનિવાર અને રવિવારે બજાર સત્તાવાર રીતે બંધ રહેતું હોવાથી વીકેન્ડ દરમિયાન આ જ ભાવો માન્ય રહેશે.
બીજી તરફ, ગુડરિટર્ન્સના આંકડા અનુસાર છૂટક બજારમાં ચાંદી રૂ. ૨,૪૦,૦૦૦ પ્રતિ કિલોના મનોવૈજ્ઞાનિક સ્તર પર ટ્રેડ થઈ રહી છે. વૈશ્વિક બજારની વાત કરીએ તો આંતરરાષ્ટ્રીય સ્તરે સ્પોટ સિલ્વર ૪ ટકાથી વધુના ઉછાળા સાથે પ્રતિ ઔંસ $૬૩.૮૦ થી $૬૪.૧૭ ના સ્તરે પહોંચી ગઈ છે. ન્યૂ યોર્ક વાયદા બજારમાં પણ ચાંદી ૩.૪૪ ટકા વધીને $૬૧.૬૬ પ્રતિ ઔંસ પર બંધ થઈ હતી.
ચાંદીની શુદ્ધતા અનુસાર આજના ભાવ
બુલિયન માર્કેટના ધોરણો મુજબ ચાંદીની શુદ્ધતાના આધારે તેના દરો નક્કી થાય છે:
-
૯૯૯ ફાઈન સિલ્વર (સૌથી શુદ્ધ ચાંદી): ૧ કિલોનો ભાવ ₹૨,૩૨,૬૨૦, ૧ ઔંસનો ભાવ ₹૬,૫૯૫ અને ૧ તોલાનો ભાવ ₹૨,૭૧૩ ચાલી રહ્યો છે.
-
૯૨૫ સ્ટર્લિંગ સિલ્વર: ઘરેણાં અને વાસણો માટે વપરાતી આ ચાંદીનો ભાવ ૧ કિલોએ ₹૨,૧૫,૧૭૪, ૧ ઔંસનો ₹૬,૧૦૦ અને ૧ તોલાનો ₹૨,૫૧૦ છે.
-
૯૦૦ સિક્કા ચાંદી: ૧ કિલો ચાંદીનો ભાવ ₹૨,૦૯,૩૫૮, ૧ ઔંસનો ₹૫,૯૩૫ અને ૧ તોલાનો ₹૨,૪૪૨ છે.
-
૮૦૦ જર્મન સિલ્વર: ૧ કિલોનો ભાવ ₹૧,૮૬,૦૯૬, ૧ ઔંસનો ₹૫,૨૭૬ અને ૧ તોલાનો ભાવ ₹૨,૧૭૧ નોંધાયો છે.
દેશના વિવિધ શહેરોમાં ચાંદીના દર
દેશના મોટાભાગના પ્રમુખ શહેરો જેવા કે દિલ્હી, મુંબઈ, કોલકાતા, ચેન્નાઈ, પટના, લખનૌ, મેરઠ, અયોધ્યા, કાનપુર, ગાઝિયાબાદ, નોઈડા, ગુરુગ્રામ, ચંદીગઢ, જયપુર, લુધિયાણા, ગુવાહાટી, ઇન્દોર, દેવઘર અને પુણેમાં ૧૦ ગ્રામ ચાંદીનો ભાવ ₹૨,૪૦૦, ૧૦૦ ગ્રામનો ભાવ ₹૨૪,૦૦૦ અને ૧ કિલો ચાંદીનો ભાવ ₹૨,૪૦,૦૦૦ નોંઘાયો છે. ગુજરાતના અમદાવાદ અને વડોદરા શહેરમાં પણ ચાંદીના આ જ સમાન દર જોવા મળ્યા છે.
તેજી પાછળના મુખ્ય કારણો અને નિષ્ણાતોનો મંજૂરી આપતો સૂર
આંતરરાષ્ટ્રીય બજારમાં અમેરિકન ડૉલરમાં આવેલી નરમાઈ અને કાચા તેલના ભાવ ઘટવાને કારણે રોકાણકારો માટે ચાંદીમાં રોકાણ કરવું વધુ આકર્ષક બન્યું છે. વિદેશી બજારોમાં થયેલા વધારાનો સીધો સકારાત્મક પ્રભાવ ભારતીય બજાર પર પડ્યો છે.
લેમન માર્કેટ્સ ડેસ્કના રિસર્ચ હેડ ગૌરવ ગર્ગના જણાવ્યા મુજબ, રોકાણકારોનો ઉત્સાહ અને બુલિયન પ્રત્યેનો સુધારેલો દ્રષ્ટિકોણ ચાંદીની કિંમતોને ઉપર લઈ જઈ રહ્યો છે. તો બીજી તરફ કોટક સિક્યોરિટીઝના કોમોડિટી રિસર્ચના એવીપી કૈનાત ચેનવાલાએ ઉમેર્યું કે વિદેશી બજારોમાં સ્પોટ સિલ્વર $૬૪ પ્રતિ ઔંસની સપાટી વટાવી ચૂકી છે. હાલ સમગ્ર વિશ્વના રોકાણકારોની નજર યુએસ નોન-ફાર્મ પેરોલ રિપોર્ટ પર છે, જેના પરથી યુએસ ફેડરલ રિઝર્વ દ્વારા વ્યાજદરમાં કપાત અંગેના ભાવિ સંકેતો પ્રાપ્ત થશે.
