શિયાળામાં કોફીની ચુસ્કી થશે સસ્તી! વૈશ્વિક બજારમાં ભાવ ઘટ્યા, જાણો મુખ્ય કારણો

ફુગાવાના સમયમાં રાહતના સમાચાર: શિયાળાની ઋતુ પૂર્વે કોફીના ભાવો કેમ ઘટી રહ્યા છે? વિગતવાર વિશ્લેષણ

જો તમે પણ સવારના પ્રારંભે કે સાંજે ગરમાગરમ કોફી પીવાના શોખીન છો, તો આવનારો શિયાળો તમારા માટે આર્થિક રાહત લઈને આવી રહ્યો છે. તાજેતરના દિવસોમાં આંતરરાષ્ટ્રીય બજારમાં કોફીના ભાવોમાં નોંધપાત્ર ઘટાડો જોવા મળ્યો છે. નિષ્ણાતોના મતે, આંતરરાષ્ટ્રીય સ્તરે કોફીનું ઉત્પાદન વૈશ્વિક વપરાશ કરતા ઘણું વધવાની સંભાવના છે. આ વધારાના પુરવઠા (Global Surplus) ને કારણે કોફીના ભાવો ઘટ્યા છે, જેની સકારાત્મક અસર આગામી શિયાળાની ઋતુ દરમિયાન ભારતીય બજારમાં પણ જોવા મળશે.

સપ્ટેમ્બર મહિનામાં વૈશ્વિક ભાવોમાં ઘટાડો

ઇન્ટરનેશનલ કોફી ઓર્ગેનાઇઝેશન (ICO) ના તાજેતરના માસિક અહેવાલ મુજબ, સપ્ટેમ્બર મહિનામાં કોફીના સંયુક્ત ભાવ સૂચક (Composite Indicator) માં સરેરાશ ૮.૭ ટકાનો ઘટાડો નોંધાયો છે. ઓગસ્ટ મહિનામાં જે દર પ્રતિ પાઉન્ડ ૨૮૭.૨૯ સેન્ટ હતો, તે ઘટીને સપ્ટેમ્બરમાં ૨૬૨.૧૮ સેન્ટ પ્રતિ પાઉન્ડ રહ્યો છે.

ICO દ્વારા ટ્રેક કરવામાં આવતી કોફીની ચારેય મુખ્ય શ્રેણીઓમાં ઘટાડો જોવા મળ્યો છે. કોલમ્બિયન માઇલ્ડ્સના ભાવ ૮.૧ ટકા ઘટીને ૩૫૬.૧૫ સેન્ટ પ્રતિ પાઉન્ડ, અન્ય માઇલ્ડ્સના ભાવ ૮.૮ ટકા ઘટીને ૩૨૯.૪૪ સેન્ટ પ્રતિ પાઉન્ડ, બ્રાઝિલિયન નેચરલ્સના ભાવ ૯.૯ ટકા ઘટીને ૨૯૦.૧૯ સેન્ટ પ્રતિ પાઉન્ડ અને રોબસ્ટા કોફીના ભાવ ૭.૩ ટકા ઘટીને ૧૬૭.૪૯ સેન્ટ પ્રતિ પાઉન્ડ પર આવી ગયા છે.

બ્રાઝિલમાં રેકોર્ડ ઉત્પાદન અને સપ્લાયની સ્થિતિ

કોફીના ભાવો ઘટવા પાછળનું સૌથી મોટું કારણ વિશ્વના સૌથી મોટા કોફી ઉત્પાદક દેશ બ્રાઝિલમાં લણણીનું ઉત્કૃષ્ટ પ્રદર્શન છે. ઓગસ્ટના અંત સુધીમાં બ્રાઝિલમાં આશરે ૯૭ ટકા પાકની લણણી પૂર્ણ થઈ ગઈ હતી. બ્રાઝિલની નેશનલ સપ્લાય કંપની (CONAB) એ વર્ષ ૨૦૨૬ માટે કોફી ઉત્પાદનના અંદાજને વધારીને રેકોર્ડ ૬૭.૬ મિલિયન બેગ (પ્રતિ બેગ ૬૦ કિલોગ્રામ) કર્યો છે.

ઝેલેન્સકીનો ડોનાલ્ડ ટ્રમ્પ અને ક્રેમલિનને સ્પષ્ટ જવાબ

“મેં કહ્યું એટલે રશિયા-યુક્રેન રાજી થયા!” શાંતિ કરાર પર અમેરિકી રાષ્ટ્રપતિ ડોનાલ્ડ ટ્રમ્પનો ચોંકાવનારો દાવો

બીજી તરફ, લણણી દરમિયાન પડેલા અનિયમિત વરસાદને કારણે બીજની ગુણવત્તા પર આંશિક અસર ચોક્કસ પડી છે, પરંતુ બજારમાં જથ્થો વિપુલ પ્રમાણમાં ઉપલબ્ધ છે.

વૈશ્વિક નિકાસ અને સપ્લાય સરપ્લસનો અંદાજ

ઓગસ્ટ મહિનામાં વૈશ્વિક સ્તરે ગ્રીન કોફી બીન્સની નિકાસ ૧૫.૬ ટકા વધીને ૧૦.૯૪ મિલિયન બેગ નોંધાઈ હતી. તમામ પ્રકારની કોફીને સાંકળી લેવામાં આવે તો ઓગસ્ટમાં કુલ વૈશ્વિક નિકાસ વાર્ષિક ધોરણે ૧૪.૬ ટકા વધીને ૧૨.૫૫ મિલિયન બેગ થઈ હતી. પ્રદેશવાર નિકાસમાં એશિયા-ઓશનિયામાં ૨૩.૧ ટકા અને દક્ષિણ અમેરિકામાં ૨૦.૨ ટકાની મજબૂત વૃદ્ધિ નોંધાઈ છે.

વર્ષ ૨૦૨૫-૨૬ ના કોફી વર્ષ (ઓક્ટોબરથી સપ્ટેમ્બર) માટે ICO એ અંદાજ મૂક્યો છે કે વૈશ્વિક ઉત્પાદન ૪.૪ ટકા વધીને ૧૮૩.૬ મિલિયન બેગ થશે, જ્યારે વપરાશ ૦.૮ ટકા ઘટીને ૧૮૦.૬ મિલિયન બેગ રહેશે. આના પરિણામે બજારમાં સતત ચાર વર્ષની અછત બાદ આ વખતે ૩ મિલિયન બેગનો પ્લસ સરપ્લસ જોવા મળશે.

વધતું વૈશ્વિક માર્કેટ અને ભવિષ્યની સંભાવનાઓ

ગ્રાન્ડ વ્યૂ રિસર્ચના રિપોર્ટ અનુસાર, વર્ષ ૨૦૨૫ માં વૈશ્વિક કોફી બજારનું કદ ૨૪૯.૩ અબજ ડોલર હતું, જે ૨૦૨૬ માં વધીને ૨૬૩.૫ અબજ ડોલર થવાનો અંદાજ છે. એશિયા-પેસિફિક જેવા ઊભરતા બજારોમાં કોફીનો ક્રેઝ ઝડપથી વધી રહ્યો છે. ૫.૨ ટકાના સંયુક્ત વાર્ષિક વૃદ્ધિ દર (CAGR) સાથે વર્ષ ૨૦૩૩ સુધીમાં વૈશ્વિક કોફી બજાર વધીને ૩૭૫.૫ અબજ ડોલર સુધી પહોંચવાની ધારણા છે.