સૂવિધાઓથી સજ્જ ગ્રામ પંચાયત અને ડિજિટલ સેવાઓ
મહેસાણાના ઊંઝા તાલુકામાં વસેલું મક્તુપુર ગામ 6000 જેટલી વસતી ધરાવે છે. આજે આ ગામ ટેકનોલોજી અને પરંપરાના સુમેળનું ઉત્તમ ઉદાહરણ બની રહ્યું છે. અહીં રોજિંદી જીવનશૈલીમાં આધુનિક ઉપકરણો સાથે સાથે લોકસંસ્કૃતિનું જતન થતું જોવા મળે છે.
આર્થિક મજબૂતી અને વ્યવસાયિક વિકાસ
ગામના મોટાભાગના પરિવારો કન્સ્ટ્રક્શન વ્યવસાય સાથે સંકળાયેલા છે. આ કારણે મક્તુપુર આર્થિક રીતે સશક્ત બન્યું છે. ગામની આજુબાજુ સુરક્ષિત રહેવા માટે 40 જેટલા કેમેરા લગાવાયા છે. ગ્રામ પંચાયતનું સંપૂર્ણ કાર્ય વર્ગીકૃત છે અને ગામજનો ઘરે બેઠા વેરો ઓનલાઈન ભરવાનું સરળતાથી કરી શકે છે.
91% સાક્ષરતા સાથે શિક્ષણમાં આગવી ઓળખ
ગામમાં ધોરણ 1થી 12 સુધીની શાળાઓ છે. તેમજ આરોગ્ય કેન્દ્ર, પશુ દવાખાનું, આધુનિક પુસ્તકાલય, કમ્યુનિટી હોલ અને ફિઝિયોથેરાપી કેન્દ્ર જેવી અનેક સેવાઓ ઉપલબ્ધ છે. ગામનો સાક્ષરતા દર આશરે 91% છે, જે અહીંની શૈક્ષણિક જાગૃતિનું પ્રતિબિંબ છે.
દત્ત સરોવર – સૌંદર્ય અને શ્રદ્ધાનું પ્રતિક
ગામમાં દત્ત સરોવર રૂ.6 કરોડના ખર્ચે નમૂનાત્મક રીતે તૈયાર થયું છે. તેની રચના રિવરફ્રન્ટ જેવી દેખાવા માટે કરાઈ છે. સરોવર પાસે આવેલ દત્ત ભગવાનનું મંદિર ગામજનમાં શ્રદ્ધાનું કેન્દ્ર છે અને આજકાલ મક્તુપુરની ઓળખ બની ગયું છે.
ઈતિહાસના પાનાઓથી જીવંત થતું ગામ
મક્તુપુરના ઉત્તર ભાગે ગૌચર જમીનમાં મળેલા શિલાલેખો, ઈંટો, અને પ્રાચીન ધાતુઓના નમૂનાઓ ઈતિહાસના રહસ્યો રજૂ કરે છે. મળી આવેલા શિલાલેખમાં દેવનાગરી લખાણથી સ્પષ્ટ થાય છે કે આ વિસ્તારમાં જૈન ધર્મનું જૂનું સ્થાન હતું.
ભાઈચારો અને વિવિધતામાં એકતા
મક્તુપુરમાં વિવિધ જાતિ અને પાટીદાર શાખાઓના લોકો સ્નેહભાવથી જીવન વિતાવે છે. ગામમાં સિદ્ધેશ્વરી માતાનું મંદિર ધાર્મિક જીવનનું કેન્દ્ર છે. અહીં હિંદુ, મુસ્લિમ અને અન્ય વર્ણના લોકો ભાઈચારા સાથે જીવન જીવે છે, જે ભારતીય સંસ્કૃતિની ભાવનાને પ્રતિબિંબિત કરે છે.
