ભારત અને શ્રીલંકા વચ્ચે રમાયેલી પહેલી T20 મેચમાં રવીન્દ્ર જાડેજાની ફિલ્મી સ્ટાઈલ વાઈરલ થઈ રહી છે. તેણે રિકવરી સમયે પુષ્પાના ડાયલોગ બોલ્યા પછી આજે મેચ દરમિયાન વિકેટ લીધા પછી પણ પુષ્પાનું હુક સ્ટેપ સેલિબ્રેશન કર્યું હતું. તો બીજી બાજુ મેચ પહેલા યુઝવેન્દ્ર ચહલે રવીન્દ્ર જાડેજાનો ફિમેલ ફિલ્ટર વાળો ફોટો શેર કર્યો હતો. જોકે આ અંગે જાડેજાએ હજુ સુધી કોઈ પ્રતિક્રિયા આપી નથી.
10મી ઓવરમાં રવીન્દ્ર જાડેજાએ દિનેષ ચાંદિમલને પેવેલિયન ભેગો કર્યો હતો. બાપુએ ઓફ સ્ટમ્પ પર બોલ ફેંક્યો હતો જેમાં આક્રમક શોટ મારવા જતા દિનેશ કોટ બિહાઈન્ડ આઉટ થઈ ગયો હતો. ઉલ્લેખનીય છે કે રિકવરી પછીની કમબેક મેચમાં આ જાડેજાની પહેલી વિકેટ હોવાથી તેણે પુષ્પા સ્ટાઈલમાં સેલિબ્રેશન કર્યું હતું.
જાડેજાએ કમબેક મેચમાં વિકેટ લીધી અને પુષ્પાનો હુક સ્ટેપ કર્યો એ જોઈને રોહિત પણ ખુશ થઈ ગયો હતો. તે તાત્કાલિક જાડેજા પાસે દોડીને આવ્યો અને ભેટી પડ્યો હતો. તમને જણાવી દઈએ કે આ એકતરફી મેચમાં જાડેજાએ બોલિંગની સાથે શાનદાર ફિલ્ડિંગ કરી ભારતને મેચ જીતવામાં મહત્ત્વપૂર્ણ યોગદાન આપ્યું હતું.
ઈન્ડિયન ટીમના ઓલરાઉન્ડર રવીન્દ્ર જાડેજા રિકવરી સમયે અવારનવાર ફિલ્મી લુકમાં જોવા મળી રહ્યો હતો. તેવામાં ફરી એકવાર જાડેજા પુષ્પાઃ ધ રાઈઝ ફિલ્મના એક્ટર અલ્લુ અર્જુનની જેમ દાઢી-મૂછને તાવ આપી અનોખા રૂપમાં તસવીર શેર કરી હતી. તેવામાં બાપુની આ તસવીર ગણતરીની મિનિટોમાં સોશિયલ મીડિયામાં ધૂમ મચાવવા લાગી હતી. યૂઝર્સ આ તસવીરને જોઈને એવું કહેવા લાગ્યા કે રવીન્દ્ર જાડેજાને પુષ્પા-2ના બીજા ભાગમાં લીડ રોલ મળી જવો જોઈએ. તે અલ્લુ અર્જુનને સારી કોમ્પિટિશન આપી રહ્યા છે. તો બીજી બાજુ યુઝર્સે અવાર-નવાર ઈન્ડિયન સિનેમાની પોસ્ટ કરતા ઓસ્ટ્રેલિયન પ્લેયર ડેવિડ વોર્નરને પણ ચેતવણી આપી દીધી છે.
