સુમિત નાગલનો નવો સંકલ્પ: ઈજાઓ અને હારના સંઘર્ષ વચ્ચે પોતાના ખેલને સુધારવા પર આપ્યું ધ્યાન
પુણેના બાલેવાડી ટેનિસ સ્ટેડિયમના લોકર રૂમમાં બેસીને સુમિત નાગલ જ્યારે ‘સેડ મ્યુઝિક’ સાંભળી રહ્યા હતા, ત્યારે તેમના મનમાં અનેક વિચારો ચાલી રહ્યા હતા. એટીપી ચેલેન્જરના બીજા રાઉન્ડમાં બ્રિટનના ફેલિક્સ ગિલ સામે 2 કલાક અને 37 મિનિટની મેરેથોન મેચમાં હાર્યા બાદ નાગલ ભાવુક થઈ ગયા હતા. હાર પચાવવી હંમેશા મુશ્કેલ હોય છે, પરંતુ આ વખતે નાગલ માટે આ અનુભવ કંઈક અલગ હતો.
તેમણે જણાવ્યું હતું કે, “આ હારે મને મારી જાત સાથે બેસીને વિચારવા મજબૂર કર્યો કે હું જીવનમાં શું કરવા માંગુ છું”. નાગલના મતે જીત અને હાર એ રમતનો એક ભાગ છે, પરંતુ છેલ્લા કેટલાક અઠવાડિયામાં તેમનું પ્રદર્શન તેમની અપેક્ષા મુજબનું રહ્યું ન હતું.
ઈજાઓ સામે સતત જંગ
28 વર્ષીય સુમિત નાગલ પોતાની બેઝલાઈન ગેમ માટે જાણીતા છે અને તેમણે રોજર ફેડરર તેમજ ડેનિયલ મેદવેદેવ જેવા દિગ્ગજોનો સામનો કર્યો છે. જોકે, તેમના મજબૂત ઈરાદાઓ સામે તેમનું શરીર વારંવાર અવરોધ બને છે. તાજેતરમાં જ જાન્યુઆરીમાં થાઈલેન્ડમાં રમાયેલી મેચ દરમિયાન તેમના જમણા હિપ ફ્લેક્સરમાં ખેંચાણ આવ્યું હતું.
હરિયાણાના ઝજ્જરના વતની એવા નાગલે 2015 માં પ્રોફેશનલ કરિયરની શરૂઆત કરી હતી, પરંતુ ઈજાઓને કારણે તેઓ ભાગ્યે જ આખી સીઝન રમી શક્યા છે. આમ છતાં, જ્યારે પણ તેઓ ફિટ રહ્યા છે, ત્યારે તેમણે શાનદાર પ્રદર્શન કર્યું છે અને જુલાઈ 2024 માં તેઓ કરિયરના સર્વશ્રેષ્ઠ 68મા ક્રમે પહોંચ્યા હતા.
આત્મવિશ્વાસ અને રમતની ફિઝિકાલિટી
નાગલ માને છે કે ટોચના 100 ખેલાડીઓમાં સ્થાન મેળવવા માટે આત્મવિશ્વાસ મોટી ભૂમિકા ભજવે છે. તેમણે કહ્યું, “જ્યારે તમે આત્મવિશ્વાસ સાથે રમો છો ત્યારે બધું ઓટોમેટિક થાય છે”. હાલમાં તેઓ કુલા પર પટ્ટી બાંધીને રમી રહ્યા છે, જેના કારણે કેટલીકવાર તેઓ દબાણ ઝીલવામાં ખચકાટ અનુભવે છે. તેમ છતાં, આ મુશ્કેલીઓ વચ્ચે પણ તેઓ ભારતની નંબર 1 ટેનિસ ખેલાડી છે.
કોર્ટની બહાર લાવ્યા મોટો ફેરફાર
આ વર્ષે નાગલે પોતાની રમત અને જીવનશૈલીમાં કેટલાક મહત્વના ફેરફાર કર્યા છે:
વધારાની મહેનત: તેઓ હવે વોર્મ-અપ અને કૂલ-ડાઉન માટે દરરોજ એક વધારાનો કલાક ફાળવી રહ્યા છે.
જિમ ટ્રેનિંગ: ઈજા હોવા છતાં તેઓ બીજા જ દિવસે જિમમાં જઈને કસરત કરવાનું ચૂકતા નથી.
રમતનું મિશ્રણ: નેટ સુધી આવીને રમત રમવાની નવી ટેકનિકો પર પણ તેઓ કામ કરી રહ્યા છે.
