અડાજણ વિસ્તારમાં આવેલ ખાનગી શાળામાં વાલી મિટિંગ દરમ્યાન વાલી અને શાળાના કલાર્ક વચ્ચે મારામારી તેમજ ધાકધમકી આપી હોવાના સામસામે આક્ષેપો થયા છે.જે સમગ્ર મામલો અડાજણ પોલીસ મથક પહોંચતા બંને પક્ષના લોકોની લેખિતમાં અરજી લઈ આગળની કાર્યવાહી હાથ ધરવામાં આવી હતી.
અડાજણ વિસ્તારમાં આવેલ એલ.પી.સવાણી શાળામાં આજ રોજ એક વાલી મિટિંગ હતી. તે દરમ્યાન આ વાલી મિટિંગમાં જુનિયર કેજીમાં અભ્યાસ કરતી વિદ્યાર્થીનીના વાલી પણ હાજર રહ્યા હતા. છેલ્લા કેટલાક દિવસોથી વિદ્યાર્થીના વાલી અને શાળા સંચાલકો વચ્ચે ફી ને લઈ વિવાદ પણ ચાલી આવ્યો છે. આજ રોજ વાલી મિટિંગ પુરી થયા બાદ શાળાના કલાર્ક ધવલ પટેલ દ્વારા વિધાર્થીની ની માતા સુનિતા પરમાર ને અપશબ્દો બોલવામાં આવ્યા હોવાના આરોપ મુકવામાં આવ્યા હતા. જેને લઈ સુનિતાબેને કલાર્ક ધવલ પટેલને સભ્યતામાં વાત કરવા જણાવી હતી. પરંતુ ક્લાર્કના વર્તનથી રોષે ભરાયેલી સુનિતાબેને હાથ ઉપાડવાનો પ્રયાસ કર્યો હતો.
વાલીના આક્ષેપોને શાળાના કલાર્ક દ્વારા ફગાવવામાં આવ્યા હતા. કલાર્ક ધવલ પટેલે જણાવ્યું હતું કે,વાલી અને શાળા સંચાલકો વચ્ચે વિવાદ ચાલી રહ્યો છે. વાલી દ્વારા પોતાની બાળકીને ગોંધી રાખવાનો મારા પર આરોપ મુકવામાં આવ્યો હતો. જે વાલી દ્વારા મારા પર બદલાની ભાવનાથી આરોપો મુકવામાં આવી રહ્યા છે. વાલી દ્વારા આજ રોજ મારા પર હુમલાનો પ્રયાસ કરવામાં આવ્યો અને જાણથી મારી નાખવાની ધમકી આપવામાં આવી હતી. જેથી પોલીસ મથકે આ બાબતે લેખિતમાં ફરિયાદ આપવામાં આવી છે.
અત્રે ઉલ્લેખનીય છે કે વાલી અને શાળાના કલાર્ક દ્વાર એકબીજા પર આક્ષેપો પર કરવામાં આવ્યા છે. ત્યારે આ ઘટનામાં કેટલું તથ્ય રહેલું છે ,તે પોલીસનો તપાસનો વિષય બની રહે છે. જો કે છેલ્લા કેટલાક દિવસથી એલ.પી.સવાણી શાળા ના સંચાલકો અને વાલી વચ્ચે ફી ના મુદ્દે ચાલી આવતો વિવાદ મુખ્ય કારણ હોવાનું જાણવા મળે છે.
