SURAT: ધન્વંતરી રથમાં એક્સપાયરી ડેટવાળી દવાઓ અપાતી હોવાનો કોંગ્રેસનો આક્ષેપ

શહેરના પુણા વિસ્તારમાં ધન્વંતરી રથમાં એકસ્પાયરી ડેટની દવા આપવામાં આવતી હોવાનો આક્ષેપ કરવામાં આવ્યો છે. કોરોનાથી રક્ષણ મેળવવા અને બાળકોમાં લોહીની ઉણપ દૂર થાય તે માટેની દવા લોકોને આપવામાં આવી હતી. જો કે, આ દવા ઓગષ્ટ માસમાં જ એક્સપાયર થઈ હોવાનું બહાર આવ્યું છે. પુણા વિસ્તારના લોકોની ફરિયાદ બાદ કોંગ્રેસના સભ્યોએ ધન્વંતરી રથની ચકાસણી કરતાં મોટી મત્રામાં એકસ્પાયરી ડેટની દવા સાથે આગામી મહિને એક્સપાયરી થાય છે તેવી દવાનો જથ્થો પણ મળી આવ્યો હતો. સુરતમાં કોરોના સંક્રમણને અટકાવવા શહેરમાં 100થી વધુ ધન્વંતરી રથ વિવિધ જગ્યાઓ પર દવાઓનું વિતરણ કરી રહી છે. જેમાં ઉકાળા, આર્યુવેદ અને હોમિયોપેથી સાથે અન્ય દવાનું વિતરણ થઈ રહ્યું છે. કોંગ્રેસના કોર્પોરેટર દિનેશ સાવલીયા અને શિક્ષણ સમિતિના સભ્ય સુરેશ સુહાગિયાએ જણાવ્યું હતું કે, આજે વરાછા ઝોનના પુણા વિસ્તારની સીતાનગર સોસાયટીમાં ધન્વંતરી રથ આવ્યો અને લોકોને દવાનું વિતરણ કરાઈ હતી. સુરતમાં ધન્વંતરી રથમાં એક્સપાયરી ડેઈટની દવાનું કૌભાંડ ચાલી રહ્યું હોવાનો કોંગ્રેસના કોર્પોરેટર દ્વારા આક્ષેપ થઈ રહ્યો છે. સુરતમાં જ 100 કરતાં વધુ ધન્વંતરી રથ ચાલી રહ્યાં છે. તેની સાથે રાજ્યભરમાં હજારોની સંખ્યમાં ધન્વંતરી રથમાં આ જ પ્રકારની દવા હોવાની શંકા થઈ રહી છે.