સચિન જીઆઈડીસીમાં રહેતા શ્રમજીવી પરિવારની 4 વર્ષની બાળકી રાત્રે પિતા સાથે ઘર નજીક રામલીલા જોવા ગઈ હતી, ત્યારે પિતા આરતી લેવા માટે જતા ભીડમાંથી અજાણ્યાએ બાળકીનું અપહરણ કર્યું હતું. પરિવાર આખી રાત શોધખોળ કરતું રહ્યું અને ગત રોજ સવારે ચાર વાગે બાળકી કડકડતી ઠંડીમાં જાતે જ ઘરે આવી હતી. બાળકીને સમજાવીને પરિવાર દ્વારા પૂછતા તેણે પોતાની સાથે તમાચા મારી ચપ્પુની અણીએ દુષ્કર્મ તેમજ સૃષ્ટિ વિરુદ્ધનું કૃત્ય થયું હોવાનું જણાવ્યું હતું. ત્યારબાદ પોલીસને જાણ કરતા અજાણ્યા વિરૂદ્ધ દુષ્કર્મનો ગુનો નોંધી તપાસ હાથ ધરી હતી. જેમાં પોલીસે સમગ્ર વિસ્તારના સીસીટીવીની તપાસ હાથ ધરી હતી. જેમાં એક શંકાસ્પદ યુવક કેદ થઈ ગયો છે. હાલ પોલીસ આ મામલે વધુ તપાસ કરી રહી છે.
મૂળ બિહારનો પ્રવિણ(નામ બદલ્યું છે) પરિવાર સાથે સચીન જીઆઈડીસીમાં રહે છે. પરિવારમાં પત્ની ઉપરાંત 4 વર્ષની દીકરી બબલી(નામ બદલ્યું છે). રાત્રે 11 વાગ્યા બાદ બબલી તેના પિતા સાથે ઘરેથી આશરે 100 મીટરના અંતરે રામલીલા જોવા ગઈ હતી. તેના પિતા આશરે પોણા 12 વાગે આરતી લેવા ગયા ત્યારે બબલીનો હાથ છોડ્યો હતો. એકાદ મિનિટમાં આરતી લઈને પ્રવિણ બબલી પાસે આવ્યો ત્યારે દીકરી ન હતી. પ્રવિણ અને અન્યોએ શોધખોળ કરી પરંતુ મળી ન હતી. રાત્રે બધાં લોકોએ આસપાસ જોઈ પરંતુ સગડ મળ્યાં ન હતાં. મળસ્કે ચાર વાગ્યે બબલી જાતે ઘરે આવી હતી. ત્યારબાદ પણ પરિવારે પોલીસને જાણ કરી ન હતી. બબલીના ગુપ્ત ભાગે લોહીનાં ડાઘ હતા. આશરે 11:30 કલાકે પિતાએ પોલીસને જાણ કરી હતી. ત્યારે પોલીસ આરોપીને શોધવામાં રહેતાં બાળકીને બપોરે 3:00 કલાકે સારવાર માટે સિવિલમાં લવાઇ હતી. પોલીસે આ ગુનામાં અજાણ્યા આરોપી વિરુદ્ધ અપહરણ – બળાત્કાર અને પોક્સો એક્ટ હેઠળનો ગુનો નોંધી ટીમ બનાવી આરોપીની શોધખોળ આદરી છે.
