આઈકોનિક રોડ, રિવરફ્રન્ટ અને બ્રિજ જેવી યોજનાઓ સાથે સુરેન્દ્રનગરના વિકાસને મળશે નવી ગતિ
સુરેન્દ્રનગર મહાનગરપાલિકા વિસ્તારમાં જનસુખાકારી અને આંતરમાળખાકીય સુવિધાઓ વધારવા માટે નાયબ મુખ્ય દંડક જગદીશભાઈ મકવાણાના હસ્તે હવામહેલ ખાતે કુલ રૂ. ૧૩.૫૯ કરોડના વિવિધ વિકાસકામોનું ઈ-ખાતમુહૂર્ત અને લોકાર્પણ કરવામાં આવ્યું હતું. આ પ્રસંગે તેમણે જણાવ્યું હતું કે રાજ્ય સરકાર દ્વારા ફાળવવામાં આવેલી ગ્રાન્ટથી શહેરની કાયાપલટ થશે. ખાસ કરીને વઢવાણનો પંજાબ બેંક વાળો રસ્તો અને ૮૦ ફૂટ રોડને ‘આઈકોનિક રોડ’ તરીકે વિકસાવવાની નેમ વ્યક્ત કરવામાં આવી છે, જે શહેરના આધુનિકીકરણમાં મહત્વની ભૂમિકા ભજવશે.
રિવરફ્રન્ટ અને બ્રિજ નિર્માણ દ્વારા ટ્રાફિક સમસ્યાનું નિવારણ
શહેરના આગામી આયોજન અંગે માહિતી આપતા જણાવાયું હતું કે કોલેજથી ગેબનશાહ પીર સુધીના રિવરફ્રન્ટ માટે રૂ. ૪૮ કરોડનું ટેન્ડર મંજૂર થઈ ગયું છે. આ ઉપરાંત રતનપરથી વઢવાણ સુધીના રિવરફ્રન્ટ માટે રૂ. ૨૬૫ કરોડની મહત્વાકાંક્ષી યોજના સરકારમાં રજૂ કરવામાં આવી છે. શહેરમાં ટ્રાફિકની સમસ્યાના કાયમી ઉકેલ માટે મેક્સન સર્કલથી દાળમિલ રોડ સુધી રૂ. ૬૯ કરોડના ખર્ચે નવો બ્રિજ બનાવવાની દરખાસ્ત હાલ અંતિમ તબક્કે છે, જેનાથી નાગરિકોના પરિવહનમાં મોટી રાહત થશે.
શહેરી સૌંદર્યીકરણ અને આધુનિક સુવિધાઓનો શિલાન્યાસ
કાર્યક્રમ દરમિયાન રૂ. ૯.૩૫ કરોડના ખર્ચે સાકાર થનારા વિવિધ પ્રોજેક્ટ્સનો શિલાન્યાસ કરવામાં આવ્યો હતો. જેમાં બસ સ્ટેશન અને બસ સ્ટોપના સંચાલન માટે રૂ. ૩.૬૯ કરોડ ફાળવાયા છે. શહેરના સૌંદર્યીકરણ માટે વિવિધ સર્કલો પર આકર્ષક સ્કલ્પચર બનાવવા રૂ. ૭૭ લાખ અને ઐતિહાસિક અજરામર ટાવર સર્કલના આધુનિકીકરણ માટે રૂ. ૬૫ લાખ ખર્ચવામાં આવશે. વહીવટી પ્રક્રિયાને વેગ આપવા મહાનગરપાલિકાની ઓફિસ બિલ્ડીંગના બીજા અને ત્રીજા માળના બાંધકામ માટે પણ રૂ. ૩.૨૪ કરોડની જોગવાઈ કરવામાં આવી છે.
દૂધરેજ તળાવનું નવીનીકરણ અને બગીચાઓનું નિર્માણ
નાગરિકોના મનોરંજન માટે વઢવાણ ખાંડીપોળ પાસે રૂ. ૧ કરોડના ખર્ચે આધુનિક બગીચો તૈયાર કરવામાં આવશે. વિકાસની આ મજલમાં સુરેન્દ્રનગરની શાન સમાન દૂધરેજ તળાવના નવીનીકરણનું કાર્ય પણ સફળતાપૂર્વક પૂર્ણ થયું છે. ‘અમૃત ૨.૦’ યોજના અંતર્ગત રૂ. ૪.૨૪ કરોડના ખર્ચે તૈયાર થયેલ આ નવપલ્લિત તળાવનું આજે લોકાર્પણ કરી જનતા માટે ખુલ્લું મૂકવામાં આવ્યું હતું. આ પ્રસંગે મ્યુનિસિપલ કમિશનર નવનાથ ગવ્હાણે સહિતના ઉચ્ચ અધિકારીઓ અને મોટી સંખ્યામાં નાગરિકો ઉપસ્થિત રહ્યા હતા.
